ഈ സിനിമകള്‍ കാണരുത്; നിങ്ങള്‍ കരയും

ബ്ലെസിയുടെ സംവിധാനത്തില്‍ 2005ല്‍ പുറത്തിറങ്ങിയ ചിത്രമായിരുന്നു തന്മാത്ര. മോഹന്‍ലാല്‍, മീര വാസുദേവ്, ജഗതി ശ്രീകുമാര്‍, അര്‍ജ്ജുന്‍ ലാല്‍ എന്നിവരായിരുന്നു ചിത്രത്തിലെ പ്രധാന അഭിനേതാക്കള്‍. അല്‍ഷിമേഴ്‌സ് എന്ന രോഗവും അതിന്റെ ഭീകരതയും അവതരിപ്പിച്ച ചിത്രം മോഹന്‍ലാലിന്റെ മികച്ച ചിത്രങ്ങളിലൊന്നു കൂടിയാണ്.  മികച്ച ചിത്രം, മികച്ച സംവിധായകൻ, മികച്ച നടൻ, മികച്ച തിരക്കഥ തുടങ്ങി 5 സംസ്ഥാന ചലച്ചിത്ര പുരസ്‌ക്കാരങ്ങള്‍ ചിത്രം നേടിയിരുന്നു. 

തന്മാത്ര എന്ന ഹിറ്റ് ചിത്രത്തിന് ശേഷം ലാലേട്ടന്‍-ബ്ലെസി കൂട്ടുകെട്ടില്‍ പുറത്തിറങ്ങിയ ചിത്രമായിരുന്നു ഭ്രമരം. ഭാര്യയെയും മകളെയും നഷ്ടപ്പെട്ട ശിവന്‍ കുട്ടി എന്ന കഥാപാത്രം അതിന് കാരണക്കാരായവരുടെ അടുത്ത് പ്രതികാരം ചെയ്യാന്‍ പോകുന്നതാണ് ചിത്രത്തിന്റെ കഥ. ശിവന്‍കുട്ടി എന്ന കഥാപാത്രത്തിലൂടെ മോഹന്‍ലാല്‍ എന്ന നടന്‍ പ്രേക്ഷകരെ വീണ്ടും ഞെട്ടിക്കുകയായിരുന്നു ചിത്രത്തിലൂടെ. കേരള സംസ്ഥാന ചലച്ചിത്ര പുരസ്‌ക്കാരം, സംസ്ഥാന ഫിലിം ക്രിട്ടിക്‌സ് അവാര്‍ഡ് തുടങ്ങി നിരവധി പുരസ്‌ക്കാരങ്ങളും ചിത്രം നേടിയിരുന്നു.

പ്രിയദർശൻ സംവിധാനം ചെയ്ത് 1988-ൽ പുറത്തിറങ്ങിയ ഒരു മലയാള ചലച്ചിത്രമാണ്‌ ചിത്രം. മോഹൻലാൽ, രഞ്ജിനി, നെടുമുടി വേണു, പൂർണ്ണം വിശ്വനാഥൻ തുടങ്ങിയവരാണ് പ്രധാന വേഷങ്ങളിൽ അഭിനയിച്ചിരിക്കുന്നത്. ശ്രീനിവാസന്റെ കഥയെ ആസ്പദമാക്കി പ്രിയദർശൻ തന്നെയാണ് ചിത്രത്തിന്റെ തിരക്കഥ രചിച്ചത്. ഹിന്ദിയിലും ഈ ചിത്രം പുനർനിർമ്മിച്ചിട്ടുണ്ട്. ചോരി ചോരി എന്ന പേരിൽ മിഥുൻ ചക്രവർത്തി നായകനായിട്ടാണ് ഈ സിനിമ ഹിന്ദിയിൽ പുനർനിർമ്മിച്ചത്. മലയാളത്തിലെ ജനപ്രീതിനേടിയ ഏറ്റവും വലിയ ഹിറ്റ് ചിത്രങ്ങളിൽ ഒന്നായി ചിത്രം കണക്കാക്കപ്പെടുന്നു.

ഡെന്നീസ് ജോസഫിന്റെ തിരക്കഥയില്‍ സിബി മലയില്‍ സംവിധാനം ചെയ്ത ചിത്രമായിരുന്നു ആകാശദൂത്. മുരളി, മാധവി, നെടുമുടി വേണു, ജഗതി ശ്രീകുമാര്‍, എന്‍ എഫ് വര്‍ഗീസ് എന്നിവരായിരുന്നു ചിത്രത്തിലെ പ്രധാന അഭിനേതാക്കള്‍. മലയാളി പ്രേക്ഷകരെ ഒന്നടങ്കം കരയിച്ച ചിത്രം1993-ലെ ഏറ്റവും മികച്ച ചലച്ചിത്രത്തിനുള്ള ദേശീയ ചലച്ചിത്ര അവാര്‍ഡ് നേടുകയും ചെയ്തിരുന്നു.

