മത്സരിച്ച് രേവതിയും ബിന്ദു പണിക്കരും; നടിമാരുടെ 2022, പോയ വർഷത്തെ മികച്ച നടിമാർ

ടീച്ചര്‍ എന്ന ചിത്രത്തിലൂടെ ഗംഭീര പ്രകടനമായിരുന്നു 2022ല്‍ അമല പോള്‍ കാഴ്ചവെച്ചത്. അഞ്ച് വര്‍ഷത്തെ ഇടവേളയ്ക്ക് ശേഷം മലയാളത്തില്‍ തിരിച്ചെത്തിയ അമല ദേവിക എന്ന കഥാപാത്രത്തിലൂടെ വീണ്ടും പ്രേക്ഷക മനസില്‍ ഇടം പിടിക്കുകയാണ്. എന്നാല്‍ ചിത്രത്തിന് സമ്മിശ്ര പ്രതികരണമായിരുന്നു പ്രേക്ഷകരുടെ ഭാഗത്ത് നിന്നും ലഭിച്ചത്. റിവഞ്ച് ത്രില്ലര്‍ ഴോണറില്‍ ഒരുക്കിയ ചിത്രം സംവിധാനം ചെയ്തിരിക്കുന്നത് വിവേകാണ്.

അതിഗംഭീര പ്രകടനം കൊണ്ട് പോയ വര്‍ഷം പ്രേക്ഷക മനസ്സില്‍ ഇടം നേടിയ താരമാണ് ദര്‍ശന രാജേന്ദ്രന്‍. 2022ലെ ബോക്‌സോഫീസ് ഹിറ്റുകളിലൊന്നായിരുന്നു ജയ ജയ ജയ ജയ ഹേ. വലിയ പ്രമോഷനുകളൊന്നുമില്ലാതെ മൗത്ത് പബ്ലിസിറ്റിയിലൂടെയായിരുന്നു ചിത്രം സൂപ്പര്‍ഹിറ്റായി മാറിയത്. മികച്ച തിരക്കഥയും അഭിനേതാക്കളുടെ പ്രകടനവുമാണ് ചിത്രത്തെ മികവുറ്റതാക്കി മാറ്റിയത്.

അഭിനയ മികവ് കൊണ്ട് 2022ല്‍ ശ്രദ്ധിക്കപ്പെട്ട മറ്റൊരു ചിത്രമായിരുന്നു അപ്പന്‍. അലന്‍സിയറും പൗളി വിത്സനും സണ്ണി വെയ്‌നുമൊക്കെ നിറഞ്ഞാടിയ ചിത്രത്തില്‍ അനന്യ അവതരിപ്പിച്ച കഥാപാത്രവും ഏറെ ശ്രദ്ധിക്കപ്പെട്ടിരുന്നു. അഭിനയിച്ച എല്ലാവരും മത്സരിച്ചഭിനയിച്ച ചിത്രം ഏറെ ശ്രദ്ധിക്കപ്പെടുകയും ചെയ്തിരുന്നു. മജു സംവിധാനം ചെയ്ത ചിത്രത്തിന്റെ റിലീസ്‌ ഒടിടി പ്ലാറ്റ്‌ഫോമായ സോണി ലിവിലൂടെയായിരുന്നു.

അതിഗംഭീര പ്രകടനം കൊണ്ട് 2022ല്‍ പ്രേക്ഷകരെ ഞെട്ടിച്ച മറ്റൊരു നടിയാണ് രേവതി. ഭൂതകാലം എന്ന ചിത്രത്തിലെ വിഷാദ രോഗിയായ മധ്യവയസ്‌ക രേവതിയുടെ കൈകളില്‍ ഭദ്രമായിരുന്നുവെന്ന് തന്നെ പറയാം. ചിത്രത്തിലൂടെ 2022ലെ മികച്ച നടിക്കുള്ള കേരള സംസ്ഥാന ചലച്ചിത്ര പുരസ്‌ക്കാരവും രേവതിക്ക് ലഭിച്ചിരുന്നു.

ഒരിടവേളയ്ക്ക് ശേഷം സിനിമയിലേക്ക് മടങ്ങിയെത്തിയ ബിന്ദു പണിക്കരുടെ അതിഗംഭീര തിരിച്ചുവരവ് കൂടി കണ്ട വര്‍ഷമായിരുന്നു 2022. കോമഡി നിറഞ്ഞ അമ്മ, പെങ്ങള്‍ എന്നീ കഥാപാത്രത്തില്‍ നിന്നും മാറി ഇതുവരെ കാണാത്ത ബിന്ദു പണിക്കറെയായിരുന്നു റോഷാക്ക് എന്ന ചിത്രത്തില്‍ പ്രേക്ഷകര്‍ കണ്ടത്. പോയ വര്‍ഷത്തെ സൂപ്പര്‍ഹിറ്റുകളിലൊന്നു കൂടിയായ റോഷാക്ക് ബിന്ദു പണിക്കറുടെ കരിയറിലെ മികച്ച ചിത്രം കൂടിയാണ്.