മമ്മൂട്ടിയുടെ സൂപ്പര്‍ഹിറ്റുകള്‍ റീമേക്ക് ചെയ്തപ്പോള്‍; ബോക്സ് ഓഫീസിൽ പരാജയപ്പെട്ട പടങ്ങൾ

മമ്മൂട്ടിയെ നായകനാക്കി കമല്‍ സംവിധാനം ചെയ്ത ചിത്രമായിരുന്നു മഴയെത്തും മുന്‍പേ. ശോഭന, ആനി, ശ്രീനിവാസന്‍ എന്നിവരായിരുന്നു ചിത്രത്തിലെ മറ്റു പ്രധാന കഥാപാത്രങ്ങളെ അവതരിപ്പിച്ചത്. ചിത്രം 2015ല്‍ സമീര്‍ എന്ന പേരില്‍ ഹിന്ദിയില്‍ റീമേക്ക് ചെയ്തിരുന്നു. അജയ് ദേവ്ഗണ്‍, അമീഷ പട്ടേല്‍, മഹിമ ചൗധരി എന്നിവരായിരുന്നു പ്രധാന കഥാപാത്രങ്ങളെ അവതരിപ്പിച്ചത്.  

മലയാളത്തിലെ ബോക്‌സോഫീസ് ഹിറ്റുകളിലൊന്നായിരുന്നു മമ്മൂട്ടി നായകനായി എത്തിയ രാജമാണിക്യം. 2009ല്‍ ചിത്രം ബെല്ലാരി നാഗ എന്ന പേരില്‍ റീമേക്ക് ചെയ്തിരുന്നു. ദിനേഷ് ബാബു സംവിധാനം ചെയ്ത ചിത്രത്തില്‍ വിഷ്ണുവര്‍ദ്ധന്‍ ആയിരുന്നു നായകനായി എത്തിയത്.  

മമ്മൂട്ടിയുടെ കരിയറിലെ മറ്റൊരു ഹിറ്റ് ചിത്രമായിരുന്നു കഥ പറയുമ്പോള്‍. ശ്രീനിവാസാന്റെ തിരക്കഥയില്‍ എം. മോഹനന്‍ ആയിരുന്നു ചിത്രം സംവിധാനം ചെയ്തത്. ചിത്രം പിന്നീട് തെലുങ്കിലേക്കും തമിഴിലേക്കും റീമേക്ക് ചെയ്തിരുന്നു. എന്നാല്‍ റീമേക്കിന് സമ്മിശ്ര പ്രതികരണമായിരുന്നു പ്രേക്ഷകരുടെ ഭാഗത്തു നിന്നും ലഭിച്ചത്.  

മലയാളത്തിലെ മറ്റൊരു ബോക്‌സോഫീസ് ഹിറ്റായിരുന്നു മമ്മൂട്ടിയും പൃഥ്വിരാജും പ്രധാന കഥാപാത്രങ്ങളായി എത്തിയ പോക്കിരിരാജ. മമ്മൂട്ടിക്കൊപ്പം വന്‍താര നിര അണിനിരന്ന ചിത്രം ബോസ് എന്ന പേരില്‍ ഹിന്ദിയില്‍ റീമേക്ക് ചെയ്തിരുന്നു. എന്നാല്‍ ചിത്രം പരാജയമായിരുന്നു.  

മലയാളത്തിലെ എക്കാലത്തെയും മികച്ച സിനിമകളിലൊന്നായിരുന്നു സിദ്ദിഖ്-ലാല്‍ കൂട്ടുക്കെട്ടില്‍ എത്തിയ ഹിറ്റ്‌ലര്‍. മമ്മൂട്ടി, ശോഭന, മുകേഷ്, ജഗദീഷ്, ഇന്നസെന്റ് തുടങ്ങി മലയാള സിനിമയിലെ വന്‍താരങ്ങള്‍ ഒന്നിച്ച ചിത്രത്തിലെ ഗാനങ്ങളും സൂപ്പര്‍ഹിറ്റായിരുന്നു. ചിത്രം പിന്നീട് ഹിന്ദി, തമിഴ്, തെലുങ്ക്, കന്നഡ, ബംഗാളി എന്നിങ്ങനെ അഞ്ചു ഭാഷകളിേേലക്ക് റീമേക്ക് ചെയ്തിരുന്നു.