മറുപടി കഥ

ഫേസ് ടു ഫേസ് എന്ന ചിത്രത്തിന് ശേഷം വിഎം വിനു സംവിധാനം ചെയ്ത ചിത്രമാണ് മറുപടി. വര്‍ഷങ്ങള്‍ക്ക് മുമ്പ് നോര്‍ത്ത് ഇന്ത്യയിലെ ഒരു ജയിലില്‍ നടന്ന സംഭവത്തെ ആസ്പദമാക്കിയുള്ളതാണ് ചിത്രം. തനിയ്ക്കെതിരെയുള്ള ഒരു കേസില്‍ ആരും തുണയില്ലാതെ നീതിയ്ക്ക് വേണ്ടി പോരാടുന്ന ഒരു സ്ത്രിയുടെ കഥയാണിത്. ജൂലിയാന അഷ്റഫിന്റേതാണ് തിരക്കഥ. ഭാമയും റഹ്മാനുമാണ് ചിത്രത്തിലെ കേന്ദ്രകഥാപാത്രങ്ങളെ അവതരിപ്പിക്കുന്നത്. വേണുഗോപാലാണ് ചിത്രത്തിന്റെ ഛായാഗ്രഹണം ചെയ്തിരിക്കുന്നത്. 

 

ഭാമയുടെ ഭര്‍ത്താവ് വേഷത്തിലാണ് റഹ്മാന്‍ എത്തുന്നത്.  കൗമാരക്കാരിയുടെ അമ്മ വേഷത്തിലാണ് ഭാമ പ്രത്യക്ഷപ്പെടുന്നത്. ബബി നയന്‍താരയാണ് റഹ്മാന്റെയും ഭാമയുടെയും മകളായി എത്തുന്നത്്. ജനാര്‍ദ്ദനന്‍, ടെസ്സ, സന്തോഷ് കീഴാറ്റൂര്‍, വത്സല മേനോന്‍, ദേവന്‍, അഞ്ജലി അനീഷ്, ശ്രിന്ദ, അര്‍ജ്ജുന്‍ നന്ദകുമാര്‍, ബേബി മീനാക്ഷി എന്നിവരാണ് ചിത്രത്തിലെ മറ്റു കഥാപാത്രങ്ങള്‍. വിജയ് ചിത്രം കത്തിയില്‍ അഭിനയിച്ച ബംഗാളി നടന്‍ സുദീപ് മുഖര്‍ജിയുടെ ആദ്യ മലയാള ചിത്രം കൂടിയാണ് മറുപടി. മകളെ സംരക്ഷിക്കാനായി അമ്മ നടത്തുന്ന ത്യാഗമാണ് ചിത്രത്തിന്റെ പ്രമേയം

ഒരു പ്രത്യേക സാഹചര്യത്തില്‍ നാട്ടില്‍ നിന്ന് കൊല്‍ക്കത്തയിലേക്ക് താമസം മാറിയ ബാങ്ക് ഉദ്യോഗസ്ഥനായ എബിയുടെയും (റഹ്മാന്‍) ഭാര്യയെ സാറായുടെയും (ഭാമ) മകള്‍ റിയയുടെയും കഥയാണിത്. അവിടെ വച്ച് അവിചാരിതമായി ഇവര്‍ ഒരു പ്രശ്നത്തില്‍ അകപ്പെടുകയും തുടര്‍ സംഭവങ്ങളുമാണ് മര്‍മ്മ പ്രമേയം. നിയമവും അധികാരവും ഉപയോഗിച്ച് ഒരു കുടുംബത്തെ ചൂഷണം ചെയ്യപ്പെടുന്നതിന്റെ നേര്‍ക്കാഴ്ചയാണ് മറുപടി. അരുണും (സന്തോഷ് കീഴാറ്റൂര്‍) അഡ്വക്കേറ്റ് അഞ്ജനയും(ടെസ്സ) ഈ കുടുംബത്തോട് വളരെ അടുപ്പമുള്ള അയല്‍ക്കാരായ ദമ്പതികളായാണ് ചിത്രത്തില്‍ എത്തുന്നത്. സുദീപ് മുഖര്‍ജിക്ക് ഒരു പോലീസ് ഓഫീസര്‍ വേഷമാണ്.