അഭിനയിച്ച് ഗിന്നസിലെത്തിയവർ; ഗിന്നസ് റെക്കോർഡ് നേടിയ മലയാള താരങ്ങള്‍

മൂന്ന് തവണ ഗിന്നസ് റെക്കോര്‍ഡ് സ്വന്തമാക്കിയ താരമാണ് മോഹന്‍ലാല്‍. താരം നേതൃത്വം നല്‍കുന്ന ലാല്‍ കെയര്‍സ് എന്ന ആരാധകരുടെ ചാരിറ്റി സംഘടന ലോകത്തെ ഏറ്റവും വലിയ ചാരിറ്റി ബോക്‌സ് നിര്‍മ്മിച്ചപ്പോഴാണ് ആദ്യമായി ലാലിന് ഗിന്നസ് റെക്കോര്‍ഡ് ലഭിച്ചത്. പുലിമുരുകന്റെ ത്രീഡി വേര്‍ഷന്‍ ലോകത്ത് ഏറ്റവും കൂടുതല്‍ ആളുകള്‍ കണ്ടപ്പോഴും ലാലിന് ഗിന്നസ് റെക്കോര്‍ഡ് ലഭിച്ചിരുന്നു. ഏറ്റവുമൊടുവിലായി സംവിധായകന്‍ ബ്ലസി സംവിധാനം ചെയ്ത 100 ഇയേഴ്‌സ് ഓഫ് ക്രിസ്റ്റോസ്റ്റം എന്ന ഡോക്യുമെന്ററിക്ക് ശബ്ദം നല്‍കിയപ്പോഴായിരുന്നു മോഹന്‍ലാലിന് മൂന്നാമത് ഗിന്നസ് റെക്കോര്‍ഡ് ലഭിച്ചത്.

ഏറ്റവും ദൈര്‍ഘ്യമേറിയ റേഡിയോ ഡിജെ മാരത്തണ്‍ അവതരിപ്പിച്ചതിനായിരുന്നു നടനും അവതാരകനുമായ മിഥുന്‍ രമേഷിന് ഗിന്നഡ് റെക്കോര്‍ഡ് ലഭിച്ചത്. സിന്ധു വി.ജെ എന്ന റേഡിയോ ജോക്കിക്കൊപ്പമായിരുന്നു മിഥുന്‍ ദൈര്‍ഘ്യമേറിയ റേഡിയോ പരിപാടി അവതരിപ്പിച്ചത്.  

രണ്ട് ഗിന്നസ് റെക്കോര്‍ഡുകള്‍ സ്വന്തമാക്കിയ നടനാണ് മലയാളത്തിന്റെ പ്രിയതാരം ഗിന്നസ് പക്രു(അജയകുമാര്‍). അത്ഭുതദ്വീപ് എന്ന ചിത്രത്തില്‍ പ്രധാന വേഷം ചെയ്ത പക്രുവിന് ഒരു മുഴു നീള ചിത്രത്തില്‍ പ്രധാന വേഷം ചെയ്ത ഏറ്റവും ഉയരം കുറഞ്ഞ നടന്‍ എന്ന ഗിന്നസ് റെക്കോര്‍ഡ് ആണ് ആദ്യം ലഭിച്ചത്. തുടര്‍ന്ന് 2013ല്‍ കുട്ടീം കോലും എന്ന ചിത്രം സംവിധാനം ചെയ്തതിലൂടെ പൊക്കം കുറഞ്ഞ സംവിധായകനെന്ന ഗിന്നസ് റെക്കോര്‍ഡും താരം സ്വന്തമാക്കി.  

ഗിന്നസ് റെക്കോര്‍ഡ് സ്വന്തമാക്കിയ മറ്റൊരു നടനാണ് മലയാളികളുടെ പ്രിയപ്പെട്ട ജഗതി ശ്രീകുമാര്‍. 1500ലധികം ചിത്രങ്ങളില്‍ അഭിനയിച്ച ജഗതിക്ക് ഏറ്റവും കൂടുതല്‍ ചിത്രങ്ങളില്‍ അഭിനയിച്ചതിനാണ് ഗിന്നസ് റെക്കോര്‍ഡ് ലഭിച്ചത്.  

ഗിന്നസ് റെക്കോര്‍ഡ് ലഭിച്ച മറ്റൊരു താരമാണ് നടി ഷീല. ഒരു നായകനൊപ്പം തന്നെ ഏറ്റവും കൂടുതല്‍ ചിത്രത്തില്‍ നായികയായി അഭിനയിച്ചതിനുള്ള ഗിന്നസ് റെക്കോര്‍ഡാണ് ഷീലയ്ക്ക് ലഭിച്ചത്. പ്രേം നസീറിന്റെ നായികയായി 107 ചിത്രങ്ങളിലാണ് ഷീല അഭിനയിച്ചത്.