സിനിമകളുടെ പ്രൈം ടൈം ; ഈ വർഷം ആമസോണ്‍ പ്രൈമിൽ റിലീസ് ചെയ്ത മികച്ച സിനിമകൾ

കൊവിഡ് പ്രതിസന്ധിക്കിടയില്‍ തരംഗമായി മാറിയ ചിത്രമായിരുന്നു മോഹന്‍ലാല്‍ - ജീത്തു ജോസഫ് കൂട്ടുക്കെട്ടില്‍ പുറത്തിറങ്ങിയ ദൃശ്യം 2. തിയറ്റര്‍ റിലീസ് മാറ്റിവെച്ച് ആമസോണ്‍ പ്രൈമിലൂടെ റിലീസ് ചെയ്ത ചിത്രം 2021ലെ മികച്ച ചിത്രങ്ങളിലൊന്നു കൂടിയാണ്.   

അവതരണത്തിലും കഥ പറയുന്ന രീതിയിലുമെല്ലാം വ്യത്യസ്തത പുലര്‍ത്തിയ ചിത്രമായിരുന്നു രോഹിത് വി എസ് സംവിധാനം ചെയ്ത കള. ടൊവീനോ തോമസ് നായകനായി എത്തിയ ചിത്രത്തിലെ ഷാജി എന്ന കഥാപാത്രം താരത്തിന്റെ മികച്ച കഥാപാത്രങ്ങളിലൊന്നു കൂടിയാണ്.   

കൊവിഡിന്റെ പശ്ചാത്തലത്തില്‍ കഥ പറഞ്ഞ ചിത്രമായിരുന്നു സാനു ജോണ്‍ വര്‍ഗീസ് സംവിധാനം ചെയ്ത ആര്‍ക്കറിയാം. ബിജു മേനോന്‍, പാര്‍വതി തിരുവോത്ത്, ഷറഫുദ്ദീന്‍ എന്നിവര്‍ പ്രധാന കഥാപാത്രങ്ങളായി എത്തിയ ചിത്രം ആദ്യം തിയറ്ററുകളിലും പിന്നീട് ആമസോണ്‍, നീസ്ട്രീം എന്നീ ഒടിടി പ്ലാറ്റ്‌ഫോമുകളിലും റിലീസ് ചെയ്യുകയായിരുന്നു.  

2021ല്‍ പ്രേക്ഷകര്‍ക്കിടയില്‍ ഏറെ ചര്‍ച്ച ചെയ്യപ്പെട്ട ചിത്രമായിരുന്നു ദിലീഷ് പോത്തന്റെ സംവിധാനത്തില്‍ പുറത്തിറങ്ങിയ ജോജി. സിനിമാറ്റിക് റിയലിസത്തിലൂടെ കഥ പറഞ്ഞ ചിത്രത്തില്‍ ഫഹദ് ഫാസില്‍, ബാബുരാജ്, ഉണ്ണിമായ പ്രസാദ്, ഷമ്മി തിലകന്‍ എന്നിവരായിരുന്നു പ്രധാന അഭിനേതാക്കള്‍.   

2021ല്‍ ഏറെ ശ്രദ്ധിക്കപ്പെട്ട മറ്റൊരു ചിത്രമായിരുന്നു അന്ന ബെന്‍ നായികയായി എത്തിയ സാറാസ്. ജൂഡ് ആന്റണി ജോസഫ് സംവിധാനം ചെയ്ത ചിത്രത്തില്‍ ബെന്നി പി നായരമ്പലം, സണ്ണി വെയിന്‍, മല്ലിക സുകുുമാരന്‍ എന്നിവരായിരുന്നു മറ്റു പ്രധാന കഥാപാത്രങ്ങളായി എത്തിയത്.   

ഫഹദ് ഫാസിലിനെ പ്രധാന കഥാപാത്രമാക്കി മഹേഷ് നാരായണന്‍ സംവിധാനം ചെയ്ത മാലിക് 2021ലെ മികച്ച ചിത്രങ്ങളിലൊന്നു കൂടിയാണ്. 2020ല്‍ ഈദ് റിലീസായി തിയറ്ററില്‍ റിലീസ് ചെയ്യാന്‍ തീരുമാനിച്ച ചിത്രം കൊവിഡ് നിയന്ത്രണങ്ങള്‍ കൂടിയതോടെ ജൂലൈ 15ന് ആമസോണ്‍ പ്രൈമിലൂടെ റിലീസ് ചെയ്യുകയായിരുന്നു.   

കൊവിഡ് കാലത്ത് മലയാളികളെ ഏറെ സന്തോഷിപ്പിച്ച ഒരു ഫീല്‍ ഗുഡ് ചിത്രമായിരുന്നു റോജിന്‍ തോമസ് സംവിധാനം ചെയ്ത ഹോം. ഇന്ദ്രന്‍സ്, ശ്രീനാഥ് ഭാസി, മഞ്ജുപിള്ള, നസ്ലിന്‍ എന്നിവര്‍ പ്രധാന കഥാപാത്രങ്ങളായി എത്തിയ ചിത്രം 2021ലെ മികച്ച ചിത്രങ്ങളിലൊന്നു കൂടിയാണ്.