വീണ്ടും ബോളിവുഡ് കീഴടക്കാനൊരുങ്ങി പൃഥ്വിരാജ്, നാം ഷബാനയുടെ ആദ്യ പോസ്റ്റര്‍ പുറത്തുവിട്ടു

ആക്ഷന്‍ ചിത്രത്തില്‍ പൃഥ്വിയ്‌ക്കൊപ്പം അക്ഷയ് കുമാറും

ആക്ഷന്‍ പശ്ചാത്തലത്തിലൊരുങ്ങുന്ന നാം ഷബാനയില്‍ പൃഥ്വിയ്‌ക്കൊപ്പം അക്ഷയ് കുമാറും പ്രധാന കഥാപാത്രത്തെ അവതരിപ്പിക്കുന്നുണ്ട്. അനുപം ഖേര്‍, മനോജ് ബാജ്‌പേയി, ഡാനി ഡെന്‍സോങ്ങ്പാ എന്നിവരും ചിത്രത്തില്‍ അഭിനയിക്കുന്നുണ്ട്.

ടൈറ്റില്‍ കഥാപാത്രമായി തപ്സി പന്നു

പൃഥ്വിരാജ് നായക വേഷത്തിലെത്തുന്ന നാം ഷബാനയില്‍ ടൈറ്റില്‍ റോളിലെത്തുന്നത് തപ്‌സി പന്നുവാണ്. 2015 ല്‍ പുറത്തിറങ്ങിയ ബേബി എന്ന ചിത്രത്തിലെ തപ്‌സിയുടെ കഥാപാത്രത്തിന്റെ പൂര്‍വ്വകാലമാണ് നാം ഷബാന പറയുന്നത്.

പോസ്റ്റര്‍ പുറത്തുവിട്ടത് അക്ഷയ്കുമാര്‍

അക്ഷയ് കുമാറാണ് ചിത്രത്തിന്റെ പോസ്റ്റര്‍ ട്വിറ്ററിലൂടെ പുറത്തുവിട്ടത്. നെയില്‍ പോളിഷ് ഉണക്കുമ്പോള്‍ മാത്രമാണ് ഒരു സ്ത്രീ നിസ്സഹായയാവുന്നത് എന്ന വാചകമാണ് ഷബാന എന്നു കേള്‍ക്കുമ്പോള്‍ ഓര്‍മ്മ വരുന്നതെന്നും അക്ഷയ് ട്വിറ്ററില്‍ കുറിച്ചിട്ടുണ്ട്.

സുന്ദരിയാണെങ്കിലും ശക്തയാണവളെന്ന് പൃഥ്വിയും

സുന്ദരിയാണെങ്കിലും ശക്തയാണവളെന്നും പോരാടാനാണ് അവള്‍ വന്നിരിക്കുന്നതെന്നുമാണ് പൃഥ്വിരാജ് കുറിച്ചിട്ടുള്ളത്. ചിത്രത്തിന്റെ ഫസ്റ്റ് ലുക്ക് പോസ്റ്റര്‍ പോസ്റ്റ് ചെയ്തിട്ടുമുണ്ട്.