അഭിനയ സാമ്രാട്ടുകള്‍ ഒരുമിച്ച് ; തിലകനും മോഹന്‍ലാലും അഭിനയിച്ച സൂപ്പര്‍ഹിറ്റുകള്‍

സിബി മലയിലിന്റെ സംവിധാനത്തിൽ മോഹൻലാൽ, തിലകൻ, സുരഭി, എന്നിവർ പ്രധാനവേഷങ്ങളിലെത്തിയ ചിത്രമായിരുന്നു ചെങ്കോല്‍. ചിത്രത്തില്‍ മോഹന്‍ലാലിന്റെ അച്ഛനായിട്ടായിരുന്നു തിലകന്‍ അഭിനയിച്ചത്. 1989ല്‍ പുറത്തിറങ്ങിയ സൂപ്പര്‍ഹിറ്റ് ചിത്രം കിരീടത്തിന്റെ രണ്ടാംഭാഗം കൂടിയായ ചിത്രത്തിന്റെ കഥ, തിരക്കഥ, സംഭാഷണം എന്നിവയെല്ലാം നിര്‍വ്വഹിച്ചത് ലോഹിതദാസ് ആണ്.

ടി.കെ. രാജീവ് കുമാറിന്റെ സംവിധാനത്തിൽ മോഹൻലാൽ, തിലകൻ, ശോഭന, വിന്ദുജ മേനോൻ എന്നിവർ പ്രധാനവേഷങ്ങളിലെത്തിയ ചിത്രമായിരുന്നു പവിത്രം. ചിത്രത്തില്‍ മോഹന്‍ലാലിന്റെ അച്ഛനായിട്ടായിരുന്നു തിലകന്‍ അഭിനയിച്ചത്. ചിത്രത്തിലൂടെ 1994ലെ മികച്ച നടനുള്ള ഫിലിം ഫെയര്‍ അവാര്‍ഡ് മോഹന്‍ലാലിന് ലഭിച്ചിരുന്നു. എന്നാല്‍ ബോക്‌സോഫീസില്‍ ശരാശരിക്ക് മേലെയുള്ള വിജയം മാത്രമാണ് ചിത്രത്തിന് ലഭിച്ചത്.  

മലയാളത്തിലെ ഏറ്റവും മികച്ച ചിത്രങ്ങളുടെ ലിസ്റ്റ് എടുത്താല്‍ അതില്‍ മുന്‍പന്തിയില്‍ തന്നെയുണ്ടാവും കിരീടം. സേതുമാധവനായി മോഹന്‍ലാലും കോണ്‍സ്റ്റബ്യള്‍ അച്യുതന്‍നായരായി തിലകനും മത്സരിച്ചഭിനയിച്ച ചിത്രം ഇരുവരുടെയും മികച്ച കഥാപാത്രങ്ങളിലൊന്നു കൂടിയാണ്. സിബി മലയില്‍ സംവിധാനം ചെയ്ത ഈ ചിത്രം 250 ദിവസത്തിലധികം തിയേറ്ററുകളില്‍ പ്രദര്‍ശിപ്പിച്ചിരുന്നു. 

ആടുതോമയും ചാക്കോ മാഷും, ഒരു പക്ഷേ മലയാളികളുടെ ഹൃദയത്തില്‍ ഇത്ര ആഴത്തില്‍ പതിഞ്ഞ മറ്റൊരു അച്ഛന്‍-മകന്‍ കോംബോ ഇല്ലെന്നു തന്നെ പറയേണ്ടി വരും. ഭദ്രന്റെ മാസ്റ്റര്‍ പീസ് എന്നു തന്നെ പറയാവുന്ന സ്ഫടികം മലയാളികള്‍ക്ക്‌ സമ്മാനിച്ചത് അന്നുവരെ കാണാത്ത മോഹന്‍ലാലിനെയും തിലകനെയുമായിരുന്നു. ആടുതോമയായി മോഹന്‍ലാലും ചാക്കോ മാഷായി തിലകനും മത്സരിച്ചഭിനയച്ചപ്പോള്‍ പ്രേക്ഷകര്‍ക്ക് ലഭിച്ചത് എക്കാലത്തെയും മികച്ച ക്ലാസിക്ക് ചിത്രങ്ങളിലൊന്നുകൂടിയായിരുന്നു. 

