ബിഗ് സ്ക്രീനില്‍ തിളങ്ങാനായില്ല, മിനിസ്ക്രീനിലൂടെ താരോദയം ലഭിച്ച താരങ്ങള്‍

2006ല്‍ പുറത്തിറങ്ങിയ വാസ്തവം എന്ന ചിത്രത്തിലൂടെയാണ് വരദ സിനിമയിലെത്തുന്നത്. തുടര്‍ന്ന് ചെറിയ കഥാപാത്രങ്ങളിലൂടെ സിനിമയില്‍ തന്നെ സജീവമായെങ്കിലും ശ്രദ്ധിക്കപ്പെടാതെ പോവുകയായിരുന്നു. പിന്നീട് 2012ല്‍ സ്‌നേഹക്കൂട് എന്ന സീരിയലിലൂടെ ടെലിവിഷന്‍ രംഗത്ത് താരം സജീവമാവുകയായിരുന്നു.  

2009ലെ മിസ് കേരള മത്സരത്തില്‍ 'മിസ് ബ്യട്ടിഫുള്‍ ഐ' എന്ന ടൈറ്റില്‍ നേടിയ മാളവിക വെയില്‍സ് മലര്‍വാടി ആര്‍ട്‌സ് ക്ലബിലൂടെയാണ് വെള്ളിത്തിരയിലെത്തുന്നത്. പിന്നീട് 2015- 16ല്‍ മനോരമയില്‍ സംപ്രേഷണം ചെയ്ത പൊന്നമ്പിളി എന്ന ടെലിവിഷന്‍ പരമ്പരയിലൂടെ ടെലിവിഷന്‍ രംഗത്ത് സജീവമായി.  

ടെലിവിഷന്‍ പ്രേക്ഷകരുടെ പ്രിയതാരം ശ്രീരാം രാമചന്ദ്രനും സിനിമയിലൂടെയാണ് അഭിനയരംഗത്ത് എത്തുന്നത്. മലര്‍വാടി ആര്‍ട്‌സ് ക്ലബിലൂടെ വെള്ളിത്തിരയിലെത്തിയ ശ്രീരാം ഏഷ്യാനെറ്റില്‍ സംപ്രേഷണം ചെയ്ത കസ്തൂരിമാനിലൂടെയാണ് കൂടുതല്‍ ആരാധകരെ ഉണ്ടാക്കിയത്.  

2011ല്‍ പുറത്തിറങ്ങിയ രതി നിര്‍വ്വേദത്തിലൂടെ ശ്രദ്ധിക്കപ്പെട്ട ശ്രീജിത്ത് വിജയ് തുടര്‍ന്ന് ചെറുതും വലുതുമായി നിരവധി സിനിമകളില്‍ അഭിനയിച്ചിരുന്നു. എന്നാല്‍ ഈ കഥാപാത്രങ്ങളൊന്നും അധികം ശ്രദ്ധിക്കപ്പെടാതെ പോവുകയായിരുന്നു. പിന്നീട് ടെലിവിഷന്‍ സീരിയലുകളില്‍ സജീവമായ ശ്രീജിത്തിന് ഇന്ന് ആരാധകര്‍ ഏറെയാണ്.  

ഉപ്പും മുളകും  എന്ന ഒരൊറ്റ ടെലിവിഷന്‍ പരമ്പരയിലൂടെ ലക്ഷക്കണക്കിന് ആരാധകരെ ഉണ്ടാക്കിയെടുത്ത ബിജു സോപാനവും സിനിമയിലൂടെയാണ് തന്റെ കരിയര്‍ ആരംഭിക്കുന്നത്. രാജമാണിക്യം, ബ്ലാക്ക്  ബട്ടര്‍ഫ്‌ളൈ തുടങ്ങിയ സിനിമകളില്‍ അഭിനയിച്ച നടന് പക്ഷേ പിന്നീട് ശ്രദ്ധിക്കപ്പെടുന്ന കഥാപാത്രങ്ങളൊന്നും ലഭിച്ചിരുന്നില്ല.  

ടെലിവിഷന്‍ പ്രേക്ഷകരുടെ പ്രിയതാരം സജിനും സിനിമയിലൂടെയാണ് തന്റെ കരിയര്‍ ആരംഭിക്കുന്നത്. എന്നാല്‍ ഏഷ്യാനെറ്റില്‍ സംപ്രേഷണം ചെയ്ത സ്വാന്തനം എന്ന പരമ്പരയിലൂടെയാണ് സജിന്‍ പ്രേക്ഷകര്‍ക്കിടയില്‍ ശ്രദ്ധിക്കപ്പെട്ടത്.