നങ്ങേലിയുടെ കഥ പറഞ്ഞ് അമല പോള്‍ ചിത്രം ആടൈയുടെ ഡോക്യൂമെന്ററി! ശ്രദ്ധേയമായി വീഡിയോ

ആടൈയില്‍ കാമിനി എന്ന കഥാപാത്രത്തെയാണ് അമലാ പോള്‍ അവതരിപ്പിക്കുന്നത്. സിനിമയുടെ കഥ കേട്ട് മറ്റു പ്രോജക്ടുകള്‍ വേണ്ടെന്നു വെച്ചിട്ടാണ് ചിത്രത്തിലേക്ക് എത്തിയതെന്ന് അമലാ പോള്‍ നേരത്തെ തുറന്നുപറഞ്ഞിരുന്നു. അര്‍ദ്ധനഗ്നയായിട്ടുളള നടിയുടെ പോസ്റ്ററായിരുന്നു നേരത്തെ സോഷ്യല്‍ മീഡിയയില്‍ തരംഗമായി മാറിയിരുന്നത്. സിനിമയുടെതായി പുറത്തിറങ്ങിയ ട്രെയിലറും വൈറലായി മാറിയിരുന്നു, അമലയുടെ പ്രകടനം തന്നെയായിരുന്നു ട്രെയിലറിലും മുഖ്യ ആകര്‍ഷണമായി മാറിയിരുന്നത്.

ട്രെയിലറില്‍ രമ്യ സുബ്രമണ്യവുമൊത്തുളള നടിയുടെ ലിപ് ലോക്ക് നേരത്തെ വിവാദമായി മാറിയിരുന്നു. വയലന്‍സ് രംഗങ്ങളുടെ അതിപ്രസരമാണ് ചിത്രത്തിലെന്ന് ചൂണ്ടിക്കാണിച്ചുകൊണ്ടായിരുന്നു നേരത്തെ സെന്‍സര്‍ ബോര്‍ഡ് എ സര്‍ട്ടിഫിക്കറ്റ് നല്‍കിയിരുന്നത്. ആക്രമിക്കപ്പെട്ട് വസ്ത്രങ്ങള്‍ ചീന്തിയെറിയപ്പെട്ട് നിസ്സഹായവസ്ഥയിലിരിക്കുന്ന അമലയെയായിരുന്നു ഫസ്റ്റ്ലുക്ക് പോസ്റ്ററില്‍ കാണിച്ചിരുന്നത്.

ജൂലായ് പത്തൊമ്പതിന് റിലീസ് ചെയ്ത സിനിമ ഇപ്പോഴും തിയ്യേറ്ററുകളില്‍ പ്രദര്‍ശനം തുടരുകയാണ്. ഇതിനിടെയാണ് ആടൈയുടെതായി പുതിയൊരു വീഡിയോ കൂടി റിലീസ് ചെയ്തിരിക്കുന്നത്. ആടൈയില്‍ ആനിമേഷനായി അവതരിപ്പിച്ച നങ്ങേലിയുടെ കഥ കാണിക്കുന്ന വീഡിയോ ആണ് പുറത്തുവന്നിരിക്കുന്നത്. സ്ത്രീകളുടെ സ്വയം നിര്‍ണയാവകാശത്തയും വസ്ത്ര സ്വാതന്ത്ര്യത്തെയും പ്രതിപാദിക്കുന്ന ചിത്രം തുടങ്ങുന്നത് കേരളത്തില്‍ തിരുവിതാംകൂര്‍ നാട്ടുരാജ്യത്തില്‍ നിലനിന്ന മുലക്കരത്തെയും അതിനെതിരെയും മാറ് മാറയ്ക്കാനായും പൊരുതിയ നങ്ങേലിയെ വിവരിച്ചുകൊണ്ടാണ്.

അതേസമയം സര്‍വൈവല്‍ ത്രില്ലര്‍ ഗണത്തില്‍പ്പെടുന്ന ഒരു ചിത്രമായിട്ടാണ് ആടൈ ഒരുക്കിയിരുന്നത്. വി സ്റ്റുഡിയോസ് നിര്‍മ്മിച്ച ചിത്രം രത്‌നകുമാറാണ് സംവിധാനം ചെയ്തത്. കാര്‍ത്തിക്ക് കണ്ണന്‍ ഛായാഗ്രഹണം നിര്‍വ്വഹിച്ച സിനിമയ്ക്ക് പ്രദീപ് കുമാര്‍ സംഗീത സംവിധാനം നിര്‍വ്വഹിച്ചു. തമിഴ്‌നാട്ടിലെന്ന കേരളത്തിലും സിനിമ തിയ്യേറ്ററുകളിലേക്ക് എത്തിയിരുന്നു. ഇവിടെയും മികച്ച സ്വീകാര്യതയായിരുന്നു സിനിമയ്ക്ക് ലഭിത്തിരുന്നത്. അമലാ പോളിന്റെ കരിയറിലെ വലിയ വഴിത്തിരിവായി സിനിമ നേരത്തേ മാറിയിരുന്നു.