വിട്ടുകൊടുക്കാതെ മോഹന്‍ലാലും മമ്മൂട്ടിയും, പിന്നിലായി പൃഥ്വിരാജ്; 2022ല്‍ കോടികള്‍ പ്രതിഫലം വാങ്ങിയ താരങ്ങള്‍

2022ലെ റിപ്പോര്‍ട്ടുകള്‍ പ്രകാരം നിലവില്‍ മലയാള സിനിമയില്‍ ഏറ്റവും കൂടുതല്‍ പ്രതിഫലം വാങ്ങുന്ന താരമാണ് മോഹന്‍ലാല്‍. ലൂസിഫറിന്റെ വിജയത്തിനു പിന്നാലെയാണ് താരം പ്രതിഫലം ഉയര്‍ത്തിയത്. 8 കോടി മുതല്‍ 20 കോടി വരെയാണ് ഒരു ചിത്രത്തിനായി മോഹന്‍ലാല്‍ വാങ്ങിക്കുന്ന പ്രതിഫലം.

പ്രതിഫലത്തിന്റെ കാര്യത്തില്‍ നിലവില്‍ രണ്ടാം സ്ഥാനത്താണ് മെഗാസ്റ്റാര്‍ മമ്മൂട്ടി. 4 കോടി മുതല്‍ 15 കോടി വരെയാണ് താരത്തിന്റെ പ്രതിഫലം. അമല്‍ നീരദ് ചിത്രം ഭീഷ്മ പര്‍വ്വത്തിന്റെ വിജയത്തിനു പിന്നാലെയാണ് മെഗാസ്റ്റാര്‍ പ്രതിഫലം കുത്തനെ ഉയര്‍ത്തിയത്‌.

മോഹന്‍ലാലിനും മമ്മൂട്ടിക്കും പിന്നാലെയായി പൃഥ്വിരാജ് സുകുമാരനാണ് യുവ നായക നിരയില്‍ നിലവില്‍ ഏറ്റവും കൂടുതല്‍ പ്രതിഫലം വാങ്ങിക്കുന്നത്. 3 കോടി മുതല്‍ 10 കോടി വരെയാണ് താരത്തിന്റെ 2022ലെ പ്രതിഫലം. ആടുജീവിതം, കാളിയാന്‍, ബിലായത്ത് ബുദ്ധ തുടങ്ങി നിരവധി ചിത്രങ്ങളാണ് പൃഥ്വിയുടേതായി അണിയറയില്‍ ഒരുങ്ങുന്നത്‌.

റിപ്പോര്‍ട്ടുകള്‍ പ്രകാരം 3 കോടി മുതല്‍ 8 കോടി വരെയാണ് 2022ല്‍ ദുല്‍ഖര്‍ സല്‍മാന്‍ വാങ്ങിയ പ്രതിഫലം. തെലുങ്ക് ചിത്രം സീതാരാമം ആണ് ദുല്‍ഖറിന്റെ ഏറ്റവും ഒടുവിലായി പുറത്തിറങ്ങിയ ചിത്രം. ആദ്യദിനം മുതല്‍ മികച്ച പ്രതികരണം ലഭിച്ച ചിത്രം ദുല്‍ഖറിന്റെ കരിയറിലെ മികച്ച സിനിമകളിലൊന്നു കൂടിയാണ്.

വേറിട്ട കഥാപാത്രങ്ങളിലൂടെ എന്നും പ്രേക്ഷകരെ അമ്പരിപ്പിക്കുന്ന താരമാണ് ഫഹദ് ഫാസില്‍.  മലയാളത്തിനു പുറമെ മറ്റു ഭാഷകളിലും തന്റെ സ്ഥാനമുറപ്പിച്ച താരം ഒരു ചിത്രത്തിനായി 3.5 കോടി മുതല്‍ 6 കോടി വരെയാണ് വാങ്ങിക്കുന്ന പ്രതിഫലം.

3 കോടി മുതല്‍ 6 കോടി വരെയാണ് നിവിന്‍ പോളി നിലവില്‍ ഒരു ചിത്രത്തിനായി വാങ്ങിക്കുന്ന പ്രതിഫലം. റോഷന്‍ ആന്‍ഡ്രൂസ് സംവിധാനം ചെയ്ത സാറ്റര്‍ഡേ നൈറ്റ് ആണ് ഏറ്റവു ഒടുവിലായി റിലീസായ നിവിന്‍ പോളി ചിത്രം. വന്‍ ഹൈപ്പില്‍ എത്തിയ ചിത്രത്തിന് പക്ഷേ സമ്മിശ്ര പ്രതികരണമാണ് പ്രേക്ഷകരുടെ ഭാഗത്തുനിന്നും ലഭിച്ചത്.

ജനപ്രിയ നായകന്‍ ദിലീപും പ്രതിഫലത്തിന്റെ കാര്യത്തില്‍ ഒട്ടും പിന്നിലല്ല. 3 കോടി മുതല്‍ 5 കോടി വരെയാണ് താരത്തിന്റെ 2022ലെ പ്രതിഫലം. വോയിസ് ഓഫ് സത്യനാഥന്‍, ബാന്ദ്ര എന്നിവയാണ് ദിലീപിന്റെതായി ഇനി പുറത്തിറങ്ങാനുള്ള പ്രധാന ചിത്രങ്ങള്‍.

2 കോടി മുതല്‍ 3 കോടി വരെയാണ് സുരേഷ് ഗോപിയുടെ 2022ലെ പ്രതിഫലം. ജിബു ജേക്കബ് സംവിധാനം ചെയ്ത മേം ഹൂം മൂസയാണ് താരത്തിന്റെ ഏറ്റവും ഒടുവിലായി പുറത്തിറങ്ങിയ ചിത്രം. ചിത്രത്തിന് സമ്മിശ്ര പ്രതികരണമാണ് പ്രേക്ഷകരുടെ ഭാഗത്ത് നിന്നും ലഭിച്ചത്‌.

യുവതാരം ടൊവീനോയും 2022ല്‍ പ്രതിഫലം ഉയര്‍ത്തിയിരിക്കുകയാണ്. മിന്നല്‍ മുരളിയുടെ സൂപ്പര്‍ഹിറ്റ് വിജയത്തോടെയാണ് താരം പ്രതിഫലം ഉയര്‍ത്തിയത്. നിലവില്‍ 1.5 കോടി മുതല്‍ 3 കോടി വരെയാണ് ടൊവീനോ വാങ്ങിക്കുന്ന പ്രതിഫലം.

1.5 മുതല്‍ 3 കോടി വരെയാണ് കുഞ്ചാക്കോ ബോബന്‍ 2022ല്‍ ഒരു ചിത്രത്തിനായി വാങ്ങിയ പ്രതിഫലം.  ചാവേര്‍, എന്താടാ  സജി, അറിയിപ്പ് തുടങ്ങി നിരവധി ചിത്രങ്ങളാണ് കുഞ്ചാക്കോ ബോബന്റെതായി അണിയറയില്‍ ഒരുങ്ങുന്ന ചിത്രം.