തമിഴ് പേസിയപ്പോള്‍ സൂപ്പർ ഹിറ്റടിച്ച മലയാള ചിത്രങ്ങള്‍; ഹിറ്റായ റീമേക്കുകള്‍

2019ലായിരുന്നു അന്ന ബെന്‍ പ്രധാന കഥാപാത്രമായി എത്തിയ ഹെലന്‍ തിയേറ്ററുകളിലെത്തിയത്. മികച്ച അഭിപ്രായം നേടിയ ചിത്രം അന്‍പിര്‍ക്കിനിയാള്‍ എന്ന പേരില്‍ തമിഴിലേക്ക് റീമേക്ക് ചെയ്തിരുന്നു. അരുണ്‍ പാണ്ഡ്യനും കീര്‍ത്തി പാണ്ഡ്യനുമായിരുന്നു തമിഴ് റീമേക്കില്‍ പ്രധാന താരങ്ങളായി എത്തിയത്. മലയാളത്തിലും തമിഴിലും നോബിള്‍ തന്നെയായിരുന്നു അസര്‍ എന്ന കഥാപാത്രത്തെ അവതരിപ്പിച്ചത്.  

യുവതാരങ്ങളെ അണിനിരത്തി അഞ്ജലി മേനോന്‍ സംവിധാനം ചെയ്ത ബാംഗ്ലൂര്‍ ഡെയ്‌സ് ഇന്നും മലയാളികളുടെ പ്രിയപ്പെട്ട ചിത്രങ്ങളിലൊന്നാണ്. ബോക്‌സോഫീസ് കളക്ഷന്‍ റെക്കോര്‍ഡുകള്‍ തകര്‍ത്ത ചിത്രത്തിലെ ഗാനങ്ങളും സൂപ്പര്‍ഹിറ്റായി മാറിയിരുന്നു. മലയാളത്തിന് പുറമെ തെന്നിന്ത്യന്‍ സിനിമയിലും ചിത്രം ശ്രദ്ധിക്കപ്പെട്ടതോടെ ബാംഗ്ലൂര്‍ ഡെയ്‌സിന് തമിഴ് റീമേക്കും വന്നിരുന്നു. ബാംഗ്ലൂര്‍ നാട്ട്കള്‍ എന്ന റീമേക്കില്‍ ആര്യ, ബോബി സിംഹ, ശ്രീ ദിവ്യ, റാണ ദഗ്ഗുബാട്ടി എന്നിവരായിരുന്നു പ്രധാന കഥാപാത്രങ്ങളായി എത്തിയത്‌.  

 ഹിന്ദി, തമിഴ്, സിംഹള, ചൈനീസ്, കന്നഡ തുടങ്ങി ഏഴു ഭാഷകളില്‍ റീമേക്ക് ചെയ്ത മലയാള ചിത്രമാണ് ദൃശ്യം. മോഹന്‍ലാലിന്റെ എക്കാലത്തെയും സൂപ്പര്‍ഹിറ്റായ ചിത്രം പാപനാശം എന്ന പേരിലാണ് തമിഴില്‍ റീമേക്ക് ചെയ്തത്. 2015ല്‍ പുറത്തിറങ്ങിയ ചിത്രത്തില്‍ കമല്‍ഹാസന്‍, ഗൗതമി, നിവേദ തോമസ്, എസ്തര്‍ അനില്‍, ആശ ശരത് എന്നിവരായിരുന്നു പ്രധാന കഥാാപാത്രങ്ങളെ അവതരിപ്പിച്ചത്.  

മലയാളത്തില്‍ ഏറെ ശ്രദ്ധിക്കപ്പെട്ട ചിത്രമായിരുന്നു സൗബിന്‍ ഷാഹിര്‍, സുരാജ് വെഞ്ഞാറമൂട് എന്നിവര്‍ പ്രധാന കഥാപാത്രങ്ങളായി എത്തിയ ആന്‍ഡ്രായ്ഡ് കുഞ്ഞപ്പന്‍. സംസ്ഥാന പുരസ്‌ക്കാരങ്ങളടക്കം സ്വന്തമാക്കിയ ചിത്രം ഗൂഗിള്‍ കുട്ടപ്പ എന്ന പേരിലാണ് തമിഴില്‍ റീമേക്ക് ചെയ്തത്. സംവിധായകന്‍ കെ.എസ് രവികുമാര്‍, ദര്‍ഷന്‍, യോഗി ബാബു എന്നിവരായിരുന്നു തമിഴ് റീമേക്കില്‍ പ്രധാന താരങ്ങളായി എത്തിയത്.

2015ല്‍ പുറത്തിറങ്ങിയ ഭാസ്‌കര്‍ ദി റാസ്‌കലിന്റെ തമിഴ് റീമേക്കാണ് ഭാസ്‌കര്‍ ഒരു റാസ്‌കല്‍. അരവിന്ദ് സ്വാമി, അമല പോള്‍, മാസ്റ്റര്‍ രാഘവന്‍, ബേബി നൈനിക എന്നിവരായിരുന്നു തമിഴ് റീമേക്കിലെ പ്രധാന താരങ്ങള്‍. മലയാളത്തില്‍ മമ്മൂട്ടി, നയന്‍താര, ജനാര്‍ദ്ദനന്‍ എന്നിവരായിരുന്നു പ്രധാന താരങ്ങളായി എത്തിയത്.  

മലയാളത്തില്‍ ഏറെ ശ്രദ്ധിക്കപ്പെട്ട ചിത്രമായിരുന്നു ജിയോ ബോബിയുടെ സംവിധാനത്തില്‍ പുറത്തിറങ്ങിയ ദി ഗ്രേറ്റ് ഇന്ത്യന്‍ കിച്ചന്‍. 2021ല്‍ ഒടിടി റിലീസായി എത്തിയ ചിത്രത്തിന് മികച്ച പ്രതികരണമായിരുന്നു പ്രേക്ഷകരുടെ ഭാഗത്ത് നിന്നും ലഭിച്ചത്. സുരാജ് വെഞ്ഞാറമൂടും നിമിഷ സജയനും പ്രധാന താരങ്ങളായി എത്തിയ ചിത്രത്തിന്റെ തമിഴ് റീമേക്കില്‍ ഐശ്വര്യ രാജേഷും രാഹുല്‍ രവീന്ദ്രനുമായിരുന്നു പ്രധാന താരങ്ങള്‍.