രോമാഞ്ചം മാത്രമല്ല, 2023 ലെ ഹിറ്റുകള്‍ വേറേയുമുണ്ട്; ഈ വർഷത്തെ കണ്ടിരിക്കേണ്ട സിനിമകള്‍

അതിഗംഭീര പ്രകടനത്തിലൂടെ 2023ന്റെ തുടക്കത്തില്‍ തന്നെ മമ്മൂട്ടി ഞെട്ടിച്ച ചിത്രമാണ് നന്‍പകല്‍ നേരത്ത് മയക്കം. ലിജോ ജോസ് പെല്ലിശ്ശേരി-മമ്മൂട്ടി കൂട്ടുക്കെട്ടിലെത്തിയ ചിത്രം പ്രഖ്യാപന സമയത്ത് തന്നെ വാര്‍ത്തകളില്‍ ഇടം പിടിച്ചിരുന്നു. വേളാങ്കണ്ണി തീര്‍ത്ഥാടനം കഴിഞ്ഞ് വരുന്ന ഒരു പ്രൊഫഷണല്‍ നാടകസംഘത്തിന്റെ ദൃശ്യങ്ങളില്‍ നിന്നുമാണ് സിനിമയുടെ തുടക്കം. ജെയിംസ്, സുന്ദരം എന്നിങ്ങനെ രണ്ട് കഥാപാത്രങ്ങളെയാണ് മമ്മൂട്ടി അവതരിപ്പിക്കുന്നത്.

2023ന്റെ ആദ്യ പകുതി പിന്നിടുമ്പോള്‍ മികച്ച നിരൂപക പ്രശംസ ലഭിച്ച ചിത്രമാണ് തങ്കം. ബിജു മേനോനും വിനീത് ശ്രീനിവാസനും മത്സരിച്ചഭിനയിച്ച ചിത്രം സമീപകാലത്തെ മികച്ച ത്രില്ലറുകളിലൊന്നു കൂടിയാണ്. സഹീദ് അറാഫത്ത് സംവിധാനം ചെയ്ത ചിത്രം സ്വര്‍ണ ഏജന്റുമാരായ മുത്ത്, കണ്ണന്‍ എന്നിവരുടെ ജീവിതത്തിലെ അപ്രതീക്ഷിതമായ സംഭവങ്ങളിലൂടെയാണ് കഥ പറയുന്നത്.  

മൗത്ത് പബ്ലിസിറ്റിയിലൂടെ 2023സെ ബോക്‌സോഫീസ് ഹിറ്റായി മാറിയിരിക്കുകയാണ് രോമാഞ്ചം. ഗാനങ്ങളും ഡയലോഗുകളും ഒരുപോലെ ഹിറ്റായ ചിത്രം കേരള ബോക്‌സോഫീസില്‍ നിന്നും മാത്രം 70 കോടിയാണ് കളക്ഷന്‍ നേടിയത്.    

നിവിന്‍ പോളിയെ നായകനാക്കി രാജീവ് രവി സംവിധാനം ചെയ്ത ചിത്രമാണ് തുറമുഖം. മട്ടാഞ്ചേരി മൊയ്തു എന്ന കഥാപാത്രത്തെയാണ് നിവിന്‍ പോളി അവതരിപ്പിക്കുന്നത്. ചിത്രത്തില്‍ വിവിധ ഗെറ്റപ്പുകളിലാണ് താരം എത്തുന്നത്. ബ്രിട്ടീഷ് ഭരണകാലത്ത് ആരംഭിച്ച് 1962 വരെ കൊച്ചിയില്‍ നിലനിന്നിരുന്ന ചാപ്പ തൊഴില്‍ സമ്പ്രദായവും, തൊഴിലാളി പ്രതിരോധങ്ങളുമാണ് ചിത്രത്തിന്റെ ഇതിവൃത്തം.

മനു തൊടുപുഴ എഴുതിയ പുരുഷ പ്രേതം എന്ന കഥയെ ആസ്പദമാക്കി കൃഷാന്ദ് സംവിധാനം ചെയ്ത ചിത്രമാണ് പുരുഷ പ്രേതം. ദര്‍ശന രാജേന്ദ്രന്‍, പ്രശാന്ത് അലക്‌സാണ്ടര്‍ എന്നിവരാണ് ചിത്രത്തിലെ പ്രധാന താരങ്ങള്‍. അജിത് ഹരിദാസ് ആണ് ചിത്രത്തിന്റെ തിരക്കഥാകൃത്ത്. ജഗദീഷ്, മാല പാര്‍വതി, ദേവകി രാജേന്ദ്രന്‍, ജെയിംസ് ഏലിയ, മനോജ് കാന തുടങ്ങിയവരാണ് മറ്റു താരങ്ങള്‍.