ഉയരെ പറക്കും താരം; പാർവതിയുടെ ഈ അഞ്ച് സിനിമകള്‍ കാണാതെ പോകരുത്

2019ലെ മികച്ച ചിത്രങ്ങളിലൊന്നായിരുന്നു അതിജീവനത്തിന്റെ കഥ പറഞ്ഞ ഉയരെ. ആസിഡ് ആക്രമണത്തിന് ഇരയായ പല്ലവി രവീന്ദ്രന്‍ എന്ന ശക്തമായ കഥാപാത്രത്തെയാണ് പാര്‍വതി ചിത്രത്തില്‍ അവതരിപ്പിച്ചത്. യഥാര്‍ത്ഥ ജീവിതങ്ങളുടെ നേര്‍ക്കാഴ്ചയുമായി എത്തിയ ചിത്രത്തില്‍ ഗംഭീരമേക്കോവറിലാണ് പാര്‍വതി എത്തിയത്‌. ചിത്രത്തിലെ കഥാപാത്രത്തിനായി ആഗ്രയിലെ ഷീറോസ് കഫെയില്‍ എത്തി അവിടെയുള്ളവര്‍ നേരിട്ട ബുദ്ധിമുട്ടുകളും ജീവിത സാഹചര്യങ്ങളും പാര്‍വതി മനസ്സിലാക്കിയിരുന്നു. 

പ്രദര്‍ശനത്തിനെത്തി ചുരുങ്ങിയ ദിവസങ്ങള്‍ക്കുള്ളില്‍ തന്നെ ഗംഭീരവിജയം നേടിയ ചിത്രമായിരുന്നു മഹേഷ് നാരായണന്‍ സംവിധാനം ചെയ്ത ടേക്ക് ഓഫ്‌. സമീറ എന്നായിരുന്നു ചിത്രത്തില്‍ പാര്‍വതി അവതരിപ്പിച്ച കഥാപാത്രത്തിന്റെ പേര്.  മലയാള സിനിമയില്‍  ശക്തമായ സ്ത്രീകഥാപാത്രങ്ങളിലൊന്നുകൂടിയായിരുന്നു സമീറ. അത്രത്തോളം ഗംഭീര പ്രകടനമായിരുന്നു ചിത്രത്തില്‍ പാര്‍വതി കാഴ്ചവെച്ചത്.

അനശ്വര പ്രണയത്തിന്റെ കഥ പറഞ്ഞ എന്ന് നിന്റെ മൊയ്തീന്‍ കണ്ടിറങ്ങിയ ഓരോ പ്രേക്ഷനും കാഞ്ചനമാലയും മൊയ്തീനും ഒന്നിച്ചിരുന്നെങ്കില്‍ ഇന്നും ആഗ്രഹിക്കുന്നവരാണ്. ചിത്രത്തിലെ കാഞ്ചനമാലയായി പാര്‍വതിയെ അല്ലാതെ വേറൊരു നടിയെ സങ്കല്‍പ്പിക്കാന്‍ പോലും കഴിയില്ല എന്നായിരുന്നു സിനിമ കണ്ടിറങ്ങിയ പ്രേക്ഷകര്‍ പറഞ്ഞത്‌. അത്രത്തോളം മനോഹരമായിരുന്നു ആ പ്രണയചിത്രം.   

പാര്‍വതിയുടെ കരിയറിലെ സൂപ്പര്‍ഹിറ്റ് ചിത്രങ്ങളിലൊന്നാണ് ചാര്‍ലി. മാര്‍ട്ടിന്‍ പ്രക്കാട്ട് സംവിധാനം ചെയ്ത ചിത്രത്തില്‍ ദുല്‍ഖര്‍ സല്‍മാന്‍ ആയിരുന്നു മറ്റൊരു പ്രധാന കഥാപാത്രത്തെ അവതരിപ്പിച്ചത്. ടെസ എന്നായിരുന്നു പാര്‍വതിയുടെ കഥാപാത്രത്തിന്റെ പേര്. ദുല്‍ഖര്‍ സല്‍മാന്റെ കഥാപാത്രമായ ചാര്‍ലിയെ തേടി ടെസ്സയുടെ അന്വേഷണമാണ് ചിത്രം പറയുന്നത്. പ്രേക്ഷകരുടെ എക്കാലത്തെയും ഇഷ്ടചിത്രങ്ങളിലൊന്നുകൂടിയാണ് ചാര്‍ലി.  

ഫഹദ് ഫാസില്‍, ദുല്‍ഖര്‍ സല്‍മാന്‍, നസ്രിയ, പാര്‍വതി തുടങ്ങി മലയാളത്തിലെ വന്‍ താരനിര അണിനിരന്ന ചിത്രമായിരുന്നു ബാംഗ്ലൂര്‍ ഡെയ്‌സ്. അഞ്ജലി മേനോന്‍ സംവിധാനം ചെയ്ത ചിത്രത്തില്‍ സാറ എന്ന കഥാപാത്രത്തെയായിരുന്നു പാര്‍വതി അവതരിപ്പിച്ചത്. മലയാളത്തിലെ എക്കാലത്തെയും മികച്ച ചിത്രങ്ങളിലൊന്നുകൂടിയായിരുന്നു ബാംഗ്ലൂര്‍ ഡെയ്‌സ്.