ബാബു തിരുവല്ല

ജീവചരിത്രം:  ചലച്ചിത്ര സംവിധായകന്‍, നിര്‍മാതാവ്, അഭിനേതാവ്. തിരക്കഥാകൃത്ത് എന്നീ നിലകളിലെല്ലാം പ്രശസ്തനാണ് ബാബു തിരുവല്ല. സിംഫണി എന്ന ചലച്ചിത്രനിര്‍മ്മാണത്തിന്റെ ബാനറില്‍ ഒരു മിന്നാമിനുങ്ങിന്റെ നുറുങ്ങുവെട്ടം, സവിധം, സമാഗമം,കണ്ണകി, അമരം തുടങ്ങിയ നിരവധി ചലച്ചിത്രങ്ങള്‍  നിര്‍മ്മിച്ചിട്ടുണ്ട്. 2007ല്‍ പുറത്തിറങ്ങിയ 'തനിയെ' ആണ്  ആദ്യമായി സംവിധാനം  ചെയ്ത ചിത്രം. ഈ ചിത്രത്തിലൂടെ മികച്ച നവാഗത സംവിധായകനുള്ള 2007 ലെ കേരളസംസ്ഥാന ചലചിത്ര പുരസ്‌കാരം ബാബു തിരുവല്ലയ്ക്ക് ലഭിച്ചു.  ബാബു തിരുവല്ലയും നെടുമുടി വേണുവും ചേര്‍ന്നാണ് തനിയെയുടെ തിരക്കഥയെഴുതിയത്. അദ്ദേഹം തിരക്കഥയെഴുതി സംവിധാനം ചെയ്ത രണ്ടാമത്തെ ചിത്രമായ 'തനിച്ചല്ല ഞാന്‍' 2012  ലെ മികച്ച ദേശീയോദ്ഗ്രഥന ചിത്രത്തിനുള്ള നര്‍ഗീസ് ദത്ത് പുരസ്‌കാരം നേടി. 2017ല്‍ മൂന്നാമത്തെ ചിത്രമായ ക്രോസ്‌റോഡ്  സംവിധാനം ചെയ്തു. പത്തു സംവിധായകര്‍ പത്തു ചിത്രങ്ങളിലൂടെ വ്യത്യസ്തരായ പത്തു സ്ത്രീകളുടെ ജീവിതകഥ പറയുന്ന ചിത്രമാണ് ക്രോസ്‌റോഡ്.ചിതറിയവര്‍, ഒരു മിന്നാമിനുങ്ങിന്റെ നുറുങ്ങുവട്ടം, സി ഐ ഡി ഉണ്ണികൃഷ്ണന്‍ ബി എ ബി എഡ്, സവിധം, അമരം എന്നിവയാണ് അഭിനയിച്ച ചിത്രങ്ങള്‍. ഹീരയാണ് ഭാര്യ. മക്കള്‍ ലക്ഷ്മി ഫിലിപ്പ്, ലീ ഫിലിപ്പ്.