ഭാര്യയോടും കാമുകിയോടും കരുണയില്ലാതെ പെരുമാറി; കാമുകിയെ പോലെയാവാന്‍ ഭാര്യയോട് പറഞ്ഞതായി ഗോവിന്ദ

ബോളിവുഡില്‍ ഒരു കാലത്ത് നിറഞ്ഞ് നിന്നിരുന്ന നടി നീലവുമായിട്ടാണ് ഗോവിന്ദ ഇഷ്ടത്തിലായത്. ലവ് 86, ഇല്‍സം, ഖുദ്ഗാര്‍സ് എന്നിങ്ങനെയുള്ള സിനിമകളില്‍ ഇരുവരും ഒരുമിച്ച് അഭിനയിച്ചിരുന്നു. ഏറെ കാലം ഇരുവരും സ്‌നേഹിച്ചെങ്കിലും ആ സമയത്ത് സുനിത അഹുജ എന്ന പെണ്‍കുട്ടിയുമായി നടന്‍ ഇഷ്ടത്തിലായിരുന്നു. ഇരുവരും വിവാഹം കഴിക്കാന്‍ തീരുമാനിച്ചിരിക്കുകയുമാണ്. ഇക്കാര്യം നീലത്തില്‍ നിന്നും ഗോവിന്ദ മറച്ച് വെച്ചു.

പിന്നീട് വളരെ രഹസ്യമായി ഒരു അമ്പലത്തില്‍ വെച്ച് 1987 ലാണ് ഗോവിന്ദയുടെ വിവാഹം നടക്കുന്നത്. സുനിത ഭാര്യയായി വന്ന കാര്യം നടന്‍ പുറംലോകത്തോട് പറഞ്ഞതുമില്ല. സിനിമയിലെ തന്റെ അവസരങ്ങലെ ബാധിക്കുമെന്നും നീലവും താനും തമ്മിലെ ഓണ്‍സ്‌ക്രീനിലെ കെമിസ്ട്രി തകര്‍ന്ന് പോവുമോന്നും കരുതി ഗോവിന്ദ വിവാഹക്കാര്യം മറച്ച് വെച്ചു. ഏകദേശം ഒരു വര്‍ഷത്തോളം രഹസ്യമായിരുന്നെങ്കിലും നീലമടക്കം എല്ലാവരും ഈ കഥ അറിഞ്ഞു.

നീലത്തിന്റെ പേരില്‍ സുനിതയുമായി വഴക്കുണ്ടായ കാര്യവും ഗോവിന്ദ പറഞ്ഞിട്ടുണ്ട്. ഇരുവരുടെയും വിവാഹനിശ്ചയം കഴിഞ്ഞ സമയത്താണ്. അന്ന് നീലത്തെ കുറിച്ച് പറഞ്ഞ് രണ്ടാളും വഴക്കായി. ഇതോടെ സുനിതയുമായുള്ള വിവാഹം വേണ്ടെന്ന തീരുമാനത്തിലേക്ക് താനെത്തി. എന്നാല്‍ അഞ്ച് ദിവസം കൊണ്ട് സുനിത ആ പിണക്കം മാറ്റിയെടുത്തു. അതല്ലായിരുന്നെങ്കില്‍ ഉറപ്പായും താന്‍ നീലത്തെ ഭാര്യയാക്കുമായിരുന്നു എന്നാണ് മുന്‍പൊരു അഭിമുഖത്തില്‍ ഗോവിന്ദ പറഞ്ഞത്.

മാത്രമല്ല നീലത്തോട് താന്‍ കാണിച്ചത് നെറികേടായി പോയെന്ന് പറഞ്ഞ് നടന്‍ സ്വയം കുറ്റപ്പെടുത്തിയിരുന്നു. നീലവും ഞാനും തമ്മിലുള്ള വ്യക്തിപരമായ ബന്ധം ഞാന്‍ പ്രൊഫഷണല്‍ ആവശ്യങ്ങള്‍ക്ക് വേണ്ടി ചൂഷണം ചെയ്യുകയായിരുന്നു. അവളോട് ഞാന്‍ കാണിച്ചത് വൃത്തിക്കെട്ട കളിയായി പോയെന്നും ഞാന്‍ വിവാഹിതനാണെന്ന് അവളോട് നേരത്തെ തന്നെ പറയേണ്ടതാണെന്ന് പിന്നീട് തോന്നിയെന്നുമാണ് നടന്‍ വെളിപ്പെടുത്തിയത്. അതേ സമയം ഭാര്യയോടും സമാനമായ പ്രവൃത്തിയാണ് ചെയ്തത്.

പലപ്പോഴും സുനിത നീലത്തെ പോലെയാവണമെന്ന് താന്‍ ആഗ്രഹിച്ചു. അങ്ങനെ നീലത്തെ കണ്ട് പഠിക്കാന്‍ ഞാന്‍ ഭാര്യയോട് ആവശ്യപ്പെട്ട് കൊണ്ടേയിരുന്നു. ഭാര്യയോടും കാമുകിയോടും കരുണയില്ലാതെയാണ് താന്‍ പെരുമാറിയത്. എന്നാല്‍ സുനിത അതിനുള്ള വ്യക്തമായ മറുപടി പലപ്പോഴും എനിക്ക് തന്നിരുന്നു. 'ഞാന്‍ എങ്ങനെയാണോ അത് കണ്ടിട്ടാണ് നിങ്ങളെന്നെ സ്‌നേഹിച്ചത്. അങ്ങനെയുള്ള എന്നെ മാറ്റാന്‍ ഞാനൊരിക്കലും ശ്രമിക്കില്ലെന്ന്', സുനിത ഉറപ്പിച്ച് പറഞ്ഞിരുന്നതായി ഗോവിന്ദ സൂചിപ്പിച്ചു.