അനുഗ്രഹീതനാകാന്‍ സണ്ണി വെയ്ന്‍ ; ഇറങ്ങാനിരിക്കുന്നത് കിടിലന്‍ സിനിമകള്‍

സണ്ണി വെയിനിനെ നായകനാക്കി ഗൗതമി നായര്‍ സംവിധാനം ചെയ്ത ആദ്യ ചിത്രമാണ് വൃത്തം. കംപ്ലീറ്റ് വിമന്‍ കൂട്ടായ്മയിലാണ് ഈ സിനിമയൊരുങ്ങുന്നത്. കെഎസ് അരവിന്ദും ഡാനിയേല്‍ സയൂജ് നായറും ചേര്‍ന്നാണ് സിനിമയ്ക്ക് തിരക്കഥയൊരുക്കിയത്.ചിത്രത്തില്‍ നിവിന്‍ പോളി അതിഥി താരമായി എത്തുന്നുണ്ട്. സിനിമയില്‍ പ്രാധാന്യമുളെളാരു കഥാപാത്രമായി 20മിനുറ്റുകളോളം ആയിരിക്കും നിവിന്‍ ചിത്രത്തിലുണ്ടാവുക. 

പിടിക്കിട്ടാപ്പുള്ളി സുകുമാരക്കുറുപ്പിന്റെ ജീവിതം പ്രമേയമാക്കി ശ്രീനാഥ് രാജേന്ദ്രന്‍ സംവിധാനം ചെയ്ത ചിത്രമാണ് കുറുപ്പ്. ദുല്‍ഖര്‍ സല്‍മാനാണ് ചിത്രത്തില്‍ കുറുപ്പായി എത്തുന്നത്. ത്രില്ലര്‍ വിഭാഗത്തില്‍പ്പെടുന്ന ചിത്രത്തില്‍ വിവിധ ഗെറ്റപ്പുകളിലാണ് ദുല്‍ഖര്‍ എത്തുന്നത്. ചിത്രത്തില്‍ സണ്ണി വെയിനും പ്രധാന കഥാപാത്രത്തെ അവതരിപ്പിക്കുന്നുണ്ട്.

സണ്ണി വെയ്ന്‍,തെന്നിന്ത്യന്‍ താരം റിദ്ധി കുമാര്‍ എന്നിവര്‍ പ്രധാന കഥാപാത്രങ്ങളായി എത്തുന്ന ചിത്രമാണ് ചെത്തി മന്ദാരം തുളസി. ആര്‍എസ് വിമല്‍ ഫിലിംസ്,യുണൈറ്റഡ് ഫിലിം കിങ്ഡം ബാനറില്‍ ഒരുങ്ങുന്ന ചിത്രത്തില്‍ ആര്‍എസ് വിമലിന് പുറമെ രാഹുല്‍,ജയ് ജനാര്‍ദന്‍,പി ജിംഷാര്‍ എന്നീ നവാഗത സംവിധായകരും സംവിധാന സംഘത്തില്‍ ഉള്‍പ്പെടുന്നു.

മഞ്ജു വാര്യരും സണ്ണി വെയ്‌നും പ്രധാന കഥാപാത്രങ്ങളെ അവതരിപ്പിക്കുന്ന ചിത്രമാണ് ചതുര്‍ മുഖം. രഞ്ജീത് കമല ശങ്കര്‍,സലില്‍ വി എന്നിവര്‍ ചേര്‍ന്നാണ് ചിത്രം സംവിധാനം ചെയ്യുന്നത്. ആസിഫ് അലി നായകനായി എത്തിയ കോഹിനൂറിന്റെ തിരക്കഥ എഴുതിയത് ഇരുവരും ചേര്‍ന്നായിരുന്നു

നവാഗതനായ ജിഷ്ണു ശ്രീകണ്ഠന്‍ സംവിധാനം ചെയ്ത ചിത്രമാണ് പിടികിട്ടാപ്പുള്ളി. സണ്ണി വെയ്ന്‍, അഹാന കൃഷ്ണ കുമാര്‍ എന്നിവരാണ് ചിത്രത്തിലെ പ്രധാന അഭിനേതാക്കള്‍. ക്രൈം കോമഡിയായി ഒരുക്കുന്ന ചിത്രത്തിന് സുമേഷ് ബി റോബിനാണ് തിരക്കഥ ഒരുക്കുന്നത്. ശംഭു എന്ന ആര്‍ക്കിടെക്കിന്റെ വേഷത്തിലാണ് സണ്ണി വെയ്ന്‍ ചിത്രത്തിലെത്തുന്നത്. ബൈജു,ലാലു അലക്‌സ്,സൈജു കുറുപ്പ്,മെറീന മൈക്കിള്‍, തുടങ്ങിയവരാണ് ചിത്രത്തിലെ മറ്റ് അഭിനേതാക്കള്‍.

സണ്ണി വെയ്ന്‍ നായകവേഷത്തിലെത്തുന്ന  ചിത്രമാണ്  അനുഗ്രഹീതന്‍ ആന്റണി. പ്രിന്‍സ് ജോയ് സംവിധാനം ചെയ്യുന്ന ചിത്രം തുഷാര്‍ എസ് ആണ് നിര്‍മ്മിക്കുന്നത്. 96 എന്ന തമിഴ് ചിത്രത്തിലൂടെ പ്രശസ്തയായ ഗൗരി കിഷന്‍ ആണ് ചിത്രത്തില്‍ നായികയായി എത്തുന്നത്. ആന്റണി എന്ന കഥാപാത്രമായാണ് സണ്ണി വെയ്ന്‍ ചിത്രത്തിലെത്തുന്നത്.