മോദി തരംഗം!! ബോക്സോഫിസിൽ വൻ കുതിപ്പുമായി പിഎം നരേന്ദ്രമോദി, മൂന്ന് ദിവസം കൊണ്ട് നേടിയത്...

മോദിയുടെ ജീവിതം

പ്രധാനമന്ത്രി നരേന്ദ്രനമോദിയുടെ ജീവിതത്തെ ആസ്പദമാക്കി ഒമംഗ് കുമാർ സംവിധാനം ചെയ്ത ചിത്രമാണ് പിഎം നരേന്ദ്രമോദി. ബോളിവുഡ് താരം വിവേക് ഒബ്റോയിയാണ് ചിത്രത്തിൽ മോദിയായി എത്തിയത്. പ്രധാനമന്ത്രി ജീവിതത്തിൽ പിന്നിട്ട വഴികളിലൂടെ സഞ്ചരിക്കുന്ന ചിത്രമാണിത്. ബാല്യം മുതൽ ഇന്ത്യയുടെ പ്രധാനമന്ത്രിയായി അധികാരമേൽക്കുന്നതുവരെയുളള സംഭവങ്ങളാണ് ചിത്രത്തിൽ പറയുന്നത്. ചിത്രത്തിലെ ട്രെയിലറും പോസ്റ്ററിനുമൊക്കെ സോഷ്യൽ മീഡിയയിൽ മികച്ച പ്രേക്ഷക സ്വീകാര്യതയായിരുന്നു ലഭിച്ചിരുന്നത്. ഇതെല്ലാം ചിത്രത്തിനു വേണ്ടിയുള്ള പ്രേക്ഷകരുടെ കാത്തിരിപ്പ് വർധിപ്പിച്ചിരുന്നു.

വൻ താര നിര

വൻ താരനിരയായിരുന്നു ചിത്രത്തിൽ അണിനിരന്നത്. മോദിയായി വിവോക് ഒബ്റോയി എത്തുമ്പോൾ അമിത് ഷാ ആയി എത്തിയത് മനോജ് ജോഷിയായിരുന്നു.ദശന്‍ കുമാര്‍, ബൊമാന്‍ ഇറാനി, പ്രശാന്ത് നാരായണന്‍, സെറീന വഹാബ്, ബര്‍ഖ ബിഷ്ത് സെന്‍ഗുപ്ത, അന്‍ജന്‍ ശ്രീവാസ്തവ് തുടങ്ങിയവരും ചിത്രത്തിൽ പ്രധാന കഥാപാത്രങ്ങളായി എത്തിയിരുന്നു. ഇന്ത്യയ്ക്ക് അകത്തും പുറത്തും ചിത്രം റിലീസിനെത്തിയിരുന്നു. ഇന്ത്യയ്ക്കും ജിസിസിയ്ക്കും പുറമെ ന്യൂസിലന്‍ഡ്, ഓസ്‌ട്രേലിയ, ഫിജി തുടങ്ങി വിദേശ രാജ്യങ്ങളിലായിരുന്നു ചിത്രം പ്രദർശനത്തിനായി എത്തിയത്.

ചിത്രം സൂപ്പർ ഹിറ്റ്

ചിത്രം റിലീസ് ചെയ്തതിന് പിന്നാലെ തണുപ്പൻ പ്രതികരണമായിരുന്നു ലഭിച്ചിരുന്നത്. വേണ്ടവിധം ചിത്രം പ്രേക്ഷകരെ തൃപ്തിപ്പെടുത്താൻ കഴിഞ്ഞിട്ടില്ല എന്നുളള വാർത്തകൾ പ്രചരിച്ചിരുന്നു. എന്നാൽ പ്രചരിക്കുന്ന വാർത്ത വ്യാജമാണെന്ന് പ്രതികരിച്ച് ചിത്രത്തിന്റെ അണിയറ പ്രവർത്തകർ എത്തിയിരുന്നു. ആദ്യ ദിനം അഞ്ച് കോടി രൂപയാണ് ചിത്രത്തിന് ലഭിച്ചിരുന്നത്. എന്നാൽ ഇതിനെ കുറിച്ച് നിർമ്മാതാക്കളോ ബോളിവുഡ് ട്രെഡ് അനലിസ്റ്റുകളോ ഇതിനെ കുറിച്ച് സ്ഥിരീകരിച്ചിട്ടില്ലായിരുന്നു. എന്നാലിപ്പോൾ ചിത്രം പുറത്തിറങ്ങി മൂന്ന് ദിവസം പിന്നീടുമ്പോൾ ചിത്രത്തിനെ കുറിച്ചുളള കൃത്യമായ ചിത്രം പുറത്തു വരുകയാണ്.

മൂന്ന് ദിവസം കൊണ്ട് നേടിയത്

ഏപ്രിൽ 12 ആയിരുന്നു ചിത്രത്തിന്റെ റിലീസിങ്ങ് തീയതി പ്രഖ്യാപിച്ചത്. എന്നാൽ ലോക്സഭ തിരഞ്ഞെടുപ്പിനെ തുടർന്ന് ചിത്രം മെയ് 24 ന് മാറ്റുകയായിരുന്നു. ചിത്രം ലോക് സഭ തിരഞ്ഞെടുപ്പിനെ ബാധിക്കുമെന്നുള്ള പ്രതിപക്ഷ പാർട്ടികളുടെ അഭിപ്രായം പരിഗണിച്ചായിരുന്നു തിരഞ്ഞെടുപ്പ് കമ്മീഷൻ ചിത്രത്തിന്റെ റിലീസിങ് തീയതി നീട്ടിയത്, ആദ്യ ദിവസം 2.88 കോടി രൂപയായിരുന്നു ചിത്രം നേടിയത്. രണ്ടാം ദിവസം 3.76 കോടി രൂപ നേടിയിരുന്നു. മൂന്നാം ദിവസം 4.50 കോടി രൂപയായിരുന്നു ചിത്രത്തിന്റെ കളക്ഷൻ. മൂന്ന് ദിീവസം കൊണ്ട് ചിത്രം നേടിയത് 11.14 കോടി രൂപയാണ്. ഇത് ഇന്ത്യയിലെ കളക്ഷൻ റിപ്പോർട്ട് മാത്രമാണ്.