'സുധീഷ് മുണ്ടൂരിയെന്ന് പറ‍ഞ്ഞ് ഫാസിൽ സർ എല്ലാവരേയും വിളിച്ചുകൂട്ടി, പിന്നെ ജനക്കൂട്ടമായിരുന്നു'; സുധീഷ്

35 വർഷത്തെ അഭിനയ ജീവിത്തിൽ ആദ്യമായി ഒരു സംസ്ഥാന പുരസ്‌കാരം അടുത്തിടെ നേടുകയും ചെയ്തു സുധീഷ്. 51-ാമത് സംസ്ഥാന ചലച്ചിത്ര പുരസ്‌കാര പ്രഖ്യാപിച്ചപ്പോൾ മികച്ച സ്വഭാവ നടനുള്ള പുരസ്‌കാരമാണ് സുധീഷിനെ തേടിയെത്തിയത്. എന്നിവർ, ഭൂമിയിലെ മനോഹര സ്വകാര്യം എന്നീ സിനിമകളിലെ അഭിനയത്തിനാണ് സുധീഷ് അവാർഡ് ലഭിച്ചത്. സംസ്ഥന പുരസ്കാരം ലഭിച്ചപ്പോൾ കൂടുതൽ ഉത്തരവാദിത്തം വന്നപ്പോലുള്ള തോന്നലാണ് ഉണ്ടായത് എന്നാണ് പുരസ്കാരം ലഭിച്ച സന്തോഷം പങ്കുവെച്ച് സുധീഷ് പറഞ്ഞത്. ടൈപ്പ് കാസ്റ്റ് ചെയ്യപ്പെട്ടതിൽ സങ്കടം തോന്നിയിരുന്നുവെന്നും ഇപ്പോൾ അഭിനയ സാധ്യതയുള്ള നിരവധി കഥാപാത്രങ്ങൾ തേടിവരുന്നതിൽ സന്തോഷത്തിലുമാണ് സുധീഷ്. അടുത്തിടെ മിന്നൽ മുരളി എന്ന സിനിമയിൽ ​ഗസ്റ്റ് റോളിൽ സിനിമാ നടനായി തന്നെ എത്തി സുധീഷ് എല്ലാവരേയും ചിരിപ്പിച്ചിരുന്നു. ഇപ്പോൾ മനോരമയ്ക്ക് നൽകിയ അഭിമുഖത്തിൽ വിശേഷങ്ങൾ പങ്കുവെച്ചിരിക്കുകയാണ് സുധീഷ്.

'മിന്നൽ മുരളിയുടെ സംവിധായകൻ വിളിച്ച് ഇങ്ങനൊരു കഥാപാത്രം ഉണ്ട് എന്ന് പറഞ്ഞപ്പോൾ ഞാൻ ആദ്യം ധ്യാനിനെയാണ് വിളിച്ചത്. കാരണം അവന്റെ ഒരു സിനിമ കമ്മിറ്റ് ചെയ്തിട്ടുണ്ടായിരുന്നു. ആ സിനിമയുടെ ചിത്രീകരണം നടക്കാൻ പോവുകയായിരുന്നു. മിന്നൽ മുരളിയിലെ കഥാപാത്രത്തിന് താടി പാടില്ല. പക്ഷെ ധ്യാനിന്റെ സിനിമയിലെ കഥാപാത്രത്തിന് താടി വേണം. അതുകൊണ്ട് അവന്റെ അനുവാദം ചോദിച്ചിട്ട് മിന്നൽ മുരളി ചെയ്യണോ വേണ്ടയോ എന്ന് തീരുമാനിക്കാമെന്ന് കരുതി. ഞാൻ വിളിച്ചപ്പോൾ കൊവിഡ് കാരണം ഷൂട്ടിങ് തൽക്കാലം ഇപ്പോൾ തുടങ്ങുന്നില്ലെന്ന് ധ്യാൻ തീരുമാനിച്ചിരിക്കുകയായിരുന്നു. അതുകൊണ്ട് അവൻ പറ‍ഞ്ഞു താടി എടുത്തോളാൻ. അങ്ങനെയാണ് മിന്നൽ മുരളിയിലേക്ക് എത്തുന്നത്' സുധീഷ് പറഞ്ഞു. അനിയത്തി പ്രാവിലെ ഏറ്റവും ഹിറ്റായ 'വട്ടാണെ വട്ടാണെ എനിക്ക് വട്ടാണെ....' സീൻ ചിത്രീകരിച്ച സംഭവത്തെ കുറിച്ചും സുധീഷ് വെളിപ്പെടുത്തി.

Recommended Video

മമ്മൂട്ടിക്ക് കോവിഡ്, ഷൂട്ടിംഗുകൾ നിർത്തിവെച്ചു

'അനിയത്തിപ്രാവിൽ വട്ടാണെ എന്ന് പറയുന്ന സീൻ എന്നെ കുറിച്ച് പറയുമ്പോൾ എല്ലാവർക്കും ഇഷ്ടപ്പെട്ട ഒന്നാണ്. ആ രം​ഗം എടുക്കുമ്പോൾ മുണ്ട് അഴിച്ചു. അപ്പോഴേക്കും ഫാസിൽ‌ സർ എല്ലാവരോടും സുധീഷ് മുണ്ടൂരി അഭിനയം തുടങ്ങിയെന്ന് പറഞ്ഞ് എല്ലാവരേയും വിളിച്ച് കൂട്ടി. അതുകേട്ട് എല്ലാവരും വന്നു. അങ്ങനെ അവസാനം തിങ്ങി കൂടിയ ജനങ്ങൾക്കിടയിൽ നിന്നാണ് ആ രം​ഗം അഭിനയിച്ചത്' സുധീഷ് കൂട്ടിച്ചേർത്തു. സത്യം മാത്രമെ ബോധിപ്പിക്കൂ എന്ന സിനിമയാണ് സുധീഷിന്റെതായി അവസാനം റിലീസിനെത്തിയത്. ധ്യാൻ ശ്രീനിവാസൻ നായകനായ സിനിമ ഇൻവസ്റ്റി​ഗേഷൻ ത്രില്ലറാണ്.