പേരിലെ ഡബിള്‍ റോള്‍; ഒരേ പേരിലിറങ്ങിയ മലയാള സിനിമകള്‍

1968ലായിരുന്നു പ്രേം നസീര്‍ നായകനായി എത്തിയ 'അഞ്ചു സുന്ദരികള്‍' റിലീസായത്. എം.കൃഷ്ണന്‍ നായരായിരുന്നു ചിത്രത്തിന്റെ സംവിധായകന്‍. ഇതേ പേരില്‍ തന്നെയായിരുന്നു 2013ല്‍ അഞ്ച് സംവിധായകര്‍ ചേര്‍ന്ന് സംവിധാനം ചെയ്ത ആന്തോളജി ചിത്രം റിലീസായത്. ചിത്രം ഏറെ ശ്രദ്ധിക്കപ്പെടുകയും ചെയ്തിരുന്നു.

മാമാങ്കം എന്ന പേരില്‍ 1979ലും 2019ലും മലയാളത്തില്‍ സിനിമകള്‍ റിലീസായിട്ടുണ്ട്. 2019ല്‍ പുറത്തിറങ്ങിയ ചിത്രത്തില്‍ മമ്മൂട്ടിയായിരുന്നു നായകന്‍. 1979ല്‍ റിലീസായ ചിത്രത്തില്‍ പ്രേം നസീറായിരുന്നു നായകനായി എത്തിയത്.  

1984ലായിരുന്നു മോഹന്‍ലാല്‍, മമ്മൂട്ടി എന്നിവര്‍ പ്രധാന വേഷങ്ങളിലെത്തിയ വേട്ട റിലീസായത്. പിന്നീട് 32 വര്‍ഷങ്ങള്‍ക്ക് ശേഷമായിരുന്നു മഞ്ജു വാര്യരും കുഞ്ചാക്കോ ബോബനും പ്രധാന കഥാപാത്രങ്ങളായി എത്തിയ വേട്ട റിലീസായത്.   

വെള്ളിനക്ഷത്രം എന്ന പേരില്‍ 1949ലും 2004ലും മലയാളത്തില്‍ സിനിമകള്‍ റിലീസായിട്ടുണ്ട്. 2004ല്‍ റിലീസ് ചെയ്ത ചിത്രം സംവിധാനം ചെയ്തിരിക്കുന്നത് വിനയനാണ്. ബോക്‌സോഫീസില്‍ മികച്ച വിജയമായിരുന്നു ചിത്രം നേടിയത്.  

1988ല്‍ റിലീസ് ചെയ്ത ഊഴം എന്ന ചിത്രത്തില്‍ മധു, സുകുമാരി, ജഗതി ശ്രീകുമാര്‍ എന്നിവരായിരുന്നു പ്രധാന താരങ്ങള്‍. 2016ല്‍ റിലീസ് ചെയ്ത ഊഴത്തില്‍ പൃഥിരാജായിരുന്നു നായകന്‍. ജീത്തു ജോസഫ് സംവിധാനം ചെയ്ത ചിത്രം പക്ഷേ അധികം ശ്രദ്ധിക്കപ്പട്ടിരുന്നില്ല