ഓവറാക്കി നശിപ്പിച്ചു; 2022ല്‍ ബോക്‌സോഫീസില്‍ തകര്‍ന്നടിഞ്ഞ സിനിമകള്‍

പ്രഖ്യാപനം മുതല്‍ ക്ഷ്രേകര്‍ക്കിടയില്‍ ശ്രദ്ധിക്കപ്പെട്ട ചിത്രമായിരുന്നു മോഹന്‍ലാല്‍ പ്രധാന കഥാപാത്രമായി എത്തിയ ആറാട്ട്. എന്നാല്‍ മോഹന്‍ലാല്‍ ആരാധകരെ തൃപ്തിപ്പെടുത്താന്‍ മാത്രമാണ് ചിത്രത്തിന് കഴിഞ്ഞത്. യാതൊരു പുതുമകളുമില്ലാതെ ഒരുക്കിയ ചിത്രത്തിന് നിരവധി വിമര്‍ശനങ്ങളും ഉയര്‍ന്നിരുന്നു.

പുലിമുരുകന്റെ ഹിറ്റിനുശേഷം വൈശാഖും മോഹന്‍ലാലും വീണ്ടുമൊന്നിച്ച ചിത്രമായിരുന്നു മോണ്‍സ്റ്റര്‍. സൂപ്പര്‍ഹിറ്റ് ചിത്രം പ്രതീക്ഷിച്ചു തിയേറ്ററില്‍ എത്തിയ പ്രേക്ഷനെ തീര്‍ത്തും നിരാശപ്പെടുത്തിയ ചിത്രം കൂടിയാണ് മോണ്‍സ്റ്റര്‍. കെട്ടുറപ്പില്ലാത്ത തിരക്കഥ തന്നെയായിരുന്നു മോണ്‍സ്റ്ററിന്റെ  പരാജയത്തിനു പിന്നില്‍.

ആറാട്ട് പോലെ വന്‍ഹൈപ്പിലെത്തി 2022ല്‍ തിയേറ്ററില്‍ പരാജയപ്പെട്ട മറ്റൊരു ചിത്രമാണ് സാറ്റര്‍ഡേ നൈറ്റ്. കൃത്രിമത്വം നിറഞ്ഞ കഥാസന്ദര്‍ഭങ്ങളും കഥാപാത്രങ്ങളും മാത്രമുള്ള സിനിമ വെറുതെ കണ്ടിരിക്കാം എന്നതിനപ്പുറത്തേക്ക് യാതൊരു തരത്തിലും പ്രേക്ഷകനെ തൃപ്തിപ്പെടുത്തുന്നില്ല.

2022ല്‍ പ്രേക്ഷനെ നിരാശപ്പെടുത്തിയ മറ്റൊരു ചിത്രമാണ് മഞ്ജു വാര്യര്‍ പ്രധാന കഥാപാത്രമായി എത്തിയ ലളിതം സുന്ദരം. പ്രഖ്യാപന സമയത്ത് വലിയ പ്രമോഷനുകള്‍ കിട്ടിയ ചിത്രത്തിന് പക്ഷേ ശരാശരി പ്രേക്ഷകനെ പോലും തൃപ്തിപ്പെടുത്താന്‍ സാധിച്ചിരുന്നില്ല.  

പോയവര്‍ഷം ട്രോളന്മാര്‍ ആഘോഷിച്ച മറ്റൊരു മഞ്ജു വാര്യര്‍ ചിത്രമായിരുന്നു ജാക്ക് ആന്റ് ജില്‍. തുടക്കം മുതല്‍ അവസാനം വരെ പ്രേക്ഷകരെ വെറുപ്പിച്ച ചിത്രം സംവിധാനം ചെയ്തിരിക്കുന്നത് സന്തോഷ് ശിവനാണ്.