കോടികള്‍ വെറും തള്ള് മാത്രമോ? ഈ മമ്മൂട്ടി ചിത്രങ്ങള്‍ ശരിക്കും ഹിറ്റായിരുന്നോ?

റിലീസ് ചെയ്ത ആദ്യ ആഴ്ച തന്നെ കേരളത്തില്‍ നിന്നും മാത്രം 9.75 കോടി നേടിയ മമ്മൂട്ടി ചിത്രമാണ് റോഷാക്ക്. കെട്ട്യോളാണന്റെ മാലാഖയ്ക്ക് ശേഷം നിസാം ബഷീര്‍ സംവിധാനം ചെയ്ത ചിത്രം 2022ലെ ഹിറ്റ് സിനിമകളിലൊന്നു കൂടിയാണ്. സൈക്കോളജിക്കല്‍ മിസ്റ്ററി ത്രില്ലര്‍ വിഭാഗത്തില്‍പ്പെട്ട ചിത്രത്തില്‍ മമ്മൂട്ടിക്കൊപ്പം തന്നെ ബിന്ദു പണിക്കറുടെ കഥാപാത്രവും ഏറെ ശ്രദ്ധിക്കപ്പെട്ടിരുന്നു. 15 കോടി മുതല്‍ മുടക്കില്‍ ഒരുക്കിയ ചിത്രം തിയേറ്ററുകളില്‍ നിന്നും 39 കോടിയിലധികം കളക്ഷന്‍ നേടിയുട്ടുണ്ടെന്നാണ് റിപ്പോര്‍ട്ടുകള്‍.  

പ്രഖ്യാപനം മുതല്‍ മമ്മൂട്ടി ആരാധകര്‍ കാത്തിരുന്ന മമ്മൂട്ടി ചിത്രമായിരുന്നു നന്‍പകല്‍ നേരത്ത് മയക്കം. ലിജോ ജോസ് പെല്ലിശ്ശേരി സംവിധാനം ചെയ്ത ചിത്രം റിലീസ് ചെയ്ത ആദ്യ ദിനം തന്നെ 1.02 കോടി രൂപ കളക്ഷന്‍ നേടിയെന്നാണ് റിപ്പോര്‍ട്ടുകള്‍. മമ്മൂട്ടി കമ്പനിയും ആമേന്‍ മൂവി മൊണാസ്ട്രിയും ചേര്‍ന്ന് നിര്‍മ്മിച്ച ചിത്രത്തിന്റെ ആകെ ബജറ്റ് 3 കോടിയെന്നാണ് റിപ്പോര്‍ട്ടുകള്‍.  

പ്രഖ്യാപന സമയത്ത് ശ്രദ്ധിക്കപ്പെട്ടെങ്കിലും തിയേറ്ററുകളില്‍ ഓളമുണ്ടാക്കാതെ പോയ മമ്മൂട്ടി ചിത്രമായിരുന്നു 2023ല്‍ പുറത്തിറങ്ങിയ ക്രിസ്റ്റഫര്‍. മലയാളത്തിലെ എക്കാലത്തെയും സൂപ്പര്‍ഹിറ്റായ സ്ഫടികത്തിന്റെ റീ റിലീസിനൊപ്പം തിയേറ്ററുകളിലെത്തിയ ചിത്രം ആദ്യ 1 ദിവസങ്ങള്‍ പിന്നിട്ടപ്പോള്‍ 5.47 കോടി കളക്ഷന്‍ നേടിയെന്നാണ് റിപ്പോര്‍ട്ടുകള്‍. ചിത്രത്തിന്റെ മൊത്തം കളക്ഷന്‍ 10.40 കോടിയെന്നാണ് പുറത്ത് വന്ന റിപ്പോര്‍ട്ടുകള്‍ പറയുന്നത്.  

2022ല്‍ സിനിമാപ്രേമികള്‍ ഒന്നടങ്കം കാത്തിരുന്ന റിലീസുകളിലൊന്നായിരുന്നു സിബിഐ 5. എന്നാല്‍ ബോക്‌സോഫീസില്‍ കാര്യമായ വിജയം നേടാന്‍ ചിത്രത്തിന് സാധിച്ചിരുന്നില്ല. വന്‍ പ്രമോഷനുകളടക്കം നല്‍കിയ ചിത്രത്തിന് സമ്മിശ്ര പ്രതികരണമായിരുന്നു പ്രേക്ഷകരുടെ ഭാഗത്ത് നിന്നും ലഭിച്ചത്. ആദ്യത്തെ ആഴ്ച വിദേശ മാര്‍ക്കറ്റുകളില്‍ നിന്നും 17 കോടി രൂപയായിരുന്നു ചിത്രം നേടിയത്. റിപ്പോര്‍ട്ടുകള്‍ പ്രകാരം കേരളത്തില്‍ നിന്നും മാത്രം 37 കോടിയാണ് ചിത്രത്തിന് ലഭിച്ച കളക്ഷന്‍.  

2022ല്‍ 100 കോടി ക്ലബില്‍ ഇടം നേടിയ മമ്മൂട്ടി ചിത്രമാണ് ഭീഷ്മ പര്‍വ്വം. കളക്ഷന്‍ റെക്കോര്‍ഡുകള്‍ തകര്‍ത്ത ചിത്രം 2022ലെ സൂപ്പര്‍ഹിറ്റ് ചിത്രങ്ങളിലൊന്നു കൂടിയാണ്. അമല്‍ നീരദ് സംവിധാനം ചെയ്ത ചിത്രത്തില്‍ ഷൈന്‍ ടോം ചാക്കോ, ജിനു ജോസഫ്, ശ്രിന്ദ, സൗബിന്‍ ഷാഹിര്‍, ശ്രീനാഥ് ഭാസി, നദിയ മൊയ്ദു തുടങ്ങി വന്‍താരനിരയായിരുന്നു അണിനിരഞ്ഞത്.