മലയാളത്തിലെ എക്കാലത്തെയും വലിയ ഹിറ്റ് ചിത്രങ്ങളിലൊന്നാണ് മോഹന്‍ലാല്‍ നായകനായി എത്തിയ നരസിംഹം. കളക്ഷന്‍ റെക്കോര്‍ഡുകള്‍ തിരുത്തിക്കുറിച്ച ചിത്രം 250 ദിവസത്തിലധികം തിയേറ്ററുകളില്‍ പ്രദര്‍ശിപ്പിച്ചിരുന്നു. ഈ ചിത്രത്തിലും മോഹന്‍ലാലിന്റെ അച്ഛനായിട്ടായിരുന്നു തിലകന്‍ അഭിനയിച്ചത്.  

മോഹന്‍ലാലിനെ പ്രധാന കഥാപാത്രമാക്കി റോഷന്‍ ആന്‍ഡ്രൂസ് സംവിധാനം ചെയ്ത ചിത്രമായിരുന്നു ഇവിടം സ്വര്‍ഗ്ഗമാണ്. ജെയിംസ് ആൽബർട്ട് ആണ്‌ ചിത്രത്തിന്റെ കഥയും തിരക്കഥയും നിര്‍വ്വഹിച്ചിരിക്കുന്നത്. തികച്ചും റിയലിസ്റ്റിക്കായ പശ്ചാത്തലത്തില്‍ ഒരുക്കിയ ചിത്രത്തില്‍ തിലകന്‍, ലാലു അലക്‌സ്, ജഗതി ശ്രീകുമാര്‍, ശ്രീനിവാസന്‍ എന്നിവരായിരുന്നു മറ്റു പ്രധാന കഥാപാത്രങ്ങളെ അവതരിപ്പിച്ചത്.    

മോഹന്‍ലാല്‍, ശോഭന, തിലകന്‍ എന്നിവരെ പ്രധാന കഥാപാത്രങ്ങളാക്കി പ്രിയദര്‍ശന്‍ സംവിധാനം ചെയ്ത ചിത്രമാണ് മിന്നാരം. 1994ല്‍ പുറത്തിറങ്ങിയ ചിത്രം ആ വര്‍ഷത്തെ സൂപ്പര്‍ഹിറ്റു ചിത്രങ്ങളിലൊന്നു കൂടിയാണ്. ചിത്രത്തിലെ ഗാനങ്ങളും ഏറെ ശ്രദ്ധിക്കപ്പെട്ടിരുന്നു. ഈ ചിത്രത്തിലും മോഹന്‍ലാലിന്റെ അച്ഛനായിട്ടായിരുന്നു തിലകന്‍ അഭിനയിച്ചത്.  

മലയാളത്തിലെ എക്കാലത്തെയും വലിയ സൂപ്പര്‍ഹിറ്റ് ചിത്രങ്ങളിലൊന്നാണ്‌ മോഹന്‍ലാല്‍,രേവതി,തിലകന്‍ എന്നിവര്‍ പ്രധാന കഥാപാത്രങ്ങളായി എത്തിയ കിലുക്കം. പ്രിയദര്‍ശന്റെ സംവിധാനത്തില്‍ 1991ല്‍ പുറത്തിറങ്ങിയ ഈ ചിത്രം 300 ദിവസത്തിലധികം തിയേറ്ററുകളില്‍ പ്രദര്‍ശിപ്പിച്ചിരുന്നു. ഹിന്ദിയില്‍ മുസ്‌കുരാഹട് എന്ന പേരിലാണ് ചിത്രം റീമേക്ക് ചെയ്തിരിക്കുന്നത്.

മലയാളത്തിലെ ഏറ്റവും വലിയ ക്ലാസിക് ഹിറ്റുകളിലൊന്നായ മണിചിത്രത്താഴ് ഏതാണ്ട് 365 ദിവസത്തോളം തിയേറ്ററുകളില്‍ പ്രദര്‍ശിപ്പിച്ചിരുന്നു. ചിത്രത്തിലെ അഭിനയത്തിനു ശോഭനയ്ക്ക് മികച്ച നടിക്കുള്ള ദേശീയ ചലച്ചിത്ര പുരസ്‌ക്കാരവും ലഭിച്ചിരുന്നു.