ലാല്‍ സലാം സഖാവെ...! മെയ് ദിനത്തില്‍ കാണാനിതാ വിപ്ലവം ജ്വലിക്കുന്ന സിനിമകള്‍

കേരളത്തിലെ കമ്മ്യൂണിസ്റ്റ് പ്രസ്ഥാനത്തിന്റെ വളര്‍ച്ചയും ചരിത്രവും പറഞ്ഞ ചിത്രമായിരുന്നു 1998ല്‍ പുറത്തിറങ്ങിയ രക്തസാക്ഷികള്‍ സിന്ദാബാദ്. മോഹന്‍ലാല്‍, സുരേഷ് ഗോപി, നാസര്‍ തുടങ്ങിയവര്‍ പ്രധാന താരങ്ങളായി എത്തിയ ചിത്രത്തിലെ ഗാനങ്ങളും ഏറെ ശ്രദ്ധിക്കപ്പെട്ടിരുന്നു. വേണു നാഗവള്ളിയും ചെറിയാന്‍ കല്‍പകവാടിയും ചേര്‍ന്നാണ് ചിത്രത്തിന്റെ കഥയും തിരക്കഥയും എഴുതിയത്.  

മുരളി ഗോപിയുടെ തിരക്കഥയില്‍ അരുണ്‍ കുമാര്‍ അരവിന്ദ് സംവിധാനം ചെയ്ത ചിത്രമാണ് ലെഫ്റ്റ് റൈറ്റ് ലെഫ്റ്റ്. 2013ല്‍ റിലീസിനെത്തിയ ചിത്രത്തിന് സി.പി.ഐ.എമ്മിനെ വിമര്‍ശിക്കുന്നു എന്നാരോപിച്ച് അപ്രഖ്യാപിത വിലക്ക് ഏര്‍പ്പെടുത്തിയിരുന്നു. പാര്‍ട്ടിയുടെ ശക്തി കേന്ദ്രമായ തലശ്ശേരി പോലുള്ള സ്ഥലങ്ങളില്‍ ചിത്രം പ്രദര്‍ശിപ്പിക്കാന്‍ തിയേറ്റര്‍ ഉടമകള്‍ തയ്യാറായിരുന്നില്ല. പിന്നീടത് വലിയ വിവാദങ്ങള്‍ സൃഷ്ടിക്കുകയും ചെയ്തിരുന്നു.  

ടി.ദാമോദരന്‍ തിരക്കഥയെഴുതി ഐ.വി ശശി സംവിധാനം ചെയ്ത ചിത്രമാണ് അടിമകള്‍ ഉടമകള്‍. 1987ല്‍ പുറത്തിറങ്ങിയ ചിത്രത്തില്‍ മമ്മൂട്ടി, മോഹഹന്‍ലാല്‍, നളിനി, സീമ എന്നിവരായിരുന്നു പ്രധാന താരങ്ങള്‍. തിയേറ്ററുകളില്‍ നിന്നും മികച്ച വിജയമായിരുന്നു ചിത്രം സ്വന്തമാക്കിയത്.  

പൃഥ്വിരാജിനെ നായകനാക്കി മധുപാല്‍ സംവിധാനം ചെയ്ത ചിത്രമാണ് തലപ്പാവ്. 2008ല്‍ പുറത്തിറങ്ങിയ ചിത്രം നക്‌സല്‍ വര്‍ഗീസിന്റെ കൊലപാതകവും തുടര്‍ന്നുണ്ടായ സംഭവങ്ങളുമാണ് അവതരിപ്പിക്കുന്നത്. ബാബു ജനാര്‍ദ്ദനന്‍ ആണ് ചിത്രത്തിന്റെ തിരക്കഥാകൃത്ത്.  

വേണു നാഗവള്ളിയുടെ സംവിധാനത്തില്‍ 1990ല്‍ പുറത്തിറങ്ങിയ ചിത്രമാണ് ലാല്‍ സലാം. രാഷ്ട്രീയ-കുടുംബ പശ്ചാത്തലത്തില്‍ ഒരുക്കിയ ചിത്രത്തില്‍ മോഹന്‍ലാല്‍, മുരളി, ഗീത, ഉര്‍വശി തുടങ്ങിയവരായിരുന്നു പ്രധാന താരങ്ങള്‍. വേണു നാഗവള്ളി തന്നെയായിരുന്നു ചിത്രത്തിന്റെ കഥയും തിരക്കഥയും എഴുതിയത്.