ഒരു മൊഴി പോലുമില്ലാതെ ചിത്രയോട് കാണിച്ച പ്രണയഭാവങ്ങള്‍ ഒരു രക്ഷയുമില്ല; ജോജുവിനോട് ഭദ്രന്‍ പറയുന്നു

'ഇന്നലെ രാത്രി കാനഡയിലെ എന്റെ ഒരു സുഹൃത്ത് വിളിച്ച് ' മധുരം ' സിനിമ കണ്ടിരുന്നോ? കുറേ കാലങ്ങള്‍ക്ക് ശേഷം മലയാളത്തില്‍ സ്വാഭാവികതയുള്ള ഒരു നല്ല ചിത്രം കണ്ടു, അതിന്റെ സന്തോഷത്തിലാണ് ഞാന്‍ എന്ന് പറഞ്ഞു. ജോജു ജോര്‍ജിന്റെ പടമല്ലേ എന്ന് കരുതി ഇന്ന് എന്റെ വീട്ടിലെ തിയേറ്ററില്‍ കണ്ട് ഇറങ്ങിയപ്പോള്‍ എനിക്കും എന്റെ ഭാര്യയ്ക്കും ഇരട്ടി മധുരം നാവില്‍ തൊട്ട സ്വാദ് പോലെ തോന്നി. ഒരാശുപത്രിയിലെ ബൈസ്റ്റാന്‍ഡേഴ്‌സിന്റെ പിറകില്‍ സ്വരുക്കൂട്ടിയെടുത്ത അര്‍ത്ഥവത്തായ ഒരു തിരക്കഥ.

അവിടെ വരുന്നവരുടെ പ്രിയപ്പെട്ടവരെ ചൊല്ലിയുള്ള അങ്കലാപ്പുകളും കിനാവുകളും പ്രതീക്ഷകളും ഒക്കെ കൂട്ടി കൂട്ടി ഒരു നൂറു മാര്‍ക്കിന്റെ സിനിമ. അഹമ്മദ് കണ്‍ഗ്രാറ്റ്‌സ്. മേലിലും നിങ്ങളുടെ സിനിമകള്‍ക്ക് ഈ മധുരം ഉണ്ടാവട്ടെ. ജോജൂ.. തന്റെ കണ്ണുകളും മുഖവും ശബ്ദവും ഗംഭീരമായി ഈ സിനിമയില്‍ ഉപയോഗിച്ചിരിക്കുന്നു. കുശിനിയിലെ മുട്ടി തടിയ്ക്ക് പിറകില്‍ നിന്ന് ഒരു മൊഴി പോലുമില്ലാതെ ചിത്രയോട് കാണിച്ച പ്രണയഭാവങ്ങള്‍ ഒരു രക്ഷയുമില്ല. ഇനിയും എടുത്ത് എടുത്ത് പറയേണ്ട സന്ദര്‍ഭങ്ങള്‍ നേരില്‍ കാണുമ്പോള്‍ പറയാം..' എന്നുമാണ് ഫേസ്ബുക്കിലൂടെ പങ്കുവെച്ച കുറിപ്പില്‍ ഭദ്രന്‍ പറയുന്നത്.

മധുരം കണ്ട അനുഭവങ്ങളും താരങ്ങളുടെ പ്രകടനത്തെ കുറിച്ചുള്ള കമന്റുകളുമാണ് സംവിധായകന്റെ പോസ്റ്റിന് താഴെ വന്ന് കൊണ്ടിരിക്കുന്നത്. ഒരുപാട് ഒരുപാട് നന്ദി സാര്‍. ഞങ്ങളുടെ ഈ സിനിമയെ കുറിച്ച് സാറിനെ പോലെ വല്ല്യ ഒരാള്‍ പറഞ്ഞ വാക്കുകള്‍ക്ക്. ഒരുപാട് സന്തോഷം തോന്നുന്നു. ചെറിയ സീന്‍ ആണെങ്കില്‍ കൂടെ ഇത്രയും നല്ല സിനിമയില്‍ എനിക്കും അഭിനയിക്കാന്‍ കഴിഞ്ഞതില്‍ ഒരുപാട് സന്തോഷം. ഇന്ന് 50 ദിവസം ആകുന്നു മധുരം റിലിസ് ആയിട്ട്. എന്നാണ് സിനിമയിലെ ചെറിയൊരു റോളില്‍ അഭിനയിച്ച വിനീഷ് എന്നൊരാള്‍ പറയുന്നത്.

Recommended Video

വീട്ടിലെ അവസ്ഥ ഇപ്പോഴും ശോകമാണ്.. | Aishwarya Lekshmi Reveals | Archana 31 Not Out | Filmibeat

അഹമ്മദ് കബീര്‍ രചന നിര്‍വഹിച്ച് സംവിഘാനം ചെയ്ത സിനിമയാണ് മധുരം. റോമാന്റിക് കോമഡി ഡ്രാമയായി ഒരുക്കിയ ചിത്രത്തില്‍ ജോജു ജോര്‍ജ് നായകനായി എത്തുമ്പോള്‍ ശ്രുതി രാമചന്ദ്രനാണ് നായിക. ഇവരെ കൂടാതെ അര്‍ജുന്‍ അശോകന്‍, നിഖില വിമല്‍, ഇന്ദ്രന്‍സ്, ജാഫര്‍ ഇടുക്കി, ജഗദീഷ് എന്നിങ്ങനെ വമ്പന്‍ താരങ്ങളാണ് അണിനിരന്നത്. ഒടിടി പ്ലാറ്റ്‌ഫോമിലൂടെ റിലീസ് ചെയ്ത സിനിമയ്ക്ക് നിരവധി പിന്തുണയാണ് ലഭിച്ചിരുന്നത്.

കൊച്ചി മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചിരിക്കുന്ന രോഗികളുടെ കൂട്ടിരിപ്പിന് വരുന്നവരുടെ കഥയാണ് മധുരം പറഞ്ഞത്. ഒപ്പം മനോഹരമായൊരു പ്രണയകഥയും അവതരിപ്പിക്കാന്‍ സാധിച്ചു. ജോജുവിന്റെയും ശ്രുതിയുടെയുമെല്ലാം പ്രകടനങ്ങള്‍ക്ക് വലിയ സ്വീകാര്യത തന്നെയായിരുന്നു ലഭിച്ചതും.