ജയന്‍ മരിച്ചെന്ന് തിയറ്ററില്‍ എഴുതി, ആളുകള്‍ ഇറങ്ങിയോടി; അമേരിക്കയില്‍ ജയനുണ്ടെന്നാണ് വിശ്വാസമെന്ന് മുകേഷ്

മദ്രാസില്‍ വച്ച് ജയന്‍ ഹെലികോപ്ടര്‍ അപകടത്തില്‍ മരിച്ചെന്ന വാര്‍ത്ത പ്രത്യേകിച്ച് കൊല്ലത്തുള്ളവര്‍ക്കും ഉള്‍കൊള്ളാന്‍ സാധിച്ചില്ല. ആ വിവരം കാട്ടുതീ പോലെയാണ് പടര്‍ന്നത്. എല്ലാവരും വിഷമിക്കുകയും പൊട്ടിക്കരയുകയുമൊക്കെ ചെയ്തു. അന്ന് ദീപം എന്ന ജയന്റെ സിനിമ കൊല്ലം ആരാധന തിയറ്ററില്‍ ജനങ്ങള്‍ കണ്ട് കൊണ്ടിരിക്കുകയാണ്. കുതിരപ്പുറത്തിരുന്ന് പോളോ കളിക്കുന്ന ജയനാണ് ഈ ചിത്രത്തിലുള്ളത്. ഇതുപോലെ അഭിനയിക്കുന്ന നടന്‍ ജയന്‍ അല്ലാതെ മറ്റാരും ഇല്ലെന്നൊക്കെ സിനിമ കാണുന്ന പ്രേക്ഷകര്‍ പറയുന്നുണ്ട്.

പെട്ടെന്ന് സ്‌ക്രീന്‍ അനങ്ങാതെ നിന്നു. എന്നിട്ട് 'നമ്മുടെയൊക്കെ പ്രിയങ്കരനായ ജയന്‍ കുറച്ച് നേരം മുന്‍പ് മദ്രാസില്‍ വച്ച് ഒരു ഹെലികോപ്ടര്‍ അപകടത്തില്‍ മരിച്ചു' എന്ന് ആ തിയറ്ററുകാര്‍ സ്‌ക്രീനില്‍ എഴുതി കാണിച്ചു. ആ ഷോക്കില്‍ ആളുകള്‍ പൊട്ടിക്കരഞ്ഞ് കൊണ്ട് തിയറ്ററില്‍ നിന്നും ഇറങ്ങി ഓടി. പലരും നേരെ ജയന്റെ വീട്ടിലേക്ക് എത്തി. ഒരിഞ്ച് സ്ഥലം പോലുമില്ലാതെ അവിടം ജനസാഗരമായി കഴിഞ്ഞു. വരുന്നവരെല്ലാം കരയുകയാണ്. അവിടെയാണ് ജയന്‍ മനുഷ്യരുടെ ഹൃദയത്തില്‍ ഉണ്ടായിരുന്നു എന്ന് മനസിലാവുന്നത്.

സാധാരണ നടന്മാരോടുള്ള ആരാധനയല്ലായിരുന്നു ജയനോട് ആളുകള്‍ക്ക് ഉണ്ടായിരുന്നത്. മരണശേഷം ഒരു നടന്‍ മരിച്ചില്ല, ജീവനോടെ ഇരിപ്പുണ്ട് എന്ന് ആത്മാര്‍ഥമായി വിശ്വസിക്കാന്‍ തീരുമാനിച്ച ആരാധകര്‍ ജയനുണ്ടായിരുന്നു. അതിന് ശേഷം ഒരുപാട് കഥകള്‍ ഇറങ്ങി. ജയനെ മറ്റുള്ള നടന്മാര്‍ ചേര്‍ന്ന് കൊന്നതാണെന്നൊക്കെയുള്ള കഥകളിറങ്ങി. ഇതെല്ലാം അദ്ദേഹത്തിന്റെ മരണം ഉള്‍കൊള്ളാന്‍ കഴിയാതെ ആളുകള്‍ പുലമ്പുന്നതാണ്. ആരെങ്കിലും ജയനെ കുറിച്ച് പറഞ്ഞാല്‍ അത് വിശ്വസിക്കുകയും അതിനെതിരെ പ്രതികരിക്കുകയുമൊക്കെ ചെയ്തിരുന്നു.

ജയന്‍ മരിച്ചിട്ടില്ല എന്ന തരത്തില്‍ എന്റെ നാട്ടില്‍ ഒരു കഥാപ്രസംഗം നടത്തി. അദ്ദേഹം അമേരിക്കയില്‍ ജീവിച്ചിരിപ്പുണ്ട്, അദ്ദേഹത്തെ കണ്ടവരുണ്ട്, യഥാര്‍ഥത്തില്‍ മരിച്ചത് ജയനല്ല, ഇവിടെ കൊണ്ട് വന്നത് കറുത്ത് കരിഞ്ഞ വികൃതമായിട്ടുള്ള ആളാണ്, സംവിധായകരും നടന്മാരും തമ്മില്‍ ഗൂഡാലോചന നടത്തി, എന്നൊക്കെയുള്ള കഥകള്‍ പുറത്ത് വന്നു. ഇതൊക്കെ ആളുകള്‍ വിശ്വസിച്ചിരുന്നു. ജയന്‍ വരുമെന്നും അദ്ദേഹത്തിന് മരിക്കാന്‍ പറ്റില്ല, അത്രമാത്രം ശക്തിമാനാണ് എന്നൊക്കെ ആളുകള്‍ വിശ്വസിച്ചുവെന്നും മുകേഷ് പറയുന്നു.