പൊന്നമ്മ ബാബു

ജീവചരിത്രം:  ഹാസ്യ കഥാപാത്രങ്ങളിലൂടെ പ്രേക്ഷകരുടെ മനസ്സില്‍ ഇടം നേടിയ താരമാണ് പൊന്നമ്മ ബാബു. ശ്രീ മത്തായിയുടേയും ശ്രീമതി അച്ചാമ്മയുടേയും മകളായി പാലാ ഈരാറ്റുപേട്ടയില്‍ ജനനം. വിദ്യാഭാസം ഈരാറ്റുപേട്ട സെന്റ്‌ജോര്‍ജ്‌ സ്‌കൂളില്‍. ചെറുപ്പം മുതല്‍ ഭരതനാട്യം, മോഹിനിയാട്ടം തുടങ്ങിയവ അഭ്യസിച്ചിരുന്നു . പതിനഞ്ചാം വയസില്‍ ബാവക്കാട്‌ ബാബുവിന്റെ നേതൃത്വത്തിലുള്ള ‘ഏറ്റുമാനൂര്‍ സുരഭില’യെന്ന നാടകസംഘത്തിന്‍റെ ‘മാളം’ എന്ന നാടകത്തിലൂടെ അഭിനയ രംഗത്തെത്തി. പിന്നീട് ബാബുവിനെ തന്നെ ജീവിത പങ്കാളിയായി തിരഞ്ഞെടുത്തു.വിവാഹം കഴിഞ്ഞുള്ള താല്‍ക്കാലിക ഇടവേളയ്ക്കുശേഷം ‘പൂഞ്ഞാര്‍ നവധാര’യുടെ ‘അക്ഷയമാനസം’ എന്ന നാടകത്തിലൂടെ വീണ്ടും അരങ്ങത്തേക്ക് . 1996 ല്‍ റിലീസ്‌ ആയ പടനായകനാണ് ആദ്യ സിനിമയെങ്കിലും ഉദ്യാനപാലകനിലെ മമ്മൂട്ടിയുടെ സഹോദരീ വേഷമാണ് പൊന്നമ്മ ബാബുവിനെ ശ്രദ്ധേയയാക്കിയത്.പിന്നീട് എഴുപതോളം സിനിമകള്‍.കൂടാതെ നിരവധി സീരിയലുകളിലും അഭിനയിച്ചിട്ടുണ്ട്.മക്കള്‍. ദീപ്തി നിര്‍മ്മല , മാത്യു ഡാമിയന്‍ , പിങ്കി അല്‍ഫോന്‍സ്‌