കെട്ടുന്നെങ്കില്‍ ഗ്രീസില്‍ വച്ചെന്ന് സാനിയ, വിവാഹമേ വേണ്ടെന്ന് ഐശ്വര്യ; അവിവാഹിതരായ താരസുന്ദിമാർ

ക്വീന്‍ എന്ന സിനിമയിലൂടെ മലയാളി പ്രേക്ഷകരുടെ മനസില്‍ ഇടം നേടിയ നടിയാണ് സാനിയ അയ്യപ്പന്‍. ഡാന്‍സ് റിയാലിറ്റി ഷോയിലൂടെയായിരുന്നു സാനിയയുടെ കരിയര്‍ ആരംഭിക്കുന്നത്. പിന്നീട് വെള്ളിത്തിരയിലെത്തിയ സാനിയ ലൂസിഫര്‍, ദി പ്രീസ്റ്റ്, സല്യൂട്ട് തുടങ്ങിയ ചിത്രങ്ങളിലൂടെ മലയാള സിനിമയില്‍ സജീവമാകുകയായിരുന്നു. സിനിമയ്‌ക്കൊപ്പം സോഷ്യല്‍മീഡിയയിലും സജീവമായ സാനിയയുടെ വിവാഹത്തിനാണ് ഇപ്പോള്‍ പ്രേക്ഷകര്‍ കാത്തിരിക്കുന്നത്. എന്നാല്‍ അടുത്തൊന്നും വിവാഹം കഴിക്കില്ലെന്നാണ് താരത്തിന്റെ മറുപടി. അഥവാ വിവാഹം കഴിക്കുന്നുണ്ടെങ്കില്‍ സബ്യസാചി ഡിസൈന്‍ ചെയ്ത വസ്ത്രമണിഞ്ഞ് ഗ്രീസില്‍ വച്ച് വിവാഹം കഴിക്കാനാണ് സാനിയയ്ക്ക് താല്‍പര്യം.  

നടിയായി നിരവധി സിനിമകളില്‍ അഭിനയിച്ചെങ്കിലും അന്നും ഇന്നും അന്ന ബെന്‍ മലയാളികളുടെ ബേബി മോളാണ്. കുമ്പളങ്ങി നൈറ്റ്‌സ് എന്ന ആദ്യ ചിത്രത്തിലൂടെ തന്നെ മലയാളികളുടെ പ്രിയപ്പെട്ട നടിയായി മാറാന്‍ അന്നയ്ക്ക് കഴിഞ്ഞിട്ടുണ്ട്. ഓരോ സിനിമ കഴിയുമ്പോഴും അഭിനയമികവ് കൊണ്ട് പ്രേക്ഷകരെ ഞെട്ടിക്കുന്ന അന്നയുടെ വിവാഹം എന്നായിരിക്കും എന്നാണ് ആരാധകരുടെ സംശയം. എന്നാല്‍ ആരാധകരുടെ ഇത്തരം ചോദ്യങ്ങള്‍ക്കൊന്നും താരം ഇതുവരെ മറുപടി നല്‍കിയിട്ടില്ല. സിനിമകളുമായി തിരക്കിലാണ് അന്നയിപ്പോള്‍.  

പ്രണവ് മോഹന്‍ലാലിന്റെ പേരിനൊപ്പം നിരവധി തവണ ഗോസിപ്പ് കോളങ്ങളില്‍ നിറഞ്ഞ നടിയാണ് കല്യാണി പ്രിയദര്‍ശന്‍. എന്നാല്‍ അത്തരം വ്യാജ വാര്‍ത്തകള്‍ തമാശയായിട്ടാണ് കല്യാണിയും കുടുംബവും നോക്കിക്കാണുന്നത്. എന്നിരുന്നാലും കളിക്കൂട്ടുകാരായ കല്യാണിയും പ്രണവും മികച്ച ജോഡികളാണെന്നാണ് ആരാധകര്‍ പറയുന്നത്.  

മികച്ച കഥാപാത്രങ്ങളിലൂടെ വളരെ ചുരുങ്ങിയ കാലം കൊണ്ട് മലയാള സിനിമയില്‍ തന്റേതായ സ്ഥാനം ഉണ്ടാക്കിയ നടിയാണ് ദര്‍ശന രാജേന്ദ്രന്‍. ഗോസിപ്പ് കോളങ്ങളിലൊന്നുമില്ലെങ്കിലും ദര്‍ശനയുടെ വിവാഹത്തെക്കുറിച്ച് പ്രേക്ഷകര്‍ക്ക് ആകാംക്ഷയുണ്ട്. താരത്തിന്റെ പങ്കാളി സിനിമാനടനായിരിക്കുമോ എന്നാണ് പ്രേക്ഷകരുടെ പ്രധാന സംശയം. എന്നാല്‍ ഇത്തരം ചോദ്യങ്ങളൊന്നും മൈന്‍ഡ് ചെയ്യാതെ സിംഗിള്‍ ലൈഫ് ആസ്വദിക്കുകയാണ് ദര്‍ശന.  

വിവാഹം കഴിക്കാന്‍ താല്‍പര്യമില്ലെന്ന് തുറന്നു പറഞ്ഞ താരമാണ് ഐശ്വര്യ ലക്ഷ്മി. ഒരു പങ്കാളി എന്തായാലും വേണം, പക്ഷേ നിയമപരമായി വിവാഹം കഴിച്ചതിലൂടെ മാത്രമേ അത് സാധ്യമാകൂ എന്നു താന്‍ ചിന്തിക്കുന്നില്ലെന്നാണ് വിവാഹത്തെക്കുറിച്ച് ചോദിച്ചപ്പോള്‍ താരം പറഞ്ഞ മറുപടി. കൂടാതെ സ്വന്തം കാലില്‍ നിന്നതിനു ശേഷം മാത്രമേ പെണ്‍കുട്ടികള്‍ വിവാഹത്തിന് തയ്യാറെടുക്കാവുള്ളു എന്നും താരം പറഞ്ഞിരുന്നു.