പോയ കാമുകൻ തിരിച്ചു വരും, അപ്പോഴേക്കും എനിക്ക് മറ്റൊരു ബന്ധം ഉണ്ടാവും; പ്രണയത്തകർച്ചകളെക്കുറിച്ച് കങ്കണ

ഫാഷൻ ക്യൂൻ, തനു വെഡ്സ് മനു റിട്ടേൺസ്, പങ്ക, തലൈവി, ജഡ്ജ്മെന്റൽ ഹേ ക്യാ, രം​ഗൂൺ, സിമ്രാൻ, മണികർണിക, ധാക്കഡ് തുടങ്ങി കങ്കണ അഭിനയിച്ച സിനിമകളിലെ കഥാപാത്രങ്ങളെല്ലാം ഏറെ വ്യത്യസ്തമായിരുന്നു.

ഈ സിനിമകളിൽ പലതും വാണിജ്യ വിജയമായിരുന്നില്ലെങ്കിലും ഇവയിലെ കങ്കണയുടെ പ്രകടനം ശ്രദ്ധിക്കപ്പെട്ടിരുന്നു. മികച്ച നടിയാണെങ്കിലും സിനിമകളേക്കാൾ വിവാദങ്ങളോടാണ് കങ്കണയ്ക്ക് താൽപര്യം എന്നാണ് സിനിമാ ലോകത്തെ സംസാരം. എപ്പോഴും വിവാദ പ്രസ്താവനകൾ നടത്തുന്ന കങ്കണയ്ക്കെതിരെ പൊലീസ് കേസുകളുമുണ്ട്.

അഭിപ്രായ വ്യത്യസമുള്ളവരെ മോശം ഭാഷയിൽ ആക്രമിക്കുന്ന കങ്കണയുടെ പ്രവൃത്തികൾ അസഹീനയമാണെന്നാണ് പലരും പറയുന്നത്. വ്യക്തിപരമായ ജീവിതത്തെ പറ്റി തുറന്ന് പറയുന്ന താരമാണ് കങ്കണ. മുൻ പ്രണയങ്ങളെക്കുറിച്ചോ പ്രണയത്തകർച്ചകളെക്കുറിച്ചോ സംസാരിക്കാൻ നടിക്ക് മടിയില്ല. മുമ്പൊരിക്കൽ തന്റെ പ്രണയ ബന്ധങ്ങൾ ഇല്ലാതാവുന്നതിനെ പറ്റി കങ്കണ സംസാരിച്ചിരുന്നു.

'ഓരോ വേർപിരിയലിന് ശേഷവും ഇത് എന്റെ പ്രണയ ജീവിതത്തിന്റെ അവസാനമാണെന്ന് തോന്നുന്നു. എന്നെ സംബന്ധിച്ചിടത്തോളം സ്നേഹം ശാരീരികം മാത്രമല്ല. അത് ആത്മീയമാണ്. ആ വ്യക്തി അടുത്തില്ലാത്തപ്പോഴും നിങ്ങളുടെ ശരീരത്തിലെ ഓരോ കോശവും ഉണർന്നതായി അനുഭവപ്പെടുന്നത് അതിശയകരമായ അനുഭവമാണ്'

'എല്ലാ പ്രണയങ്ങളിലും എന്നെ ഉപേക്ഷിക്കുകയായിരുന്നു. ഒരാളെ ഉപേക്ഷിക്കാനുള്ള അവസരം എനിക്ക് ലഭിച്ചിട്ടില്ല. 16 വയസ്സു മുതൽ 31 വയസ്സുവരെയുള്ള ഈ കാലഘട്ടത്തിൽ ഞാനൊരു ബന്ധത്തിൽ ഒരാളെയും ഉപേക്ഷിച്ചിട്ടില്ല. അവരുടെയൊക്കെ പേര് ഞാൻ പറ‍ഞ്ഞാൽ ഈ ആൾ പോലും നിങ്ങളെ ഉപേക്ഷിച്ച് പോയോ എന്ന് നിങ്ങൾ ചോദിക്കും'

'എല്ലാവരും എന്നെ ഉപേക്ഷിക്കുകയും പിന്നീട് എന്റെയടുത്തേക്ക് തിരിച്ചുവരികയും ചെയ്യും. പക്ഷെ അപ്പോഴേക്കും ഞാൻ മറ്റൊരു ലൂസറുമായി ബന്ധം സ്ഥാപിച്ചിട്ടുണ്ടാവും,' 2018 ൽ കങ്കണ പറഞ്ഞതിങ്ങനെ.

കങ്കണയും നടൻ ഹൃതിക് റോഷനും തമ്മിലുണ്ടായ പ്രണയവും പിന്നീട് വന്ന വിവാദങ്ങളും ബോളിവുഡിൽ കോളിളക്കം സൃഷ്ടിച്ചിരുന്നു. ഹൃതികും താനും പ്രണയത്തിലായിരുന്നെന്ന് കങ്കണ പറഞ്ഞപ്പോഴും ഹൃതിക് ഇത് നിഷേധിക്കുകയാണുണ്ടായത്. പിന്നീട് കങ്കണയ്ക്കെതിരെ ഹൃതിക് കേസ് കൊടുക്കുന്ന സാഹചര്യവും ഉണ്ടായി. പിന്നീട് കങ്കണ ഹൃതിക്കിനെതിരെ നിരന്തരം ആരോപണങ്ങളുന്നയിച്ച് കങ്കണ രം​ഗത്തെത്തി. ഹൃതിക്കിന്റെ പിതാവുൾപ്പെടെ കങ്കണയുടെ ആരോപണങ്ങൾക്കെതിരെ രം​ഗത്ത് വന്നിരുന്നു.