ബീമാപ്പള്ളി വെടിവെയ്പ്പും ചുരുളിയിലെ തെറിവിളിയും ; 2021ലെ വിവാദചിത്രങ്ങള്‍

സംസ്ഥാന ദേശീയ പുരസ്‌ക്കാരങ്ങളും അന്‍പതോളം അന്താരാഷ്ട്ര മേളകളിലെ അംഗീകാരങ്ങളും നേടിയ ബിരിയാണി എന്ന സിനിമ റിലീസ് ചെയ്തതിനു പിന്നാലെ നിരവധി വിവാദങ്ങള്‍ ഉണ്ടായിരുന്നു. സെന്‍സര്‍ ബോര്‍ഡ് സര്‍ട്ടിഫിക്കറ്റ് നല്‍കിയ ചിത്രത്തിന് കാണികളുണ്ടായിട്ടും ചില തിയറ്ററുകളില്‍ നിന്നും ചിത്രത്തെ ഒഴിവാക്കിയിരുന്നു. തുടര്‍ന്ന് സംവിധായകന്‍ സജിന്‍ ബാബു ഇതിനെതിരെ പ്രതികരിക്കുകയും ചെയ്തിരുന്നു.  

2021ല്‍ ഏറെ ശ്രദ്ധിക്കപ്പെട്ട ചിത്രമായിരുന്നു ദി ഗ്രേറ്റ് ഇന്ത്യന്‍ കിച്ചണ്‍. ഒരു സ്ത്രീയുടെ ദൈനം ദിന ജീവിതത്തിലെ ആണ്‍കോയ്മയുടെ പ്രശ്‌നങ്ങളെ അവതരിപ്പിച്ച ചിത്രത്തിനെതിരെ നിരവധി പേര്‍ രംഗത്തു വന്നിരുന്നു. കൂടാതെ മികച്ച ചിത്രത്തിനുള്ള സംസ്ഥാന ചലച്ചിത്ര അവാര്‍ഡ് ചിത്രത്തിന് ലഭിച്ചപ്പോള്‍ ജൂറി അംഗമായ എന്‍ ശശിധരന്‍ പുരസ്‌ക്കാര നിര്‍ണയത്തിനെതിരെ രംഗത്തു വരികയും ചെയ്തിരുന്നു. 

ഒടിടി റിലീസിനു പിന്നാലെ നിരന്തരം വിവാദങ്ങളുണ്ടായ ചിത്രമായിരുന്നു ലിജോ ജോസ് പെല്ലിശ്ശേരിയുടെ ചുരുളി. ചിത്രത്തില്‍ ഉപയോഗിച്ച തെറി സംഭാഷണങ്ങളുടെ പേരിലായിരുന്നു മിക്ക വിവാദങ്ങളും. കൂടാതെ ശുഭാനന്ദ ഗുരുദേവന്‍ എഴുതിയ 'ആനന്ദം പരമാനന്ദമാണ് എന്റെ കുടുംബം' എന്ന കീര്‍ത്തനം സിനിമയില്‍ ആശ്രമത്തിന്റെ അനുവാദമില്ലാതെ കള്ളുഷാപ്പിന്റെ പശ്ചാത്തലത്തില്‍ ചിത്രീകരിച്ചതിനെതിരെയും ശുഭാനന്ദ ഗുരുദേവ വിശ്വാസികള്‍ പ്രതിഷേധിച്ചിരുന്നു.

2021ല്‍ ഏറെ ശ്രദ്ധിക്കപ്പെട്ട മറ്റൊരു ചിത്രമായിരുന്നു അന്ന ബെന്‍ നായികയായി എത്തിയ സാറാസ്. പ്രസവിക്കാന്‍ ഇഷ്ടമില്ലാത്ത, കുട്ടികളെ ഇഷ്ടമല്ലാത്ത സാറ എന്ന പെണ്‍കുട്ടിയുടെ കഥ പറഞ്ഞ ചിത്രത്തിന് നിരവധി വിമര്‍ശനങ്ങള്‍ വന്നിരുന്നു.  

മഹേഷ് നാരായണന്‍ സംവിധാനം ചെയ്ത മാലിക് ചരിത്രത്തെ വളച്ചൊടിച്ചു എന്ന രീതിയില്‍ നിരവധി വിവാദങ്ങളുണ്ടായിരുന്നു. ബീമാപ്പള്ളി വെടിവെപ്പിന്റെ കഥ പറഞ്ഞ ചിത്രം അന്ന് അധികാരത്തിലുണ്ടായിരുന്ന ആഭ്യന്തര മന്ത്രിയെയും സര്‍ക്കാറിനെയും കുറിച്ച് മൗനം പാലിച്ചു എന്നായിരുന്നു പ്രധാന വിമര്‍ശനം.