യാത്രാപ്രേമിയാണോ? ഒടിടിയിൽ കാണാം ഈ ട്രാവൽ സിനിമകൾ

മഞ്ജു വാര്യര്‍, റിമ കല്ലിങ്കല്‍ എന്നിവരെ പ്രധാന കഥാപാത്രങ്ങളാക്കി ആഷിഖ് അബു സംവിധാനം ചെയ്ത ചിത്രമാണ് റാണി പത്മിനി. മുന്‍പരിചയമില്ലാത്ത രണ്ട് സ്ത്രീകള്‍ കൊച്ചിയില്‍ നിന്ന് ഹിമാചല്‍ പ്രദേശിലേക്ക് നടത്തുന്ന യാത്രയാണ് ചിത്രത്തിന്റെ പ്രമേയം. ശ്യാ പുഷ്‌ക്കരനും രവിശങ്കറും ചേര്‍ന്നായിരുന്നു ചിത്രത്തിന്റെ തിരക്കഥ എഴുതിയത്. പ്രഖ്യാപനം മുതല്‍ ചിത്രം വാര്‍ത്തകളില്‍ ഇടം പിടിച്ച ചിത്രത്തിന് പക്ഷേ സമ്മിശ്ര പ്രതികരണമായിരുന്നു പ്രേക്ഷരുടെ ഭാഗത്ത് നിന്ന് ലഭിച്ചത്.

മലയാളത്തിലെ എക്കാലത്തെയും ഹിറ്റ് ചിത്രങ്ങളിലൊന്നാണ് 1990ല്‍ പുറത്തിറങ്ങിയ നമ്പര്‍ 20 മദ്രാസ് മെയില്‍. ഡെന്നീസ് ജോസഫിന്റെ തിരക്കഥയില്‍ ജോഷിയായിരുന്നു ചിത്രം സംവിധാനം ചെയ്തത്. മമ്മൂട്ടിയും മോഹന്‍ലാലും ഒരുമിച്ചെത്തിയ ചിത്രത്തില്‍ മമ്മൂട്ടി സിനിമാ നടനായി തന്നെയായിരുന്നു അഭിനയിച്ചത്. തിരുവനന്തപുരത്ത് നിന്ന് മദ്രാസിലേക്ക് പോകുന്ന ഒരു തീവണ്ടിയില്‍ ഒരു പെണ്‍കുട്ടി കൊല്ലപ്പെടുന്നതും തുടര്‍ന്ന് കൊലപാതകിയെ കണ്ടുപിടിക്കുന്നതുമാണ് ചിത്രത്തിന്റെ കഥ.  

മലയാളത്തിലെ മികച്ച ട്രാവല്‍ ചിത്രങ്ങളിലൊന്നാണ് നീലാകാശം പച്ചക്കടല്‍ ചുവന്ന ഭൂമി. സമീര്‍ താഹിര്‍ സംവിധാനം ചെയ്ത ചിത്രത്തില്‍ ദുല്‍ഖര്‍ സല്‍മാന്‍. സണ്ണി വെയ്ന്‍ എന്നിവരായിരുന്നു പ്രധാന താരങ്ങള്‍. സുനി, കാസി എന്നീ യുവാക്കള്‍ ബൈക്കില്‍ നാഗാലാന്റിലേക്ക് നടത്തുന്ന യാത്രയായിരുന്നു ചിത്രത്തിന്റെ പ്രമേയം. റിലീസിന് പിന്നാലെ ചിത്രത്തിലെ ഗാനങ്ങളും ഡയലോഗുകളും വലിയ രീതിയില്‍ ഹിറ്റായി മാറിയിരുന്നു. കൂടാതെ ബുള്ളറ്റ് യാത്രകളും അക്കാലത്ത് ട്രെന്റായി മാറിയിരുന്നു.

ഫഹദ് ഫാസില്‍, നെടുമുടി വേണു, സ്വാതി റെഡ്ഡി എന്നിവരെ പ്രധാന കഥപാത്രങ്ങളാക്കി അനില്‍ രാധാകൃഷ്ണ മേനോന്‍ സംവിധാനം ചെയ്ത ചിത്രമാണ് നോര്‍ത്ത് 24 കാതം. ഹരികൃഷ്ണന്‍, ഗോപാലന്‍, നാരായണി എന്നിങ്ങനെ മൂന്ന് കഥാപാത്രങ്ങളുടെ ഒരു ദിവസത്തെ രസകരമായ യാത്രയാണ് ചിത്രത്തിന്റെ പ്രമേയം. 2013ല്‍ പുറത്തിറങ്ങിയ ചിത്രം വര്‍ഷങ്ങള്‍ക്ക് ശേഷവും മലയാളികളുടെ പ്രിയപ്പെട്ട സിനിമകളിലൊന്നാണ്‌.  

അനില്‍ രാധാകൃഷ്ണ മേനോന്റെ സംവിധാനത്തില്‍ 2015ല്‍ പുറത്തിറങ്ങിയ ചിത്രമാണ് ലോര്‍ഡ് ലിവിങ് സ്റ്റണ്‍ 7000 കണ്ടി. 7000 കണ്ടി എന്ന അസാധാരണ ഗ്രാമത്തിലേക്ക് പോകുന്ന ഒരു കൂട്ടം ആളുകളിലൂടെയാണ് ചിത്രത്തിന്റെ കഥ പറയുന്നത്. കുഞ്ചാക്കോ ബോബന്‍, സണ്ണി വെയ്ന്‍, ഭരത്, നെടുമുടി വേണു, ചെമ്പന്‍ വിനോദ് ജോസ്, റീനു മാത്യൂസ്, സുധീര്‍ കരമന തുടങ്ങിയവരായിരുന്നു ചിത്രത്തിലെ പ്രധാന താരങ്ങള്‍. ഇടുക്കി, വയനാട്, ചെന്നൈ, പൂനൈ എന്നിവിടങ്ങളായിരുന്നു ചിത്രത്തിന്റെ പ്രധാന ലൊക്കോഷന്‍.