'ഒരുപാട് വിവാഹങ്ങൾ തകരുന്നത് കണ്ടിട്ടുണ്ട്'; വിവാഹം കഴിച്ചതിന് പിന്നാലെ അലി ഫസൽ

മറുവശത്ത് റിച്ച ചദ്ദയും നായിക നടി എന്നതിനപ്പുറം അഭിനയ പ്രാധാന്യമുള്ള വേഷങ്ങളിലൂടെയാണ് കൂടുതലും ശ്രദ്ധിക്കപ്പെട്ടത്. ഓയെ ലക്കി എന്ന കോമഡി സിനിമയിലൂടെ ആയിരുന്നു നടിയുടെ തുടക്കം. പിന്നീട് ​ഗ്യാങ്സ് ഓഫ് വാസെയ്പൂർ എന്ന സിനിമയിൽ ശക്തമായ കഥാപാത്രത്തെ നടി അവതരിപ്പിച്ചു. സിനിമയിലെ അഭിനയത്തിന് ഫിലിം ഫെയർ പുരസ്കാരവും റിച്ചയെ തേടിയെത്തി.

2020 ൽ നിയമപ്രകാരം ഇരുവരും വിവാഹം കഴിച്ചതാണ്. എന്നാൽ ലോക്ഡൗൺ നിയന്ത്രണങ്ങൾ മൂലം വിവാഹം ആഘോഷിക്കാൻ പറ്റിയില്ല. ഇതേ തുടർന്നാണ് ഇപ്പോൾ വിവാഹം ആഘോഷമായി നടത്തിയിരിക്കുന്നത്. ഡൽഹി, ലഖ്നൗ, മുംബൈ എന്നിവിടങ്ങളിൽ താരങ്ങൾ വിവാഹ റിസപ്ഷൻ ഒരുക്കിയിട്ടുണ്ട്.

വിക്കി കൗശൽ, ആയുഷ് മാൻ ഖുറാന, വിദ്യ ബാലൻ, സഞ്ജയ് ദത്ത്, തപ്സി പന്നു, കരൺ ജോഹർ, ഹുമ ഖുറേഷി തുടങ്ങിയ താരങ്ങൾ വിരുന്നിൽ പങ്കെടുത്തു. ഇപ്പോഴിതാ വിവാഹത്തെക്കുറിച്ച് തുറന്ന് സംസാരിച്ചിരിക്കുകയാണ് അലി ഫസൽ.

വിവാഹത്തിനൊരുങ്ങവെ ഉണ്ടായ ചെറിയ വെല്ലുവിളികളെക്കുറിച്ചും അലി ഫസൽ സംസാരിച്ചു. വിവാഹ സൽക്കാരങ്ങൾക്ക് മുമ്പ് റിസപ്ഷന് ബുക്ക് ചെയ്തിരുന്ന വേദി നഷ്ടപ്പെട്ടെന്നും ഇത് തങ്ങളെ അന്ന് വളരെ ആശങ്കയിലാക്കിയെന്നും അലി ഫസൽ പറഞ്ഞു. വിവാഹത്തിന് പാടാൻ ബുക്ക് ചെയ്ത കലാകാരൻ കൊവിഡ് കാലത്ത് മരണപ്പെട്ടതും അലി ഫസൽ ഓർത്തു. ഒരുപാട് വിവാഹ ബന്ധങ്ങൾ തകരുന്നത് താൻ നേരിട്ട് കണ്ടിട്ടുണ്ടെന്നും അലി ഫസൽ പറഞ്ഞു.

'നിരവധി വിവാഹ ബന്ധങ്ങൾ തകരുന്നത് ഞാൻ നേരിട്ട് കണ്ടിട്ടുണ്ട്. പക്ഷെ അങ്ങനെയാവില്ലെന്ന് തെളിയിക്കാൻ ഞാൻ ആ​ഗ്രഹിക്കുന്നു. അതിനുമപ്പുറം സ്പിരിച്വൽ ആയ എന്തോ ഒന്നാണ് ഞാനും റിച്ചയും പങ്കുവെക്കുന്നത്. അതിന് ‍ഞാനവളോട് നന്ദി പറയുന്നു. കാരണം അവൾ എന്നെ കൂടുതൽ സ്പിരിച്വൽ ആക്കി,' അലി ഫസൽ പറഞ്ഞു.