നികിതയ്ക്ക് ആശ്വാസം; വിലക്ക് പിന്‍വലിച്ചു

By Ajith Babu

| Published: Thursday, September 15, 2011, 14:39 [IST]

തെന്നിന്ത്യയിലെ പ്രമുഖ നടിയായ നികിതയ്ക്ക് ഏര്‍പ്പെടുത്തിയ വിലക്ക് കന്നഡ ഫിലിം പ്രൊഡ്യൂസേഴ്‌സ് അസോസിയേഷന്‍ പിന്‍വലിച്ചു. ബാംഗ്ലൂരില്‍ നടത്തിയ വാര്‍ത്താസമ്മേളനത്തില്‍ നിര്‍മാതാവ് മുനിരത്‌നയാണ് മൂന്ന് വര്‍ഷത്തെ വിലക്ക് പിന്‍വലിച്ച കാര്യം മാധ്യമങ്ങളെ അറിയിച്ചത്. വാര്‍ത്താ സമ്മേളനത്തില്‍ നികിതയോട് ക്ഷമ ചോദിയ്ക്കാനും മുനിരത്‌ന തയാറായി.

സാന്‍ഡല്‍വുഡിലെ മുതിര്‍ന്ന താരങ്ങളുടെ ശക്തമായ പ്രതിഷേധത്തിനൊടുവിലാണ് ശിക്ഷാനടപടി പിന്‍വലിയ്ക്കാന്‍ നിര്‍മാതാക്കളുടെ സംഘടന തയാറായത്.

നടന്‍ ദര്‍ശനുമായി അവിഹിതബന്ധമുണ്ടെന്ന ആരോപണത്തെ തുടര്‍ന്നാണ് നികിതയെ വിലക്കാന്‍ സംഘടന തീരുമാനിച്ചിരുന്നത്. ദര്‍ശന്റെ ഭാര്യ വിജയലക്ഷ്മിയുടെ പരാതിപ്രകാരമായിരുന്നു നടപടി. ദാമ്പത്യജീവിതം തകര്‍ക്കാന്‍ നികിത ശ്രമിയ്ക്കുന്നുണ്ടെന്നും ഇവര്‍ പരാതിപ്പെട്ടിരുന്നു. ഇതിനിടെ ഭാര്യയെ മര്‍ദ്ദിച്ചെന്ന കേസില്‍ ദര്‍ശന്‍ ജയിലിലുമായി.