ടോം ഇമ്മട്ടി തന്നെ തിരക്കഥ എഴുതിയിരിക്കുന്ന ഗാംബ്ലറിന്റെ പ്രമേയം എണ്പതുകളിലെ കുടുംബകാല ചിത്രങ്ങളുടെ അച്ചിൽ വാർത്തതാണ്. ഇപ്പോഴത്തെ മലയാളം സീരിയലുകളുടെ ഒതുക്കമുള്ള വേർഷൻ എന്നും പറയാം. ഉദാരമതികളായ ആളുകൾക്ക് പടത്തിന്റെ നിര്ഗുണത്വം മാനിച്ച് റിയൽ ലൈഫ് ഫാമിലി സ്റ്റോറി എന്നും വേണമെങ്കിൽ ഗാംബ്ലറിനെ വിശേഷിപ്പിക്കാം.

ആൻസൻ എന്നു പേരായ തൊട്ടതെല്ലാം പിഴച്ചുപോവുന്ന കേന്ദ്രകഥാപാത്രത്തെ ആണ് ഇമ്മട്ടി ഉദാരപൂർവമായി ടൈറ്റിലിൽ ഗാംബ്ലർ എന്ന് പേരിട്ടിരിക്കുന്നത്. സാമ്പത്തിക ബുദ്ധിമുട്ടുകൾ ഉൾപ്പടെയുള്ള സകലമാന പ്രതിസന്ധികളും ടിയാൻ ഉണ്ട്. ഭാര്യയായ ഡയാന സ്വാഭാവികമായും അസംതൃപ്തയും കലഹപ്രിയയും സിനിമ തുടങ്ങി അധികസമയം കഴിയും മുൻപ് ആൻസനെ ഉപേക്ഷിച്ചു പോകുന്നവളുമാണ്. മകൻ ഫ്രാൻസ് ആൻസനെ പോലെ അലസനും പഠനത്തിൽ പിന്നാക്കം നിക്കുന്നവനുമാണ്. അപ്പനായ ലാസറും സമാനസ്വാഭാവി തന്നെ..

ആൻസൻ പോളിന് ആൻസൻ എന്നുതന്നെ പേരായ കേന്ദ്ര കഥാപാത്രത്തെ നൽകിയിരിക്കുന്നു എന്നതും നായികയായ ഡയാനയെ അവതരിപ്പിക്കാൻ ഡയാന ഹമീദ് എന്ന പുതുമുഖത്തെ തന്നെ തെരഞ്ഞെടുത്തിരിക്കുന്നു എന്നതും വേണമെങ്കിൽ ഗാംബ്ലറിന്റെ ഒരു വെറൈറ്റി ആയി പറയാം. നായകന്റെ മകൻ ഫ്രാൻസ് ആയി സംവിധായകൻ ഇമ്മട്ടിയുടെ മകൻ ജോർജ് ആണ്. അപ്പൻ ലാസറായി വരുന്നതാകട്ടെ വല്ലാത്ത പഹയൻ എന്ന യൂട്യൂബ് ചാനൽ ചെയ്യുന്ന വിനോദ് നാരായണനും. കൂട്ടത്തിൽ ഭേദപ്പെട്ട ക്യാരക്റ്ററും പെര്ഫോമൻസും ജോർജ് ഇമ്മട്ടിയുടേതാണ് എന്ന് പറയാതെ വയ്യ.

ഭാര്യ ഉപേക്ഷിച്ചു പോയ ശേഷമുള്ള നായകന്റെയും മകന്റെയും അപ്പന്റെയും ജീവിതം ആണ് ഗാംബ്ലറിന്റെ ഭൂരിഭാഗം സമയവും. അതാകട്ടെ മുന്നേ പറഞ്ഞ പോലെ തീർത്തും നിര്ഗുണാഞ്ചമായിട്ടാണ് പകർത്തിയിരിക്കുന്നത്. ബിസിനസ് പങ്കാളിയുടെ വക നൈസായ തേപ്പും പ്രളയവും പള്ളിയിലെ സുവിശേഷ പ്രാർത്ഥനയും അല്ലാതെ മറ്റൊരു വഴിത്തിരിവും നായകന്റെ ജീവിതത്തിലോ സിനിമയിലോ സംഭവിക്കുന്നില്ല. എന്തിനോ വേണ്ടി തിളയ്ക്കുന്ന രണ്ട് മണിക്കൂർ.. അല്ലാതൊന്നുമില്ല..

നായക വേഷങ്ങൾ തുടർച്ചയായി കിട്ടിയിട്ടും

നായകന്റെ ബിസിനസുമായി ബന്ധപ്പെട്ട സ്‌ക്രീനിൽ വരുന്ന ക്യാരക്ടറുകൾ ഇന്നസെന്റ്, സലിംകുമാർ, ജയരാജ് വാര്യർ, ജോസഫ് അന്നം കുട്ടി ജോസ്, വിഷ്ണു ഗോവിന്ദൻ, സിജോയ് വർഗീസ് എന്നിവർ ചെയ്തിരിക്കുന്നു. അവരുടെ എപ്പിസോഡുകൾ തമ്മിൽ ഭേദമാണ്. മണികണ്ഠൻ അയ്യപ്പൻറെ പാട്ടുകളും കൊള്ളാം. നായക വേഷങ്ങൾ തുടർച്ചയായി കിട്ടിയിട്ടും ആൻസൻ പോളിന് വേണ്ടത്ര തിളങ്ങാൻ കഴിയാതെ പോകുന്നത് നിർഭാഗ്യകരമാണ്.

സിനിമ തീർന്നപ്പോൾ സ്‌ക്രീനിൽ A film by TOM EMMATTY എഴുതിയത് ഒപ്പമുള്ള രാഹുൽ ഉറക്കെ വായിച്ചത് 'ടോം ഏമാത്തി' എന്നാണ്. ആ വായനയെ കുറ്റം പറയാനും പറ്റില്ല. വിപ്ലവ ചിത്രമെന്നു തെറ്റിധരിപ്പിച്ചു മഹാരാജാസിലെ കെ എസ് യു കാരുടെ കഥപറഞ്ഞ് മെക്സിക്കൻ അപാരതയിലൂടെ എസ് എഫ് ഐ കാരെ കൂട്ടത്തോടെ ഏമാത്തിയ ടോം ഇത്തവണ സൂപ്പർമാൻ കാർഡ് ആണ് ഇറക്കിയത് എന്നുമാത്രം.