Home

Bollywood

ബോളിവുഡ് സിനിമയിലെ അതികായന്‍മാരിലൊരാളാണ് അമിതാഭ് ബച്ചന്‍. എന്നെന്നും പ്രേക്ഷക മനസ്സില്‍ നിറഞ്ഞുനില്‍ക്കുന്ന തരത്തിലുള്ള കഥാപാത്രവുമായാണ് അദ്ദേഹം എത്താറുള്ളത്. 37 വര്‍ഷം മുന്‍പ് നടന്ന അപകടത്തെക്കുറിച്ചുള്ള ഓര്‍മ്മകള്‍ പങ്കുവെച്ച് എത്തിയിരിക്കുകയാണ് അഭിഷേക് ബച്ചന്‍. ഫേസ്ബുക്ക് പോസ്റ്റിലൂടെയാണ് അദ്ദേഹം ഇതേക്കുറിച്ച് വിവരിച്ചിട്ടുള്ളത്. കൂലി സിനിമയുടെ ചിത്രീകരണത്തിനിടയിലായിരുന്നു ആ അപകടം നടന്നത്. പുനീത് ഇസ്സാറുമായുള്ള സംഘട്ടനത്തിനിടയിലായിരുന്നു സംഭവം. ചാട്ടം പിഴച്ച് തൊട്ടടുത്തുള്ള മേശപ്പുറത്തേക്ക് ശക്തിയില്‍ വീഴുകയായിരുന്നു ബിഗ് ബി.

സാരമായ പരിക്കുകളോടെ ബിഗ് ബിയെ ആശുപത്രിയില്‍ പ്രവേശിപ്പിക്കുകയായിരുന്നു അന്ന്. അദ്ദേഹത്തിന്റെ ആരോഗ്യത്തിനായി ആരാധകലോകവും സിനിമാലോകവും ഒരുപോലെ പ്രാര്‍ത്ഥിച്ചിരുന്നു. അദ്ദേഹത്തിനായുള്ള വഴിപാടുകളും നേര്‍ച്ചയുമൊക്കെയായി ആരാധാനാലയങ്ങളെല്ലാം നിറഞ്ഞിരുന്നു. അന്നൊരു ആഗസ്റ്റ് 2 ആയിരുന്നുവെന്നും അന്ന് അച്ഛന് രണ്ടാം ജന്‍മമായിരുന്നു ലഭിച്ചതെന്നും താരപുത്രന്‍ കുറിച്ചിട്ടുണ്ട്.

ഡോക്ടര്‍മാര്‍ തിരികെ നല്‍കിയ ജീവനായിരുന്നു അന്നത്തേത്. അതിനാല്‍ത്തന്നെ തങ്ങളെ സംബന്ധിച്ച് അച്ഛന്റെ രണ്ടാം ജന്മദിനമായാണ് ഈ ദിനം ആഘോഷിക്കുന്നതെന്നും അഭിഷേക് ബച്ചന്‍ കുറിച്ചിട്ടുണ്ട്. ഇതിഹാസങ്ങള്‍ യഥാര്‍ത്ഥത്തില്‍ രണ്ട് തവണ ജനിക്കുന്ന എന്ന ഹാഷ് ടാഗോടെയാണ് പോസ്റ്റ്. കുറിപ്പിനൊപ്പം പങ്കുവെച്ച ഫോട്ടോയിലെ ബിഗ് ബിയെ തിരിച്ചറിയാനേ കഴിയുന്നില്ലെന്നാണ് ആരാധകരുടെ കമന്റ്. അഭിഷേക് ബച്ചന്റെ പോസ്റ്റ് കാണാം.