ഷാജി പാപ്പനും പിള്ളേരും വീണ്ടും ; ജയസൂര്യയുടെ വരാനിരിക്കുന്ന ചിത്രങ്ങൾ

ജയസൂര്യയെ നായകനാക്കി കെ എസ് ബാവ സംവിധാനം ചെയ്ത ചിത്രമാണ് അപ്പോസ്തലന്‍. കെ എസ് ബാവയും അന്‍വര്‍ ഹുസൈനും ചേര്‍ന്നാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. അരുണ്‍ നാരായണന്‍ പ്രൊഡക്ഷന്‍സിന്റെ ബാനറില്‍ അരുണ്‍ നാരായണന്‍ ആണ് ചിത്രം നിര്‍മ്മിക്കുന്നത്.

ബോക്‌സോഫീസില്‍ മികച്ച വിജയം നേടിയ ആട് 2വിന്റെ മൂന്നാംഭാഗമാണ് ആട് 3. മിഥുന്‍ മാനുവല്‍ തോമസ് സംവിധാനം ചെയ്യുന്ന ചിത്രത്തിന്റെ പ്രഖ്യാപനം ആട് 2വിന്റെ നൂറാം ദിനാഘോഷ ചടങ്ങുകള്‍ക്കിടയിലാണ് നടന്നത്. ചിത്രം ത്രീഡിയിലായാരിക്കുമെന്നാണ് റിപ്പോര്‍ട്ടുകള്‍. ജയസൂര്യ,വിനായകന്‍, ചെമ്പന്‍ വിനോദ് ജോസ്, സണ്ണി വെയ്ന്‍, വിജയ് ബാബു തുടങ്ങിയ നീണ്ട താരനിരയാണ് മൂന്നാഭാഗത്തിലും ഉണ്ടാവുക.

ജയസൂര്യയെ നായകനാക്കി മിഥുന്‍ മാനുവല്‍ തോമസ് സംവിധാനം ചെയ്യുന്ന ചിത്രമാണ് ടര്‍ബോ പീറ്റര്‍. ആട് സിരീസില്‍ നിന്നും തികച്ചും വ്യത്യസ്തമാര്‍ന്ന രീതിയിലാണ് ചിത്രം ഒരുങ്ങുന്നത്‌. ഹാസ്യത്തിന് പ്രാധാന്യം നല്‍കിയുളള ഒരു മാസ് എന്റര്‍ടെയ്‌നറാണ് ചിത്രം. ആട് സിരീസിനു വേണ്ടി സംഗീതമൊരുക്കിയ ഷാന്‍ റഹ്മാന്‍ തന്നെയാണ് ടര്‍ബോ പീറ്ററിനു വേണ്ടിയും സംഗീതമൊരുക്കുന്നത്.  

ക്യാപ്റ്റന്‍ എന്ന ചിത്രത്തിനുശേഷം ജയസൂര്യയും പ്രജേഷ് സെന്നും വീണ്ടുമൊന്നിക്കുന്ന ചിത്രമാണ് വെളളം. പ്രജേഷ് തന്നെയാണ് ചിത്രത്തിന് കഥയൊരുക്കുന്നതും. കണ്ണൂരുള്ള സാധാരണക്കാരനായ ഒരു വ്യക്തിയുടെ യഥാര്‍ത്ഥ ജീവിത കഥയാണ് ചിത്രം പറയുന്നത്.

ജോ ആന്‍ഡ് ദ് ബോയ് എന്ന ചിത്രത്തിനുശേഷം റോജിന്‍ തോമസ് സംവിധാനം ചെയ്യുന്ന ചിത്രമാണ് കടമറ്റത്ത് കത്തനാര്‍. ജയസൂര്യയാണ് ചിത്രത്തില്‍ കടമറ്റത്ത് കത്തനാറായി എത്തുന്നത്. ആര്‍ രാമാനന്ദ് ആണ് ചിത്രത്തിന്റെ തിരക്കഥാകൃത്ത്. രാമാനന്ദന്റെ വര്‍ഷങ്ങളായുള്ള ചരിത്ര ഗവേഷണത്തില്‍ നിന്നാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. ത്രീഡിയില്‍ ഒരുങ്ങുന്ന ചിത്രം ഫ്രൈഡേ ഫിലിം ഹൗസാണ് നിര്‍മ്മിക്കുന്നത്. 

മെട്രോമാന്‍ ഇ ശ്രീധരന്റെ ജീവിതം ആസ്പദമാക്കി വി കെ പ്രകാശ് സംവിധാനം ചെയ്യുന്ന ചിത്രമാണ് രാമസേതു. സുരേഷ് ബാബു തിരക്കഥ ഒരുക്കുന്ന ചിത്രത്തില്‍ ജയസൂര്യയാണ് നായകന്‍. ഇന്ദ്രന്‍സും ചിത്രത്തില്‍ പ്രധാന കഥാപാത്രത്തെ അവതരിപ്പിക്കുന്നു. 1964ലെ പാമ്പന്‍ പാലം പുനര്‍നിര്‍മ്മാണം മുതല്‍ കൊച്ചി മെട്രോവരെ നീളുന്ന ശ്രീധരന്റെ കഥയാണ് ചിത്രം പറയുന്നത്.

അനശ്വര നടന്‍ സത്യന്റെ ജീവിതം അടിസ്ഥാനമാക്കി നവാഗതനായ രതീഷ് രഘു സംവിധാനം ചെയ്യുന്ന ചിത്രമാണ് ബയോപിക് ഓഫ് സത്യന്‍. ജയസൂര്യയാണ് ചിത്രത്തില്‍ സത്യനായി വേഷമിടുന്നത്. ബി ടി അനില്‍കുമാര്‍,കെ ജി സന്തോഷ് എന്നിവര്‍ ചേര്‍ന്നാണ് ചിത്രത്തിന്റെ രചന നിര്‍വ്വഹിച്ചിരിക്കുന്നത്. വിജയ് ബാബുവിന്റെ നിര്‍മ്മാണ കമ്പനിയായ ഫ്രൈഡ ഫിലിം ഹൗസാണ് ചിത്രം നിര്‍മ്മിക്കുന്നത്.