മലയാള സിനിമയില്‍ കല്യാണക്കാലം ; 2020ല്‍ വിവാഹിതരായ ചലച്ചിത്ര താരങ്ങള്‍

ജനുവരി 30നായിരുന്നു മലയാളത്തിന്റെ പ്രിയനടി ഭാമയും എറണാകുളം സ്വദേശി അരുണും തമ്മിലുള്ള വിവാഹം നടന്നത്. കോട്ടയത്ത് സ്വകാര്യഹോട്ടലില്‍ നടന്ന ചടങ്ങില്‍ അടുത്ത ബന്ധുക്കളും സുഹൃത്തുക്കളും മാത്രമാണ് ഉണ്ടായിരുന്നത്‌. വിവാഹത്തിനുശേഷം കൊച്ചിയില്‍ നടന്ന റിസ്പഷ്‌നില്‍ അനു സിതാര, ശ്രീനിവാസന്‍, സലീം കുമാര്‍, റിമി ടോമി, നമിത പ്രമോദ്, ബിന്ദു പണിക്കര്‍ തുടങ്ങി നിരവധി താരങ്ങള്‍ പങ്കെടുത്തിരുന്നു.

മലയാളത്തിന്റെ പ്രിയനടനും തിരക്കഥാകൃത്തുമായ വിഷ്ണു ഉണ്ണികൃഷ്ണന്റെ വിവാഹവും 2020ന്റെ തുടക്കത്തിലായിരുന്നു. ഐശ്വര്യയാണ് വിഷ്ണുവിന്റെ വധു. വിവാഹത്തിനുശേഷം കൊച്ചിയില്‍ വച്ച് നടന്ന വിവാഹവിരുന്നില്‍ മമ്മൂട്ടി, മോഹന്‍ലാല്‍, നാദിര്‍ഷ, വിജയരാഘവന്‍, നമിത പ്രമോദ് തുടങ്ങി നിരവധി താരങ്ങള്‍ പങ്കെടുത്തിരുന്നു.   

മലയാളികളുടെ പ്രിയനടന്‍ ബാലു വര്‍ഗീസും നടിയും മോഡലുമായ എലീന കാതറിനുമായുള്ള വിവാഹം 2020 ഫെബ്രുവരി 2നായിരുന്നു. ഏറെനാളത്തെ പ്രണയത്തിനൊടുവിലായിരുന്നു ഇരുവരുടെയും വിവാഹം. കൊച്ചിയില്‍ നടന്ന റിസപ്ഷന്റെ വീഡിയോ സോഷ്യല്‍മീഡിയയില്‍ തരംഗമായിരുന്നു.  

മലയാളികളുടെ പ്രിയനടി പാര്‍വ്വതി നമ്പ്യാരുടെ വിവാഹവും ഫെബ്രുവരി 2നായിരുന്നു. വിനീത് മേനോന്‍ ആണ് പാര്‍വതിയുടെ ഭര്‍ത്താവ്. ലളിതമായി നടന്ന ചടങ്ങില്‍ അടുത്ത സുഹൃത്തുക്കളും ബന്ധുക്കളും മാത്രമാണ് പങ്കെടുത്തത്.    

പ്രേക്ഷകരുടെ പ്രിയതാരം സുഹൈദ് കുക്കുവിന്റെ വിവാഹവും ഈ വര്‍ഷമായിരുന്നു. സുഹൃത്തായ ദീപ പോളാണ് സുഹൈദിന്റെ ഭാര്യ. ഏഴുവര്‍ഷം നീണ്ട പ്രണയത്തിനൊടുവിലായിരുന്നു ഇരുവരുടെയും വിവാഹം.

പ്രേക്ഷകരുടെ പ്രിയതാരം മണികണ്ഠന്‍ ആചാരിയുടെ വിവാഹം 2020 ഏപ്രില്‍ 20നായിരുന്നു. കൊവിഡിന്റെ പശ്ചാത്തലത്തില്‍ ലളിതമായിരുന്നു വിവാഹ ചടങ്ങുകള്‍. മരട് സ്വദേശിനിയായ അഞ്ജലിയാണ് മണികണ്ഠന്റെ ഭാര്യ.

പ്രേക്ഷകരുടെ പ്രിയതാരം ഗോകുലന്റെ വിവാഹം 2020 മെയ് 28നായിരുന്നു. പെരുമ്പാവൂര്‍ അയ്മുറി സ്വദേശിനി ധന്യയാണ് ഭാര്യ. കൊവിഡിന്റെ പശ്ചാത്തലത്തില്‍ അടുത്ത ബന്ധുക്കളും സുഹൃത്തുക്കളും മാത്രമാണ് ചടങ്ങില്‍ പങ്കെടുത്തത്‌.

പ്രിയ താരം മിയ ജോര്‍ജ്ജിന്റെ വിവാഹം 2020 സെപ്തംബര്‍ 12നായിരുന്നു. മെയ് 30നായിരുന്നു ഇരുവരുടെയും വിവാഹ നിശ്ചയം. വ്യവസായിയായ ആഷ്വിന്‍ ഫിലിപ്പാണ് മിയയുടെ ഭര്‍ത്താവ്. കൊവിഡിന്റെ പശ്ചാത്തലത്തില്‍ എറണാകുളം സെയിന്റ് മേരീസ് ബസലിക്കയില്‍ നടന്ന ചടങ്ങില്‍ ഇരുവരുടെയും ബന്ധുക്കള്‍ മാത്രമായിരുന്നു പങ്കെടുത്തത്.  

മലയാളത്തിന്റെ പ്രിയതാരം മൃദുല മുരളിയുടെ വിവാഹം 2020 ഒക്ടോബര്‍ 29നായിരുന്നു. പരസ്യമേഖലയില്‍ പ്രവര്‍ത്തിക്കുന്ന നിതിന്‍ വിജയനാണ് മൃദുലയുടെ ഭര്‍ത്താവ്. കൊവിഡിന്റെ പശ്ചാത്തലത്തില്‍ വളരെ അടുത്ത സുഹൃത്തുക്കളും ബന്ധുക്കളും മാത്രമായിരുന്നു വിവാഹത്തില്‍ പങ്കെടുത്തത്.  

പ്രേക്ഷകരുടെ പ്രിയതാരം ചെമ്പന്‍ വിനോദ് ജോസിന്റെ കല്യാണവും 2020ലായിരുന്നു. കോട്ടയം സ്വദേശിയും സൈക്കോളജിസ്റ്റുമായ മറിയം തോമസാണ് ചെമ്പന്റെ ഭാര്യ. ഫേസ്ബുക്കിലൂടെയായിരുന്നു താരം വിവാഹക്കാര്യം പ്രേക്ഷകരെ അറിയിച്ചത്. അധികമാരും അറിയാതെ നടന്ന വിവാഹം ലോക്ക്ഡൗണ്‍ കാലത്ത് നടന്ന രണ്ടാമത്തെ താരവിവാഹമായിരുന്നു.