സോഷ്യല്‍ മീഡിയയ്ക്കു മുന്‍പില്‍ തകര്‍ന്നടിഞ്ഞ് തഗ്‌സ് ഓഫ് ഹിന്ദൊസ്ഥാന്‍! ബോക്സ് ഓഫ് കളക്ഷനില്‍ ഇടിവ്

തഗ്സ് ഓഫ് ഹിന്ദൊസ്ഥാന്‍

ആമിര്‍ ഖാന്റെ ആരാധകര്‍ വലിയ പ്രതീക്ഷകളോടെ കാത്തിരുന്ന ഒരു ചിത്രം കൂടിയായിരുന്നു തഗ്‌സ് ഓഫ് ഹിന്ദൊസ്ഥാന്‍. ലോകമെമ്പാടുമായി 7000ത്തോളം സ്‌ക്രീനുകളിലായിരുന്നു ചിത്രം പ്രദര്‍ശനത്തിനെത്തിയിരുന്നത്. ആമിര്‍ ഖാനൊപ്പം ബോളിവുഡ് ഇതിഹാസം അമിതാഭ് ബച്ചനും ചിത്രത്തില്‍ മുഖ്യ വേഷത്തില്‍ അഭിനയിച്ചിരുന്നു. വിജയ് കൃഷ്ണ ആചാര്യയാണ് ചിത്രം സംവിധാനം ചെയ്തിരുന്നത്. ആക്ഷന്‍ പീരിയഡ് ചിത്രമായ തഗ്സ് ഓഫ് ഹിന്ദൊസ്ഥാനില്‍ ഫിരംഗി എന്ന കഥാപാത്രമായിട്ടാണ് ആമിര്‍ എത്തുന്നത്.

ആമിറിന്റെ പ്രകടനം

ചിത്രത്തിന്റെതായി പുറത്തിറങ്ങിയ ട്രെയിലര്‍ എല്ലാവരിലും വലിയ ആവേശമായിരുന്നു ഉണ്ടാക്കിയിരുന്നത്. പ്രേക്ഷകരെ ചിത്രം കാണാന്‍ പ്രേരിപ്പിക്കുന്ന തരത്തിലുളള ആകാംക്ഷ നിറഞ്ഞ രംഗങ്ങളായിരുന്നു ട്രെയിലറിലുണ്ടായിരുന്നത്. 1795ലെ കഥയാണ് ചിത്രം പറയുന്നത്. വ്യാപാരത്തിനായി ഈസ്റ്റ് ഇന്ത്യാ കമ്പനി ഇന്ത്യയിലേക്ക് വന്ന കാലഘട്ടമാണ് ചിത്രത്തിന്റെ കഥാപശ്ചാത്തലമാകുന്നതെന്നാണ് റിപ്പോര്‍ട്ടുകള്‍ വന്നത്. ചിത്രത്തില്‍ ആമിര്‍ മികച്ചുനിന്നെങ്കിലും മറ്റുളളവര്‍ നിരാശരാക്കിയെന്നും റിപ്പോര്‍ട്ടുകള്‍ വന്നിരുന്നു.

ചിത്രം പ്രേക്ഷകരെ നിരാശരാക്കി

ബോളിവുഡിന്റെ സ്ഥിരം വിജയചേരുവകളെല്ലാം ഉള്‍പ്പെടുത്തികൊണ്ടായിരുന്നു ചിത്രം നിര്‍മ്മിച്ചിരുന്നത്. എന്നിട്ടും തിയ്യേറ്ററുകളില്‍ നിന്ന് അത്ര മികച്ച പ്രതികരണമല്ലായിരുന്നു തഗ്‌സ് ഓഫ് ഹിന്ദൊസ്ഥാന് ലഭിച്ചിരുന്നത്.ചിത്രം പ്രേക്ഷകരെ നിരാശരാക്കിയെന്നു തന്നെ റിപ്പോര്‍ട്ടുകള്‍ വന്നിരുന്നു. സിനിമയില്‍ അല്‍പ്പമെങ്കിലും ബോറടിപ്പിക്കാത്തത് ആമിറിന്റെ പ്രകടനം ആണെന്നാണ് സോഷ്യല്‍ മീഡിയയില്‍ അഭിപ്രായങ്ങള്‍ വന്നത്.

ചിത്രത്തിന്റെ മൊത്തം കളക്ഷന്‍

300 കോടി മുതല്‍മുടക്കിലായിരുന്നു ചിത്രം നിര്‍മ്മിച്ചിരുന്നത്. എന്നാല്‍ ചിത്രത്തിന്റെ മൊത്തം കളക്ഷന്‍ 150കോടിക്കും 175കോടിക്കും ഇടയില്‍ അവസാനിക്കുമെന്നാണ് ഇപ്പോള്‍ റിപ്പോര്‍ട്ടുകള്‍ വന്നിരിക്കുന്നത്. വളരെയധികം പ്രതീക്ഷകളോടെ കാത്തിരുന്ന ആമിര്‍ ചിത്രം പരാജയപ്പെട്ടതിന്റെ നിരാശയിലാണ് ആരാധകരുളളത്. ആദ്യ ദിനം തന്നെ പുറത്തുവന്ന സോഷ്യല്‍ മീഡിയ നിരൂപണങ്ങള്‍ സിനിമയെ സാരമായി ബാധിച്ചുവെന്ന് പ്രമുഖ വിമര്‍ശകരും ട്രേഡ് അനലിസ്റ്റുകളും ട്വീറ്റ് ചെയ്തിരുന്നു.

യഷ്രാജ് ഫിലിംസ് നിര്‍മ്മിച്ച ചിത്രം

കത്രീന കൈഫാണ് ചിത്രത്തില്‍ ആമിറിന്റെ നായികാ വേഷത്തിലെത്തുന്നത്. യഷ്രാജ് ഫിലിംസ് നിര്‍മ്മിച്ച ചിത്രം ആക്ഷന്‍ അഡൈ്വഞ്ചര്‍ ഫിലിമായാണ് അണിയിച്ചൊരുക്കിയിരുന്നത്. വിജയ് കൃഷ്ണ ആചാര്യ തന്നെ തിരക്കഥയെഴുതിയിരിക്കുന്ന ചിത്രത്തിന് അജയ്- അതുല്‍ ടീമാണ് സംഗീതമൊരുക്കിയത്.