ആശാന്റെ പേര് കാത്ത ശിഷ്യന്മാർ; വിനീത് ശ്രീനിവാസന്റെ അസിസ്റ്റന്‍റായിരുന്ന സംവിധായകർ

ആഷിക് അബു, വികെ പ്രകാശ്, വിനീത് ശ്രീനിവാസന്‍ തുടങ്ങിയ സംവിധായകര്‍ക്കൊപ്പം അസിസ്റ്റന്റായി വര്‍ക്ക് ചെയ്ത സംവിധായകനാണ് ജിജോ ആന്റണി. തുടര്‍ന്ന് 2014ല്‍ 'കൊന്തയും പൂണുലും' എന്ന ചിത്രം സംവിധാനം ചെയ്തുകൊണ്ട് സ്വതന്ത്രസംവിധായകനായി. പിന്നീട് ഡാര്‍വിന്റെ പരിണാമം, പോക്കിരി സൈമണ്‍, അടിത്തട്ട് തുടങ്ങിയ ചിത്രങ്ങള്‍ കൂടി സംവിധാനം ചെയ്തു.  

2008ല്‍ പുറത്തിറങ്ങിയ ക്രേസി ഗോപാലന്‍ എന്ന ചിത്രത്തിന്റെ അസിസ്റ്റന്റ് സംവിധായകനായിട്ടായിരുന്നു ജൂഡ് ആന്റണി ജോസഫ് കരിയര്‍ ആരംഭിച്ചത്. പിന്നീട് വിനീത് ശ്രീനിവാസന്റെ തട്ടത്തില്‍ മറയത്ത്, മലര്‍വാടി ആര്‍ട്‌സ് ക്ലബ് എന്നീ ചിത്രങ്ങളില്‍ അസിസ്റ്റന്റായി വര്‍ക്ക് ചെയ്തു. തുടര്‍ന്നായിരുന്നു 2014ല്‍ 'ഓം ശാന്തി ഓശാന' എന്ന ചിത്രത്തിലൂടെ സ്വതന്ത്ര സംവിധായകനായത്.  

വിനീത് ശ്രീനിവാസന്റെ തിര, ജേക്കബിന്റെ സ്വര്‍ഗ്ഗരാജ്യം എന്നീ ചിത്രങ്ങളുടെ അസിസ്റ്റന്റ് സംവിധായകനായിരുന്നു ഗണേഷ് രാജ്. കൂടാതെ 2004ല്‍ പുറത്തിറങ്ങിയ അഞ്ജലി മേനോന്‍ ചിത്രം ബാംഗ്ലൂര്‍ ഡെയ്‌സിലും അസിസ്റ്റന്റായി വര്‍ക്ക് ചെയ്തിരുന്നു. പിന്നീട് 2016ല്‍ ആനന്ദം എന്ന ചിത്രം സംവിധാനം ചെയ്തുകൊണ്ട് സ്വതന്ത്ര സംവിധായകനായി.  

2013ല്‍ പുറത്തിറങ്ങിയ വിനീത് ശ്രീനിവാസന്‍ ചിത്രം 'തിര'യുടെ സഹസംവിധായകനായിരുന്നു ബേസില്‍ ജോസഫ്. തുടര്‍ന്നായിരുന്നു 2015ല്‍ ധ്യാന്‍ ശ്രീനിവാസന്‍, വിനീത് ശ്രീനിവാസന്‍, അജു വര്‍ഗീസ് എന്നിവരെ പ്രധാന കഥാപാത്രങ്ങളാക്കി 'കുഞ്ഞിരാമായണം' എന്ന ചിത്രം സംവിധാനം ചെയ്തത്. ചിത്രം ആ വര്‍ഷത്തെ ബോക്‌സോഫീസ് ഹിറ്റുകളിലൊന്നു കൂടിയായിരുന്നു.  

വിനീത് ശ്രീനിവാസന്‍ സംവിധാനം ചെയ്ത തട്ടത്തിന്‍ മറയത്ത്, തിര എന്നീ ചിത്രങ്ങളുടെ സഹസംവിധായകനായിരുന്നു ജി. പ്രജിത്ത്‌. പിന്നീട് 2015ല്‍ വിനീത് ശ്രീനിവാസന്റെ തന്നെ തിരക്കഥയില്‍ 'ഒരു വടക്കന്‍ സെല്‍ഫി' എന്ന ചിത്രം സംവിധാനം ചെയ്തുകൊണ്ട് സ്വതന്ത്രസംവിധായകനായി. നിവിന്‍ പോളി നായകനായി എത്തിയ വാണിജ്യപരമായി മികച്ച വിജയം നേടിയിരുന്നു.