വാപ്പ മരിച്ചത് ഉമ്മ അറിഞ്ഞില്ലെന്ന് റഹ്മാന്‍; രോഹിണിയും ശോഭനയും റഹ്മാന്റെ കാമുകിമാരായിരുന്നോ? മറുപടിയിങ്ങനെ

തന്റെ വാപ്പയും ഉമ്മയും അത്രയധികം സ്‌നേഹിച്ച് ജീവിച്ചിരുന്നവരാണെന്നാണ് റഹ്മാന്‍ പറയുന്നത്. ഉമ്മയ്ക്ക് ഓര്‍മ്മ പോലുമില്ലാതെ കിടക്കുന്ന സമയത്ത് നോക്കിയതെല്ലാം വാപ്പയാണ്. മക്കളെ കൊണ്ടോ, നഴ്‌സ്മാരെ കൊണ്ടോ ഒന്നും ചെയ്യാന്‍ സമ്മതിപ്പിച്ചിരുന്നില്ല. കുളിപ്പിക്കുന്നത് മുതല്‍ ഉടുപ്പ് മാറ്റുന്നത് വരെ വാപ്പയാണ് ചെയ്തത്. വേറെ ആരും ചെയ്താല്‍ ശരിയാവില്ലെന്നായിരുന്നു പുള്ളി പറഞ്ഞത്. എന്നാല്‍ വാപ്പ ആദ്യം മരിച്ചത് ഉമ്മ അറിഞ്ഞിരുന്നില്ലെന്നും റഹ്മാന്‍ പറയുന്നു.

തന്റെ വിവാഹത്തെ കുറിച്ചും അഭിമുഖത്തില്‍ റഹ്മാന്‍ പറഞ്ഞിരുന്നു. 'ഒരു കല്യാണത്തിന് പോയപ്പോഴാണ് മെഹ്‌റുന്നീസയെ ആദ്യമായി കാണുന്നത്. അന്ന് മൂന്നാല് പെണ്‍കുട്ടികളുടെ കൂടെ തട്ടമൊക്കെ ഇട്ട് നില്‍ക്കുകയാണ്. നിലമ്പൂരിലുള്ള കുട്ടികളെയേ അന്ന് തട്ടമിട്ട് കണ്ടിട്ടുള്ളു. ടൗണിലൊന്നും അങ്ങനെയല്ല. അതുകൊണ്ട് കെട്ടുവാണെങ്കില്‍ ഇതുപോലൊരു കൊച്ചിനെ കെട്ടണമെന്ന് ഞാനെന്റെ സുഹൃത്തിനോട് പറഞ്ഞു. അവര്‍ അവളുടെ അഡ്രസ് കണ്ടെത്തി വീട്ടുകാര്‍ മുഖേനെ കല്യാണം ഉറപ്പിച്ചു. അങ്ങനെയാണ് തന്റെ വിവാഹം നടന്നതെന്ന്', റഹ്മാന്‍ പറയുന്നു.

നടി ശോഭനയുടെയും രോഹിണിയുടെയും പേരിനൊപ്പം വന്ന ഗോസിപ്പുകളെ കുറിച്ചും റഹ്മാന്‍ വിശദീകരിച്ചു. 'അക്കാലത്ത് നമ്മുടെ കള്‍ച്ചര്‍ കുറച്ച് ഓര്‍ത്തഡോക്‌സ് ആയിരുന്നു. സമൂഹത്തില്‍ ആണും പെണ്ണും വേറെയാണ്. സിനിമയില്‍ മാത്രമേ പുരുഷനും സ്ത്രീയും കെട്ടിപ്പിടിക്കുന്നതൊക്കെ. സാധരണക്കാര്‍ക്ക് അതുള്‍കൊള്ളാന്‍ കഴിഞ്ഞിരുന്നില്ല.

ശോഭനയുമായിട്ടോ, രോഹിണിയുമായിട്ടോ ഷൂട്ടിങ്ങ് കഴിഞ്ഞ് ഏതെങ്കിലും റസ്‌റ്റോറന്റില്‍ പോയി ഭക്ഷണം കഴിക്കുകയോ, ഐസ്‌ക്രീം കഴിക്കുകയോ ചെയ്താല്‍ അതിന്റെ പേരിലൊക്കെ കഥ വന്ന് തുടങ്ങി. എല്ലാവരുടെ പേരിലും ഇത്തരം കഥ വരും. എന്നാല്‍ സെലിബ്രിറ്റികളായത് കൊണ്ടാവും പത്രങ്ങളില്‍ അടക്കം ഗോസിപ്പ് വന്നത്. സത്യത്തില്‍ അങ്ങനൊരു പ്രണയവും ഉണ്ടായിരുന്നില്ലെന്ന് തന്നെയാണ് റഹ്മാന്‍ ഉറപ്പിച്ച് പറയുന്നത്.

ശോഭനയും രോഹിണിയും ഞാനുമൊക്കെ ഒരേ പ്രായത്തിലുള്ളവരാണ്. അതുകൊണ്ട് കൂടുതലായി ആസ്വദിക്കാന്‍ സാധിച്ചു. ഞാനീ ഗോസിപ്പുകളൊന്നും വായിച്ചിരുന്നില്ല. എനിക്ക് മലയാളം വായിക്കാനും അറിയില്ലായിരുന്നു. പിന്നെ ആരെങ്കിലും പറയുമ്പോഴെ ഇതൊക്കെ അറിയുകയുള്ളു. എന്നാല്‍ എന്റെ മമ്മി ഇതൊക്കെ വായിക്കുന്നുണ്ടായിരുന്നു. സിനിമയില്‍ നിന്നും വിവാഹം കഴിക്കണമെന്ന് ആഗ്രഹിച്ച നടി ഉണ്ടായിരുന്നുവെന്നും റഹ്മാന്‍ പറയുന്നു.