പ്രതിഫലം 5 കോടി, വീടിന്റെ വില 100 കോടി; തെന്നിന്ത്യന്‍ താരങ്ങളുടെ വീടിന്‍റെ വില

ഹൈദരാബാദിലെ ജൂബിലി ഹില്‍സിലാണ് അല്ലു അര്‍ജുന്റെ കോടികള്‍ വില വരുന്ന ആഢംബര വീട്. പുറത്ത് വരുന്ന റിപ്പോര്‍ട്ടുകള്‍ പ്രകാരം 100 കോടിയാണ് വീടിന്റെ വില. ഭാര്യ സ്‌നേഹയ്ക്കും മക്കള്‍ക്കുമൊപ്പം ഏറെക്കാലമായി ഇവിടെയാണ് അല്ലു താമസിക്കുന്നത്. കടും നിറങ്ങളെല്ലാം ഒഴിവാക്കി തനി വെള്ള പെയിന്റാണ് വീടിന് നല്‍കിയിരിക്കുന്നത്. പ്രശസ്ത ആര്‍ക്കിടെക്റ്റ് ആമിര്‍ ശര്‍മ വീട് ഡിസൈന്‍ ചെയ്തിരിക്കുന്നത്. ഏതാണ്ട് 2 ഏക്കര്‍ സ്ഥലത്താണ് താരത്തിന്റെ മനോഹരമായ വീട്.  

ഹൈദരാബാദില്‍ തന്നെയാണ് നടി സാമന്തയുടെ ആഢംബര വീട്. 2017ലാണ് സാമന്ത ഈ വീട്ടില്‍ താമസം തുടങ്ങിയത്. നീന്തല്‍ക്കുളം, പൂന്തോട്ടം, ജിം തുടങ്ങി എല്ലാവിധ സൗകര്യങ്ങളുമുള്ള വീടിന്റെ ഏകദേശ വില 7.8 കോടിയാണ്. ഇതിനെല്ലാം പുറമെ വീട്ടില്‍ സാമന്ത ചെറിയൊരു അടുക്കളത്തോട്ടവും സെറ്റ് ചെയ്തിട്ടുണ്ട്. മോഡേണും ക്ലാസിക്കും ചേര്‍ന്ന സാമന്തയുടെ വീട് കാണാനായി ദിവസവും നിരവധി പേരാണ് എത്തുന്നത്.  

ഏതാണ്ട് 150 കോടി വില മതിക്കുന്നതാണ് ധനുഷിന്റെ ചെന്നൈയിലെ വീട്. ജയലളിതയുടെയും രജനീകാന്തിന്റെയും വീടിന് സമീപത്തായി പോയസ് ഗാര്‍ഡനിലാണ് താരത്തിന്റെ വീട്. നാലു നിലകളിലുള്ള വീട് 2021ലാണ് ധനുഷ് സ്വന്തമാക്കുന്നത്. ഏതാണ്ട് 19000 ചതുരശ്ര അടിയിലാണ് വീട് പണിതിരിക്കുന്നത്.  

ചെന്നൈയില്‍ തന്നെ രണ്ട് അപ്പാര്‍ട്ട്‌മെന്റുകളാണ് കമല്‍ഹാസനുള്ളത്. ഏതാണ്ട് 19.5 കോടിയാണ് വീടുകളുടെ വില. ഇതിനെല്ലാം പുറമെ ലണ്ടനിലും കമല്‍ ഹാസന് വീടുകളുണ്ടെന്നാണ് റിപ്പോര്‍ട്ടുകള്‍. ഏതാണ്ട് 2.5 കോടിക്കടുത്താണ് ലണ്ടനിലെ വീടിന്റെ വില. പ്രതിഫലമായി കോടികള്‍ വാങ്ങുന്ന കമല്‍ ഹാസന്റെ ആകെ ആസ്തി 177 കോടിയാണെന്നാണ് റിപ്പോര്‍ട്ടുകള്‍.

ചെന്നൈയിലെ പോയസ് ഗാര്‍ഡനിലാണ് സൂപ്പര്‍സ്റ്റാര്‍ രജനീകാന്തിന്റെ വീട്. നാലു കിടപ്പുമുറികളുള്ള വീടിന് ഇളം വെള്ളം നിറത്തിലുള്ള പെയിന്റാണ് നല്‍കിയിരിക്കുന്നത്. ഏതാണ്ട് 35 കോടിയാണ് വീടിന്റെ വില. രജനീകാന്തിന്റെ വീടിനടുത്താണ് ധനുഷിന്റെയും വീട്.