ഭര്‍ത്താവായി വിക്കിയെ തിരഞ്ഞെടുക്കാന്‍ കാരണമുണ്ട്; വിവാഹത്തിന് സമ്മതിച്ചതിനെ കുറിച്ച് കത്രീന കൈഫ്

കോഫി വിത് കരണിന്റെ ഏഴാമത്തെ സീസണാണ് ഇപ്പോള്‍ നടന്ന് കൊണ്ടിരിക്കുന്നത്. പത്ത് എപ്പിസോഡുകള്‍ പൂര്‍ത്തിയാവുമ്പോള്‍ ബോളിവുഡ് സിനിമാലോകത്തെ മുന്‍നിര താരങ്ങള്‍ പങ്കെടുത്ത് കഴിഞ്ഞു. ഓരോരുത്തരോടും രസകരമായ ചോദ്യങ്ങള്‍ ചോദിച്ച് വിമര്‍ശനങ്ങള്‍ ഏറ്റുവാങ്ങി കൊണ്ടിരിക്കുകയാണ് കരണിപ്പോള്‍. അതിനിടയിലാണ് നടി കത്രീന കൈഫും ഇതേ ഷോ യുടെ ഭാഗമായിട്ടെത്തുന്നത്.

കത്രീന കൈഫിനൊപ്പം നടന്മാരായ ഇഷാന്‍ ഖട്ടര്‍,. സിദ്ധാര്‍ഥ് ചതുര്‍വേദി എന്നിവരും അതിഥികളായി ഷോ യിലേക്ക് എത്തിയിരുന്നു. എല്ലാവരും അവരുടെ വ്യക്തി ജീവിതത്തെയും പ്രൊഫഷണല്‍ ജീവിതത്തെയും സംബന്ധിക്കുന്ന പലതും ഇവിടെ വെളിപ്പെടുത്തി. ഭര്‍ത്താവ് വിക്കി കൗശലിനെ കുറിച്ച് പറയാനുള്ള ചോദ്യത്തിന് അദ്ദേഹത്തെ പുകഴ്ത്തി പറയുകയാണ് നടി ചെയ്തത്. ഒപ്പം വിക്കിയെ വിവാഹം കഴിക്കാന്‍ പ്രേരിപ്പിച്ച കാര്യമെന്താണെന്നും സൂചിപ്പിച്ചു.

വിക്കിയോട് ഏറ്റവും കൂടുതല്‍ ആകര്‍ഷണം തോന്നിയ കാര്യം അദ്ദേഹം സ്വന്തം കുടുംബത്തോട് പെരുമാറുന്ന രീതിയാണ്. വിക്കിയുടെ അച്ഛനും അമ്മയുമൊക്കെ അതുപോലെയാണ്. പ്രണയത്തിലായ ആദ്യ നാളുകളില്‍ വിക്കി ചില നിയന്ത്രണങ്ങള്‍ എനിക്ക് നല്‍കി. എന്നാല്‍ അതൊരിക്കലും എന്നെ വിഷമിപ്പിച്ച് കൊണ്ടല്ല.

അത്തരമൊരു ബഹുമാനം അങ്ങോട്ട് തോന്നുകയാണ് ഇതിലൂടെ സംഭവിച്ചത്. സ്വന്തം കുടുംബത്തിന് ഇതുപോലെ ബഹുമാനവും വിശ്വാസവും നല്‍കുന്ന ഒരാള്‍ വിവാഹം കഴിക്കുമ്പോള്‍ അവളുടെ കുടുംബത്തിനും ഇതേ പ്രധാന്യം നല്‍കുമെന്ന് ഞാനും ചിന്തിച്ചു.

അദ്ദേഹത്തിന്റെ തത്വങ്ങളും മൂല്യങ്ങളും വളരെ ശക്തമാണ്. എന്നെ സംബന്ധിച്ചിടത്തോളം അത് വളരെ ആഴത്തിലായി തോന്നി. എനിക്ക് ആദ്യമായിട്ടുണ്ടായ റിലേഷന്‍ഷിപ്പ് അല്ലിത്. അതുകൊണ്ട് തന്നെ പ്രധാനപ്പെട്ട കാര്യങ്ങള്‍ എന്തൊക്കെയാണെന്ന് എനിക്ക് അറിയാം.

എന്നും തമാശ പറഞ്ഞും കളിച്ചും ജീവിതം മുന്നോട്ട് കൊണ്ട് പോകാന്‍ സാധിക്കില്ലെന്ന് വിക്കിയിലൂടെയാണ് താന്‍ മനസിലാക്കിയതെന്നും കത്രീന പറയുന്നു. എന്തായാലും ഭര്‍ത്താവിനെ പുകഴ്ത്തി പറഞ്ഞതാണെങ്കിലും നല്ലൊരു തീരുമാനമാണ് നടി എടുത്തതെന്നാണ് ആരാധകര്‍ക്ക് പറയാനുള്ളത്.