മീശ പിരിച്ച്, മുണ്ടു മടക്കി ജനഹൃദയങ്ങളിലേക്ക്! മലയാളിക്ക് മറക്കാനാകുമോ ഈ മോഹന്‍ലാല്‍ കഥാപാത്രങ്ങളെ ?

മോഹന്‍ലാല്‍ എന്നാല്‍ അന്നും ഇന്നും മലയാളികള്‍ക്ക് മംഗലശ്ശേരി നീലകണ്ഠനാണ്. മോഹന്‍ലാലിന് പകരം നീലകണ്ഠനായി ഇനിയൊരു താരത്തെയും മലയാളികള്‍ക്ക് സങ്കല്‍പ്പിക്കാന്‍ പോലുമാവില്ല. താന്തോന്നിയായ മംഗലശ്ശേരി നീലകണ്ഠനായി മോഹന്‍ലാല്‍ ദേവാസുരത്തില്‍ ജീവിക്കുകയായിരുന്നു എന്നു തന്നെ പറയേണ്ടി വരും. വിഷു റിലീസായി 1993ല്‍ പുറത്തിറങ്ങിയ ചിത്രം തുടര്‍ച്ചയായി 200 ദിവസം തിയേറ്ററുകളില്‍ പ്രദര്‍ശിപ്പിച്ചിരുന്നു.  

കണിമംഗലം ജഗന്നാഥന്‍! മംഗലശ്ശേരി നീലകണ്ഠനെപ്പോലെ പകരം വെക്കാനാവാത്ത മറ്റൊരു മോഹഹന്‍ലാല്‍ കഥാപാത്രം. കണിമംഗലം കോവിലകവും ജഗന്നാഥ തമ്പുരാനും മഞ്ജു വാര്യരുടെ ഉണ്ണിമായയും വര്‍ഷങ്ങള്‍ കഴിഞ്ഞാലും മലയാളികളുടെ മനസില്‍ തന്നെയുണ്ടാവും.

പാട്ടുകള്‍ കൊണ്ടും മോഹന്‍ലാലിന്റെ വേറിട്ട അഭിനയം കൊണ്ടും പ്രേക്ഷക മനസില്‍ ഇടം നേടിയ മറ്റൊരു മോഹന്‍ലാല്‍ ചിത്രമായിരുന്നു ചന്ദ്രോത്സവം. എന്നാല്‍ വിഷു റിലീസായി എത്തിയ ചിത്രം തിയേറ്ററുകളില്‍ പരാജയമായിരുന്നു. പിന്നീട് ടെലിവിഷനില്‍ വന്നതോടെയായിരുന്നു ചിറക്കല്‍ ശ്രീഹരിയും ശ്രീഹരിയുടെ പ്രണയത്തെയും പ്രേക്ഷകര്‍ ഇരുകൈയും നീട്ടി സ്വീകരിച്ചത്. ചിത്രത്തിലെ ഗാനങ്ങള്‍ക്കും ഇന്ന് ആരാധകര്‍ ഏറെയാണ്.  

മംഗലശ്ശേരി നീലകണ്ഠനും മംഗലശ്ശേരി കാര്‍ത്തികേയനും! മോഹന്‍ലാലിന്റെ എക്കാലത്തെയും മികച്ച കഥാപാത്രങ്ങള്‍. 2001ല്‍ തിയേറ്ററുകളില്‍ തരംഗം തീര്‍ത്ത മംഗലശ്ശേരിയിലെ അച്ഛനും മകനും വര്‍ഷങ്ങള്‍ക്കിപ്പുറവും മലയാളി മനസുകളില്‍ തന്നെയുണ്ട്. മീശ പിരിച്ച്, നടു റോഡില്‍ എസ്.പിയെ തല്ലിച്ചതച്ച മംഗലശ്ശേരി കാര്‍ത്തികേയന്‍  ഇന്നും പ്രേക്ഷകര്‍ക്കിടയില്‍ ഹിറ്റാണ്. കഥാപാത്രങ്ങളുടെ പേരിലെ വ്യത്യസ്ത കൊണ്ടും ഏറെ ശ്രദ്ധിക്കപ്പെട്ട ചിത്ര കൂടിയാണ് രാവണപ്രഭു. അതുകൊണ്ടു തന്നെയാവാണം നെഗറ്റീവ് റോളിലെത്തിയ നെപ്പോളിയന്റെ മുണ്ടക്കല്‍ ശേഖരനെയും മലയാളികള്‍ ഹൃദയത്തോട് ചേര്‍ത്തു വച്ചത്.  

പൂവള്ളി ഇന്ദുചൂടന്‍! പ്രേക്ഷകരെ ഹരം കൊള്ളിച്ച എക്കാലത്തെയും മികച്ച മോഹന്‍ലാല്‍ കഥാപാത്രങ്ങളിലൊന്ന്. ഷാജി കൈലാസിന്റെ സംവിധാനത്തില്‍ 2000ത്തില്‍ പുറത്തിറങ്ങിയ ചിത്രത്തിലെ മോഹന്‍ലാലിന്റെ ഡയലോഗുകള്‍ വരെ പ്രേക്ഷകര്‍ക്ക് ഇന്നും കാണാപ്പാഠമാണ്. ''നീ പോടാ ദിനേശാ''യെന്ന് അത്രത്തോളം ആവേശത്തോടെയാണ് മലയാളികള്‍ ഇന്നും ഏറ്റു പറയുന്നത്.

ആടുതോമ! മലയാളി എവിടെയുണ്ടോ അവിടെയൊക്കെ ആടുതോമയും അവന്റെ ചെകുത്താന്‍ ലോറിയും ഇന്നും ചര്‍ച്ചയാണ്. മോഹന്‍ലാലിന്റെ കരിയറിലെ തന്നെ എക്കാലത്തെയും മികച്ച കഥാപാത്രങ്ങളിലൊന്നു കൂടിയാണ് സ്ഫടികത്തിലെ ആടുതോമ. അതുകൊണ്ടു തന്നെയാണ് 1995ല്‍ തിയേറ്ററുകളിലെത്തിയ ചിത്രം 2023ല്‍ റീ റിലീസ് ചെയ്തപ്പോള്‍ മലയാളികള്‍ ഒന്നടങ്കം അത്രത്തോളം ആഘോഷമാക്കി തീര്‍ത്തത്.