മോഹന്‍ലാല്‍ എന്ന നടന്റെ സിനിമാജീവിതത്തിലെ ഏറ്റവും മികച്ച ചിത്രങ്ങളിലൊന്നാണ് കിരീടം. സിബി മലയില്‍ സംവിധാനം ചെയ്ത ഈ ചിത്രം 250 ദിവസത്തിലധികം തിയേറ്ററുകളില്‍ പ്രദര്‍ശിപ്പിച്ചിരുന്നു.1989-ൽ ഈ സിനിമയിലെ അഭിനയത്തിന് മോഹൻലാലിന് ദേശീയ ചലച്ചിത്ര അവാർഡുകളിൽ പ്രത്യേക ജൂറി പുരസ്ക്കാരവും ലഭിച്ചിരുന്നു.

മമ്മൂട്ടിയെ നായകനാക്കി സലിം അഹമ്മദ് സംവിധാനം ചെയ്ത ചിത്രമാണ് പത്തേമാരി. പള്ളിക്കല്‍ നാരായണന്‍ എന്ന പ്രവാസിയുടെ ജീവിതത്തിലൂടെ കഥ പറഞ്ഞ ചിത്രത്തിന് പ്രേക്ഷകരുടെ ഭാഗത്തുനിന്നും മികച്ച പ്രതികരമാണ് ലഭിച്ചത്.

ഇന്നും മലയാളി പ്രേക്ഷകരുടെ കണ്ണുനനയിക്കുന്ന ചിത്രമാണ് ടി കെ രാജീവ് കുമാര്‍ സംവിധാനം ചെയ്ത പവിത്രം. കുടുംബപ്രേക്ഷകര്‍ ഇരുകൈയും നീട്ടി സ്വീകരിച്ച ചിത്രം മോഹന്‍ലാല്‍ നടന്റെ അഭിനയജീവിതത്തിലെ മികച്ച ചിത്രങ്ങളിലൊന്നുകൂടിയാണ്.

''ആനി മേനെ സ്‌നേഹിക്കുന്നതു പോലെ മാഗിയ്ക്ക് എന്നെ സ്‌നേഹിക്കാന്‍ പറ്റുമോ'' ദശരഥത്തിലെ ഈ ക്ലൈമാസ് സീനുകള്‍ ഇന്നും കണ്ണുനനയാതെ പ്രേക്ഷകര്‍ക്ക് കണ്ടു തീര്‍ക്കാന്‍ സാധിക്കില്ല. ലോഹിതദാസിന്റെ തിരക്കഥയില്‍ സിബി മലയില്‍ സംവിധാനം ചെയ്ത ദശരഥം ഇന്നും പ്രേക്ഷകരുടെ ഇഷ്ടചിത്രങ്ങളിലൊന്നാണ്.

ലോഹിതദാസിന്റെ തിരക്കഥയില്‍ സിബി മലയില്‍ സംവിധാനം ചെയ്ത ചിത്രമാണ് തനിയാവര്‍ത്തനം. മമ്മൂട്ടി,തിലകന്‍,മുകേഷ്,ബാബു നമ്പൂതിരി, ഒടുവില്‍ ഉണ്ണികൃഷ്ണന്‍,കവിയൂര്‍ പൊന്നമ്മ എന്നിവരായിരുന്നു ചിത്രത്തിലെ പ്രധാന അഭിനേതാക്കള്‍.

അന്നുവരെ മലയാള സിനിമയിലുണ്ടായിരുന്ന പല കളക്ഷൻ റെക്കോര്‍ഡുകളും ഭേദിച്ച ചിത്രമായിരുന്നു ഫാസില്‍  സംവിധാനം ചെയ്ത പപ്പയുടെ സ്വന്തം അപ്പൂസ്.മമ്മൂട്ടി, മെഗാസ്റ്റാര്‍ മമ്മൂട്ടിയും മാസ്റ്റര്‍ ബാദുഷയും തകര്‍ത്തഭിനയിച്ച   ചിത്രത്തിലെ ഗാനങ്ങളും ഏറെ ശ്രദ്ധിക്കപ്പെട്ടിരുന്നു.

വി എം വിനുവിന്റെ സംവിധാനത്തില്‍ 2003ല്‍ പുറത്തിറങ്ങിയ ചിത്രമായിരുന്നു ബാലേട്ടന്‍. മോഹൻലാൽ, നെടുമുടി വേണു, ജഗതി ശ്രീകുമാർ, ദേവയാനി, നിത്യാദാസ് തുടങ്ങിയവരായിരുന്നു ചിത്രത്തിലെ പ്രധാന അഭിനേതാക്കള്‍.

ബ്ലെസിയുടെ സംവിധാനത്തില്‍ 2004ല്‍ പുറത്തിറങ്ങിയ ചിത്രമായിരുന്നു കാഴ്ച. മലയാളത്തിലെ വാണിജ്യ സിനിമകളധികവും ജീവിത ഗന്ധിയല്ലാത്ത ഹാസ്യകഥകളുമായി പുറത്തിറങ്ങുമ്പോഴാണ് ഗുജറാത്ത് ഭൂകമ്പം ചിതറിച്ച ഒരു ബാലന്റെ കഥ ചിത്രീകരിക്കുന്ന കാഴ്ച പുറത്തിറങ്ങുന്നത്. ഒരു വൻ‌ദുരന്തം ചിലരിലേൽപ്പിക്കുന്ന പോറലുകളും അതിൽ സഹജീവികൾ നടത്തുന്ന വിവിധ രീതിയിലുള്ള ഇടപെടലുകളുമാണ് ചിത്രത്തിലൂടെ സംവിധായകന്‍ പറഞ്ഞത്‌.