വിദേശത്ത് ഹോട്ടലുകള്‍, നാട്ടില്‍ നിര്‍മാണ കമ്പനികള്‍; ബിസിനസുകാരായ നടിമാര്‍

അഭിനയത്തിനു പുറമെ ബിസിനസിലും തന്റെ കഴിവ് തെളിയിച്ച താരമാണ് അനുഷ്‌ക ശര്‍മ. 2017ലാണ് നഷ് എന്ന പേരില്‍ സ്വന്തമായി ഒരു ഫാഷന്‍ വസ്ത്ര ബ്രാന്‍ഡ് അനുഷ്‌ക ആരംഭിച്ചത്. വളരെ ചുരുങ്ങിയ നാളുകള്‍ക്കുള്ളില്‍ തന്നെ നഷ് ഫാഷന്‍ ലോകത്ത് ശ്രദ്ധിക്കപ്പെടുകയും ചെയ്തിരുന്നു. നഷിന് പുറമെ ക്ലീന്‍ സ്ലേറ്റ് ഫിലിംസ് എന്ന പേരില്‍ ഒരു നിര്‍മാണ കമ്പനിയും അനുഷ്‌ക്കയ്ക്കുണ്ട്.  

2020ലായിരുന്നു എഡ്-എ-മമ്മ എന്ന പേരില്‍ ഒരു വസ്ത്ര ബ്രാന്‍ഡ് ആലിയ ഭട്ട് ആരംഭിച്ചത്. 2 വയസ് മുതല്‍ 14 വയസ് വരെയുള്ള കുട്ടികള്‍ക്കായാണ് ബ്രാന്‍ഡ് വസ്ത്രങ്ങളൊരുക്കുന്നത്. പൂര്‍ണമായും ഇന്ത്യയില്‍ നിര്‍മ്മിക്കുന്ന വസ്ത്രങ്ങളാണ് എഡ്-എ-മമ്മയിലൂടെ കുട്ടികളിലേക്ക് എത്തുന്നത്. 350 രൂപ മുതലാണ് വസ്ത്രങ്ങളുടെ വില. 2021ല്‍ ബ്രാന്‍ഡിന്റെ ഓണ്‍ലൈന്‍ വില്‍പ്പനയും ആരംഭിച്ചിരുന്നു.  

അഭിനേത്രി എന്നതിലുപരി മികച്ച ഇന്റീരിയര്‍ ഡിസൈനര്‍ കൂടിയാണ് ട്വിങ്കിള്‍ ഖന്ന. വൈറ്റ് വിന്‍ഡോ എന്നാണ് ട്വിങ്കിളിന്റെ ഇന്റീരിയര്‍ ഡിസൈനിംഗ് സ്ഥാപനത്തിന്റെ പേര്. ഇതിലൂടെ മാസം ലക്ഷങ്ങളാണ് താരം സമ്പാദിക്കുന്നത്. കൂടാതെ പലപ്പോഴും വീടുകള്‍ വൃത്തിയാക്കി മനോഹരമായി സൂക്ഷിക്കുന്നതിന് ഇന്‍സ്റ്റാഗ്രാമില്‍ ട്വിങ്കിള്‍ ടിപ്‌സുകള്‍ നല്‍കാറുണ്ട്.  

2019ലാണ് കേ ബ്യൂട്ടി എന്ന പേരില്‍ ഒരു മേക്കപ്പ് ബ്രാന്‍ഡിന് കത്രീന കൈഫ് തുടക്കം കുറിച്ചത്. ഇന്ന് ലോകോത്തര ബ്രാന്‍ഡായി കേ ബ്യൂട്ടി മാറിക്കഴിഞ്ഞു. നൈകയുടെ പങ്കാളിത്തതോടെയാണ് കത്രീന ബ്രാന്‍ഡ് തുടങ്ങിയത്.  

അഭിനയത്തിനു പുറമെ മികച്ച ബിസിനസ് സംരഭക കൂടിയാണ് പ്രിയങ്ക ചോപ്ര. റെസ്റ്റോറന്റ്, നിര്‍മാണ കമ്പനി തുടങ്ങി നാല് ബിസിനസ് സ്ഥാപനങ്ങളാണ് പ്രിയങ്ക ചോപ്രയ്ക്ക് സ്വന്തമായുള്ളത്. സോന എന്ന പേരില്‍ ന്യൂയോര്‍ക്ക് സിറ്റിയിലാണ് പ്രിയങ്കയുടെ റെസ്‌റ്റോറന്റ് പ്രവര്‍ത്തിക്കുന്നത്. 2015ലാണ് പര്‍പ്പിള്‍ പെബിള്‍ പിക്‌ചേഴ്‌സ് എന്ന പേരില്‍ പ്രിയങ്ക ഒരു നിര്‍മാണ കമ്പനി ആരംഭിക്കുന്നത്. സോന എന്ന പേരില്‍ ഒരു ഹോംവെയര്‍ ബ്രാന്‍ഡ് കൂടെ പ്രിയങ്കയ്ക്കുണ്ട്.