വിടവാങ്ങിയത് ഇന്ത്യന്‍ സിനിമ ഫാല്‍ക്കെ പുരസ്‌കാരം നല്‍കി ആദരിച്ച ചലച്ചിത്ര പ്രതിഭ!

യുവത്വത്തിന്റെ ഹരം

അറുപതുകളിലെ യുവത്വത്തിന്റെ ഹരമായിരുന്നു ശശി കപൂര്‍ എന്ന ബല്‍ബീല്‍ രാജ് കുമാര്‍. വിഖ്യാതമായ കപൂര്‍ കുടുംബത്തിലെ തലമുതിര്‍ന്ന കാരണവരായ പൃഥ്വരാജ് കപൂറിന്റെ മകനായ ശശി കപൂറിന് സിനിമ രക്തത്തില്‍ അലിഞ്ഞ് ചേര്‍ന്നതായിരുന്നു.

ബാലതാരമായി തുടക്കം

പിതാവ് പൃഥ്വിരാജ് കപൂറിന്റെ സിനിമ കമ്പനിയായ പൃഥ്വി തിയറ്റേഴ്‌സിന്റെ സംഗ്രം എന്ന ചിത്രത്തിലൂടെ ബാലതാരമായിട്ടായിരുന്നു ശശി കപൂറിന്റെ അരങ്ങേറ്റം. സിനിമകള്‍ക്ക് പുറമേ നാടകങ്ങളിലും സജീവമായിരുന്ന ശശി കപൂര്‍ ധര്‍മ്മപുത്ര എന്ന ചിത്രത്തിലൂടെ നായകനായി അരങ്ങേറുമ്പോള്‍ 23 വയസായിരുന്നു പ്രായം.

കലയും കച്ചവടവും

ബോക്‌സ് ഓഫീസ് വിജയം നേടിയ ജബ ജബ് ഫൂല്‍ ഖിലേ, ചോര്‍ മചായേ ഷോര്‍ എന്നീ ചിത്രങ്ങള്‍ക്കൊപ്പം ശ്യാം ബെനഗലിന്റെ ജൂനൂന്‍ പോലുള്ള കലാമൂല്യമുള്ള സിനിമകളിലും ശശി കപൂര്‍ അഭിനയിച്ചു. ബോളിവുഡ് ചിത്രങ്ങളില്‍ മാത്രമല്ല ദ ഹൗസ്‌ഹോള്‍ഡര്‍, ഷേക്‌സ്പിയര്‍ വാല, ബോംബേ ടോക്കി തുടങ്ങിയ വിദേശ സിനിമകളിലും അദ്ദേഹം അഭിനയിച്ചു.

ദേശീയ പുരസ്‌കാരങ്ങള്‍

1986ല്‍ ന്യൂഡല്‍ഹി ടൈംസ് എന്ന ചിത്രത്തിലെ അഭിനയിത്തിനായിരുന്നു ആദ്യമായി ദേശീയ പുരസ്‌കാരം തേടിയെത്തിയത്. മുസാഫിര്‍ എന്ന ചിത്രത്തിലൂടെ 1993ല്‍ അഭിനയത്തിനുള്ള സ്‌പെഷ്യല്‍ ജൂറി പുരസ്‌കാരവും ലഭിച്ചു. ജൂനൂന്‍ എന്ന ചിത്രത്തിന് മികച്ച ഫീച്ചര്‍ ചിത്രത്തിനുള്ള പുരസ്‌കാരം ലഭിച്ചപ്പോള്‍ ചിത്രത്തിന്റെ നിര്‍മാതാവെന്ന നിലയില്‍ അതേറ്റ് വാങ്ങിയതും ശശി കപൂറായിരുന്നു.

ഫാല്‍ക്കേ പുരസ്‌കാരം

ഇന്ത്യന്‍ ചലച്ചിത്ര ലോകത്തിന് മികച്ച സംഭാവനകള്‍ നല്‍കിയ ചലച്ചിത്രകാരനുള്ള ദാദാ സാഹിബ് ഫാല്‍ക്കെ പുരസ്‌കാരം നല്‍കി ശശി കപൂറിനെ ചലച്ചിത്ര ലോകം ആദരിച്ചത് 2014ലായിരുന്നു. ചലച്ചിത്ര രംഗത്തെ സംഭാവനകളെ മാനിച്ച് രാജ്യം പത്ഭൂഷന്‍ ഉള്‍പ്പെടെയുള്ള പുരസ്‌കാരങ്ങള്‍ നല്‍കി ആദരിച്ചിരുന്നു.