റസൂല്‍ മുതല്‍ സുലൈമാന്‍ മാലിക് വരെ; മലയാളത്തിന്റെ സ്വന്തം ഫഫ

രാജീവ് രവിയുടെ സംവിധാനത്തില്‍ 2013ല്‍ പുറത്തിറങ്ങിയ ചിത്രമായിരുന്നു അന്നയും റസൂലും. ഫഹദ് ഫാസില്‍, ആന്‍ഡ്രിയ ജെര്‍മിയ എന്നിവര്‍ പ്രധാന കഥാപാത്രങ്ങളായി എത്തിയ ചിത്രം കൊച്ചിയുടെ പശ്ചാത്തലത്തില്‍ പ്രണയകഥയായിരുന്നു പറഞ്ഞത്. തിയറ്ററില്‍ വന്‍വിജയമുണ്ടായില്ലെങ്കിലും ചിത്രത്തില്‍ ഫഹദ് അവതരിപ്പിച്ച റസൂല്‍ എന്ന കഥാപാത്രത്തിന് മികച്ച പ്രതികരണമായിരുന്നു പ്രേക്ഷകരുടെ ഭാഗത്തു നിന്നും ലഭിച്ചത്.  

ഫഹദ് ഫാസിലിന്റെ കരിയറിലെ മികച്ച കഥാപാത്രങ്ങളിലൊന്നാണ് ഇയ്യോബിന്റെ പുസ്തകത്തിലെ അലോഷി എന്ന കഥാപാത്രം. അമല്‍ നീരദ് സംവിധാനം ചെയ്ത ചിത്രത്തിന്റെ തിരക്കഥ എഴുതിയിരിക്കുന്നത് ശ്യാം പുഷ്‌ക്കരനും ഗോപന്‍ ചിദംബരവും കൂടി ചേര്‍ന്നാണ്.  

ദിലീഷ് പോത്തന്‍ - ഫഹദ് ഫാസില്‍ കൂട്ടുക്കെട്ടില്‍ 2016ല്‍ പുറത്തിറങ്ങിയ ചിത്രമായിരുന്നു മഹേഷിന്റെ പ്രതികാരം. മികച്ച ജനപ്രിയ ചിത്രത്തിനുള്ള കേരള സംസ്ഥാന ചലച്ചിത്ര പുരസ്‌ക്കാരം, മികച്ച മലയാള ചലച്ചിത്രത്തിനുള്ള ദേശീയ പുരസ്‌ക്കാരം എന്നിവ ലഭിച്ച ചിത്രം ഫഹദ് ഫാസിലിന്റെ മറ്റൊരു മികച്ച ചിത്രം കൂടിയാണ്.  

ഫഹദ് ഫാസില്‍ എന്ന നടനെ സിനിമാപ്രേമികള്‍ ഇരുംകൈയും നീട്ടി സ്വീകരിച്ച ചിത്രമായിരുന്നു തൊണ്ടിമുതലും ദൃക്‌സാക്ഷിയും. റിയലിസ്റ്റിക് കാഴ്ചകളുമായി എത്തിയ ചിത്രത്തില്‍ ഫഹദ് ഫാസിലിന്റെ കഥാപാത്രത്തിന് പേരു പോലുമുണ്ടായിരുന്നില്ല. സുരാജ് വെഞ്ഞാറമൂടും ഫഹദ് ഫാസിലും മത്സരിച്ചഭിനയിച്ച ചിത്രം സംവിധാനം ചെയ്തിരിക്കുന്നത് ദിലീഷ് പോത്തനാണ്‌.  

''ഷമ്മി ഹീറോ ആടാ ഹീറോ'', ഒരൊറ്റ ഡയലോഗിലൂടെ മികച്ച നടനാണ് താനെന്ന് ഒരിക്കള്‍ക്കൂടി തെളിയിക്കുകയായിരുന്നു കുമ്പളങ്ങി നൈറ്റ്‌സിലൂടെ ഫഹദ് ഫാസില്‍. ചിത്രത്തില്‍ ഷമ്മി എന്ന കഥാപാത്രത്തെയായിരുന്നു ഫഹദ് അവതരിപ്പിച്ചത്.

ഫഹദ് ഫാസിലിനെ നായകനാക്കി അന്‍വര്‍ റഷീദ് സംവിധാനം ചെയ്ത ചിത്രമായിരുന്നു ട്രാന്‍സ്. വന്‍ഹൈപ്പിലെത്തിയ ചിത്രത്തിന് പക്ഷേ തിയറ്ററുകളില്‍ നിന്നും സമ്മിശ്ര പ്രതികരണമായിരുന്നു ലഭിച്ചത്. എന്നാല്‍ വിജു പ്രസാദ് എന്ന കഥാപാത്രമായി ഫഹദ് നിറഞ്ഞാടിയ ചിത്രം ഫഹദിന്റെ കരിയറിലെ ശ്രദ്ധിക്കപ്പെട്ട കഥാപാത്രങ്ങളിലൊന്നാണ്.  

ഫഹദിന്റെ അസാമാന്യ പ്രകടനം കൊണ്ട് ചര്‍ച്ചയായ ചിത്രമായിരുന്നു 2021ല്‍ പുറത്തിറങ്ങിയ ജോജി. സിനിമാറ്റിക് റിയലിസത്തിലൂടെ കഥ പറഞ്ഞ ചിത്രത്തില്‍ സമ്പന്ന കുടുംബത്തിലെ ഇളയമകനും എന്‍ജിനീയറിങ്ങ് പാതിവഴിയില്‍ ഉപേക്ഷിച്ചയാളുമായി ജോജി എന്ന കഥാപാത്രത്തെയായിരുന്നനു ഫഹദ് അവതരിപ്പിച്ചത്.

ഫഹദിന്റെ പ്രകടനം കൊണ്ട് ഏറെ ശ്രദ്ധിക്കപ്പെട്ട ചിത്രമായിരുന്നു മാലിക്. അന്‍പത്തിയഞ്ചുകാരന്‍ സുലൈമാന്‍ മാലിക് ആയിട്ടാണ് ചിത്രത്തില്‍ ഫഹദ് എത്തിയത്. ഇരുപത് വയസ്സുമുതല്‍ 55 വയസ്സുവരെയുള്ള സുലൈമാന്റെയും അയാളുടെ തുറയുടെയും ജീവിതം പറഞ്ഞ ചിത്രം ഫഹദ് ഫാസിലിന്റെ കരിയറിലെ ഏറ്റവും മുതല്‍മുടക്കുള്ള ചിത്രം കൂടിയാണിത്.