ഇവരൊക്കെ വീണ്ടും വന്നാലോ? മലയാളി കാത്തിരിക്കുന്ന ദിലീപ് ചിത്രങ്ങളുടെ രണ്ടാം ഭാഗങ്ങൾ

ദിലീപിന്റെ കരിയറിലെ എക്കാലത്തെയും മികച്ച ചിത്രങ്ങളിലൊന്നാണ് സി.ഐ.ഡി മൂസ. 2003ല്‍ പുറത്തിറങ്ങിയ ചിത്രം മലയാളത്തിലെ സൂപ്പര്‍ഹിറ്റ് ചിത്രം കൂടിയാണ്. സി.ഐ.ഡി മൂസയ്ക്ക് രണ്ടാംഭാഗം വരുന്നു എന്ന തരത്തില്‍ മുമ്പ് നിരവധി വാര്‍ത്തകള്‍ വന്നിരുന്നു. എന്നാല്‍ ആദ്യ ഭാഗത്തിലുണ്ടായിരുന്ന സുകുമാരി, കൊച്ചിന്‍ ഹനീഫ, ക്യാപ്റ്റന്‍ രാജു, ഒടുവില്‍ ഉണ്ണികൃഷ്ണന്‍ എന്നീ താരങ്ങള്‍ക്ക് പകരം ആര് ചിത്രത്തിലെത്തും എന്നതാണ് രണ്ടാംഭാഗത്തിന്റെ ഏറ്റവും വലിയ വെല്ലുവിളി.  

മലയാളത്തിലെ എക്കാലത്തെയും വലിയ ബോക്‌സോഫീസ് ഹിറ്റായിരുന്നു ലാല്‍ ജോസിന്റെ സംവിധാനത്തില്‍ പുറത്തിറങ്ങിയ മീശ മാധവന്‍. പാട്ടുകള്‍കൊണ്ടും കോമഡി രംഗങ്ങള്‍ കൊണ്ടും പ്രേക്ഷകരെ രസിപ്പിച്ച ചിത്രത്തിന് രണ്ടാം ഭാഗം വേണമെന്നാണ് പ്രേക്ഷകരുടെ അഭിപ്രായം. ദിലീപും കാവ്യ മാധവനും ഒരിക്കല്‍ക്കൂടി ഒരുമിച്ച് സ്‌ക്രീനിലെത്തുന്നത് കാണാനായി കാത്തിരിക്കുകയാണ് പ്രേക്ഷകര്‍. വര്‍ഷങ്ങള്‍ക്കിപ്പുറവും ചിത്രത്തിലെ ഗാനങ്ങള്‍ മലയാളികള്‍ ഏറ്റുപാടുകയാണ്.  

ദിലീപിന് കരിയര്‍ ബ്രേക്ക് നല്‍കിയ ചിത്രമായിരുന്നു 2004ല്‍ പുറത്തിറങ്ങിയ റണ്‍വേ. ജോഷിയുടെ സംവിധാനത്തില്‍ പുറത്തിറങ്ങിയ ചിത്രത്തിലെ ദിലീപിന്റെ കഥാപാത്രമായ വളയാര്‍ പരമശിവം ഒരിക്കല്‍ക്കൂടി സ്‌ക്രീനിലെത്തണമെന്നാണ് പ്രേക്ഷകര്‍ പറയുന്നത്. 2016ല്‍ ചിത്രത്തിന് രണ്ടാംഭാഗം വരുന്നു എന്ന തരത്തില്‍ വാര്‍ത്തകള്‍ വന്നിരുന്നു. എന്നാല്‍ പിന്നീട് ചിത്രത്തെക്കുറിച്ച് യാതൊരു അപ്‌ഡേറ്റുകളും പുറത്തുവന്നിട്ടില്ല. എങ്കിലും വാളയാര്‍ പരമശിവമായി ദിലീപ് ഒരിക്കല്‍ക്കൂടി എത്തുമെന്ന പ്രതീക്ഷയിലാണ് പ്രേക്ഷകര്‍.  

രണ്ടാം ഭാഗം വരണമെന്ന് പ്രേക്ഷകര്‍ പറയുന്ന മറ്റൊരു ദിലീപ് ചിത്രമാണ് കല്യാണരാമന്‍. ഷാഫിയുടെ സംവിധാനത്തില്‍ 2002ല്‍ ക്രിസ്മസ് റിലീസായി എത്തിയ ചിത്രം തിയേറ്ററുകളില്‍ നിന്നും മികച്ച കളക്ഷനായിരുന്നു നേടിയത്. ദിലീപിനൊപ്പം, കുഞ്ചാക്കോ ബോബന്‍, നവ്യ നായര്‍, ലാല്‍, ലാലു അലക്‌സ്, ഇന്നസെന്റ്, സലീം കുമാര്‍ തുടങ്ങി വന്‍താര നിര അണിനിരന്ന ചിത്രത്തിലെ ഡയലോഗുകള്‍ക്കും പാട്ടുകള്‍ക്കും ഇന്നും ആരാധകര്‍ ഏറെയാണ്.  

പ്രേക്ഷകര്‍ കാത്തിരിക്കുന്ന മറ്റൊരു സെക്കന്‍ഡ് പാര്‍ട്ടാണ് ഈ പറക്കും തളികയുടേത്. 20001ല്‍ പുറത്തിറങ്ങിയ ചിത്രത്തിന് ഇന്നും ആരാധകര്‍ ഏറെയാണ്. താമരാക്ഷന്‍പിള്ളയും ഉണ്ണിയും സുന്ദേരശനും ഒരിക്കല്‍ തിയേറ്ററുകളിലെത്തണമെന്നാണ് പ്രേക്ഷര്‍ പറയുന്നത്. താഹയുടെ സംവിധാനത്തില്‍ 2001ല്‍ പുറത്തിറങ്ങിയ ചിത്രത്തില്‍ നിത്യ ദാസായിരുന്നു നായിക.