വിവാഹം തന്നെ മടുത്തു പോയി; ആദ്യ വിവാഹത്തോടെ വിവാഹം വേണ്ടെന്ന് വച്ച ടെലിവിഷന്‍ താരങ്ങള്‍

സിനിമയിലെത്തും മുമ്പ് ഇംഗ്ലീഷ് അധ്യാപികയായി ജോലി നോക്കുന്നതിനിടയിലായിരുന്നു രചന നാരായണന്‍കുട്ടിയുടെ വിവാഹം. എന്നാല്‍ വെറും പത്തൊമ്പത് ദിവസങ്ങള്‍ മാത്രമായിരുന്നു രചനയും ഭര്‍ത്താവും ദമ്പതികളായി കഴിഞ്ഞത്. 2011ല്‍ വിവാഹിതരായ ഇരുവരും 2012ല്‍ വിവാഹമോചനം നേടുകയായിരുന്നു. പിന്നീട് മഴവില്‍ മനോരമയില്‍ സംപ്രേഷണം ചെയ്ത മറിമായം എന്ന ടെലിവിഷന്‍ പരമ്പരയിലൂടെ മിനിസ്‌ക്രീനിലെത്തിയ രചന സിനിമയിലും ഒരുപോലെ സജീവമായി. എന്നാല്‍ വിവാഹമോചനത്തിനുശേഷം ഇതുവരെ മറ്റൊരു വിവാഹം രചന കഴിച്ചിട്ടില്ല.   

ഇരുപത്തി മൂന്നാമത്തെ വയസിലായിരുന്നു മീര വാസുദേവന്റെ ആദ്യ വിവാഹം. വിശാല്‍ അഗര്‍വാള്‍ എന്ന വ്യക്തിയായിരുന്നു താരത്തിന്റെ ആദ്യ ഭര്‍ത്താവ്. എന്നാല്‍ തമ്മില്‍ പ്രശ്‌നങ്ങള്‍ തുടര്‍ന്നതോടെ മൂന്ന് വര്‍ഷത്തെ ദാമ്പത്യം അവസാനിപ്പിച്ച് 2008ല്‍ ഇരുവരും പിരിഞ്ഞു. പിന്നീട് 2012ല്‍ നടന്‍ ജോണ്‍ കൊക്കനെ മീര വിവാഹം ചെയ്തു. എന്നാല്‍ ആ ബന്ധവും അധികനാള്‍ മുമ്പോട്ട് പോയില്ല. നാല് വര്‍ഷത്തിനുശേഷം 2016ല്‍ ജോണ്‍ കൊക്കനുമായുഉള്ള ദാമ്പത്യം മീര അവസാനിപ്പിച്ചു. നിലവില്‍ മറ്റൊരു വിവാഹം കഴിച്ചിട്ടില്ലാത്ത മീര ടെലിവിഷന്‍ സീരിയലുകളുമായി തിരക്കിലാണ്.  

പത്താം ക്ലാസ് കഴിഞ്ഞ ഉടനെ തന്നെയായിരുന്നു ടെലിവിഷന്‍ പ്രേക്ഷകരുടെ പ്രിയതാരം നിഷ സാരംഗിന്റെ വിവാഹം. നിഷയുടെ അപ്പച്ചിയുടെ തന്നെ മകനായിരുന്നു ഭര്‍ത്താവ്. എന്നാല്‍ വിവാഹം കഴിഞ്ഞ് മാസങ്ങള്‍ക്കുള്ളില്‍ തന്നെ തമ്മില്‍ പ്രശ്‌നങ്ങള്‍ ആരംഭിച്ചതോടെ താരം വിവാഹമോചിതയാവുകയായിരുന്നു. ആദ്യ വിവാഹത്തില്‍ രണ്ട് പെണ്‍കുട്ടികളാണ് നിഷയ്ക്കുള്ളത്. ടെലിവിഷനില്‍ ശ്രദ്ധിക്കപ്പെട്ടതോടെ നിഷ വീണ്ടും വിവാഹിതയാവുന്നു എന്ന തരത്തില്‍ നിരവധി ഗോസിപ്പുകള്‍ വന്നിരുന്നു. എന്നാല്‍ രണ്ടാമതൊരു വിവാഹത്തിന് താല്‍പര്യമില്ലെന്നായിരുന്നു ഗോസിപ്പുകള്‍ക്കുള്ള മറുപടിയായി നിഷ പറഞ്ഞത്.  

2014ലായിരുന്നു വിപിന്‍ സുധാകര്‍ എന്ന വ്യക്തിയുമായുള്ള സുരഭി ലക്ഷ്മിയുടെ വിവാഹം. എന്നാല്‍ ദാമ്പത്യത്തില്‍ പൊരുത്തക്കേടുകള്‍ തുടര്‍ന്നതോടെ ഇരുവരും 2017ല്‍ വിവാഹമോചിതരായി. സുരഭി തന്നെയായിരുന്നു വിവാഹമോചിതയായ കാര്യം സമൂഹ മാധ്യമങ്ങളിലൂടെ പ്രേക്ഷകരെ അറിയിച്ചത്. നിലവില്‍ സിനിമകളുമായി തിരക്കിലാണ് സുരഭി ലക്ഷ്മി.  

സീരിയല്‍ താരം ഡിംപിള്‍ റോസിന്റെ സഹോദരന്‍ ഡോണ്‍ ടോണിയുമായി 2017ലായിരുന്നു മേഘ്‌നയുടെ വിവാഹം. എന്നാല്‍ വിവാഹം കഴിഞ്ഞ് ഒരു വര്‍ഷത്തിനുള്ളില്‍ തന്നെ ഇരുവരും അകന്ന് കഴിയുകയായിരുന്നു. തുടര്‍ന്ന് 2019ല്‍ വിവാഹമോചനം നേടിയ മേഘ്‌ന മിനിസ്‌ക്രീനിലേക്ക് ഗംഭീര തിരിച്ചുവരവ് നടത്തുകയും ചെയ്തിരുന്നു. നിലവില്‍ സീരിയലുകളും യുട്യൂബ് ചാനലുമായി തിരക്കിലാണ് താരം.