അസിന്‍ മാത്രമല്ല ഈ താരസുന്ദരിമാരുടെ ഭര്‍ത്താക്കന്മാരും ബിസിനസുകാരാണ്‌

പ്രശസ്തമായ മെഹ്ത ഗ്രൂപ്പ് ഉടമ ജയ് മേത്തയാണ് ബോളിവുഡ് നടി ജൂഹി ചാവ്‌ലയുടെ ഭര്‍ത്താവ്. സുഹൃത്തുക്കള്‍ വഴിയായിരുന്നു ജയ് മേത്തയെ ജൂഹി പരിചയപ്പെട്ടത്. തുടര്‍ന്ന് സൗഹൃദം പ്രണയത്തിലേക്ക് മാറുകയായിരുന്നു. 1995ലായിരുന്നു ഇരുവരും തമ്മിലുള്ള വിവാഹം. എന്നാല്‍ അക്കാലത്ത് വിവാഹം കരിയറിലെ ബാധിക്കുമോ എന്ന പേടി കാരണം ജൂഹി വിവാഹം മാധ്യമങ്ങളില്‍ നിന്നും മറച്ചു വെച്ചിരുന്നു. വര്‍ഷങ്ങള്‍ക്ക് ശേഷം ഒരു അഭിമുഖത്തിലാണ് ജൂഹി ഇക്കാര്യം തുറന്നു പറഞ്ഞത്‌. 

വ്യവസായിയായ രാജ് കുന്ദ്രയാണ്‌ ശില്‍പ ഷെട്ടിയുടെ ഭര്‍ത്താവ്. 2009 നവംബര്‍ 22നായിരുന്നു ബോളിവുഡിനെ വിസ്മയിപ്പിച്ച ശില്‍പയുടെ രാജകീയ വിവാഹം നടന്നത്. രാജ് കുന്ദ്രയുമായുള്ള രണ്ടാം വിവാഹമായിരുന്നു ശില്‍പയുടേത്. വിവാഹ നിശ്ചയത്തിന് 3 കോടി വിലയുള്ള ഡയമണ്ട് മോതിരമായിരുന്നു രാജ് കുന്ദ്ര നല്‍കിയത്. ശില്‍പ ഷെട്ടിയുടെ സുഹൃത്തിന്റെ ഫാം ഹൗസില്‍ വച്ചായിരുന്നു താരവിവാഹം.  

2018ലായിരുന്നു ബിസിനസുകാരനായ ആനന്ദ് അഹൂജയുമായുള്ള സോനം കപൂറിന്റെ വിവാഹം. ഭാനെ എന്ന ബ്രാന്‍ഡില്‍ മുംബൈ ആസ്ഥാനമായി വസ്ത്ര നിര്‍മ്മാണ സ്ഥാപനം നടത്തുകയാണ് ആനന്ദ്. പ്രശസ്ത ഡിസൈനറായ അനുരാധ വാകില്‍ ഡിസൈന്‍ ചെയ്ത ചുവപ്പ് ലെഹംഗയായിരുന്നു വിവാഹദിനത്തില്‍ സോനം അണിഞ്ഞത്. അനാമിഖ ഖന്ന ഡിസൈന്‍ ചെയ്ത വസ്ത്രമായിരുന്നു വിവാഹ റിസപ്ഷന് സോനം അണിഞ്ഞത്.  

2016ലായിരുന്നു പ്രമുഖ വ്യവസായി രാഹുല്‍ ശര്‍മയുമായുള്ള അസിന്റെ വിവാഹം. ഹൗസ്ഫുള്‍ ടു എന്ന സിനിമയുടെ പ്രമോഷന്‍ പരിപാടിക്കിടെയായിരുന്നു ഇരുവരും ആദ്യമായി പരിചയപ്പെടുന്നത്. തുടര്‍ന്ന് സൗഹൃദം പ്രണയമായി മാറുകയായിരുന്നു. ന്യൂഡല്‍ഹിയിലെ ദുസിത് ദേവരാന ഹോട്ടലില്‍ വച്ച് നടന്ന വിവാഹത്തില്‍ ബോളിവുഡില്‍ നിന്നും ചുരുക്കം പേര്‍ മാത്രമായിരുന്നു പങ്കെടുത്തത്.