'ജ​ഗതിയോടൊപ്പം അഭിനയിക്കുന്നത് റിസ്ക് ആയിരുന്നു,'; രസകരമായ സംഭവത്തെക്കുറിച്ച് അഭിരാമി

ഇപ്പോഴിതാ തന്റെ സിനിമാ ജീവിതത്തെ പറ്റി സംസാരിക്കുകയാണ് അഭിരാമി ഇപ്പോൾ. വിവാഹ ശേഷം ഭർത്താവിനൊപ്പം അമേരിക്കയിലായിരുന്ന അഭിരാമി ഇപ്പോൾ ഒരു വർഷത്തിലേറെയായി ഇന്ത്യയിലാണ്. 14ാം വയസ്സു മുതൽ സുഹൃത്തുക്കളായിരുന്നു ഭർത്താവ് രാഹുലും ഞാനും. അതിനാൽ തന്നെ ഞങ്ങൾ പരസ്പരം നല്ല രീതിയിൽ മനസ്സിലാക്കുന്നവരാണ്. ഒരേ മേഖലയിൽ ജീവിക്കുന്നവരുടെ ജീവിതം ഒരു വലയത്തിനുള്ളിലായിരിക്കും.

അഭിനേതാക്കൾ പൊതുവെ തന്നിൽ കേന്ദ്രീകരിച്ചിരിക്കുന്നവരായിരിക്കും. അത് മാറ്റി നീ ഭൂമിയിൽ നിൽക്ക് എന്ന് പറയാൻ ഒരാളുണ്ടെങ്കിൽ നല്ലതാണെന്നും അഭിരാമി പറയുന്നു. ഭർത്താവും ഞാനും മാം​ഗോ എന്ന വളർത്തു പട്ടിയുമുള്ള ചെറിയ കുടുംബമാണ് ഞങ്ങളുടേത്. തന്റെ പഴയ സിനിമ കാണുമ്പോൾ തന്റെ അഭിനയം ഇഷ്ടമാവാറില്ലെന്നും എത്ര മോശമായാണ് ചെയ്തിരിക്കുന്നതെന്ന് തോന്നാറുണ്ടെന്നും നടി പറഞ്ഞു. ഇന്ത്യാ​ഗ്ലിറ്റ്സിനോടാണ് പ്രതികരണം.

ഹാസ്യ വേഷങ്ങൾ ചെയ്യുന്നവരാണ് മുൻ നിര അഭിനേതാക്കളേക്കാൾ മികച്ച അഭിനേതാക്കളെന്ന് താൻ കരുതുന്നെന്ന് അഭിരാമി പറയുന്നു. ടെെംമിം​ഗും ശരീര ഭാഷയും വിശ്വസനീയതയും എല്ലാം ശരിയായിരിക്കണം. പല കോമഡി താരങ്ങളുടെയും ഉള്ളിൽ ഒരു ദുഖമുണ്ടാവും. ആ ദുഖത്തിൽ നിന്ന് വരുന്ന കോമഡിയാണ് ഞാൻ ശരിക്കും ആസ്വദിക്കുന്നത്. വിവേക് സർ (തമിഴ് നടൻ) തനിക്കേറ്റവും ഇഷ്ടമുള്ള നടനാണെന്നും അഭിരാമി പറഞ്ഞു.

മലയാളത്തിൽ നടൻ ജ​ഗതി ശ്രീകുമാറിനോടൊപ്പം അഭിനയിച്ചപ്പോഴുണ്ടായ രസകരമായ അനുഭവത്തെ പറ്റിയും അഭിരാമി വിവരിച്ചു. അദ്ദേഹം തന്റെ അച്ഛന്റെ ക്ലാസ്മേറ്റ് ആയിരുന്നു. ആ ഒരു ബന്ധം ഉണ്ടായിരുന്നു. അവരുടെ കൂടെ അഭിനയിക്കുന്നത് വളരെ റിസ്കാണ്. സജഷൻ ഷോട്ട് വെച്ചാൽ നമ്മൾ ​ഗൗരവമായി അഭിനയിക്കുകയായിരിക്കും.

അദ്ദേഹം പല അഭിനയത്തിൽ പല എക്സ്പ്രഷനുകളും ഇടും. അത് തന്നെ ചിരിപ്പിക്കുമെന്നും അഭിരാമി പറയുന്നു. വളരെ ചെറിയ പ്രായത്തിൽ സിനിമയിലെത്തിയ ആളാണ് താൻ. 15 വയസ്സിലാണ് മലയാളത്തിൽ അഭിനയിച്ച് തുടങ്ങിയത്. എല്ലാ ഭാഷയിലും മികച്ച ആളുകളോടൊപ്പം പ്രവർത്തിക്കാൻ പറ്റി. അതിൽ തനിക്ക് സന്തോഷമുണ്ടെന്നും അഭിരാമി പറഞ്ഞു.

തമിഴ്, തെലുങ്ക് സിനിമാ മേഖകളിൽ നിന്നും തനിക്ക് ലഭിച്ച സ്നേഹം വളരെ വലുതാണെന്നും നടി പറയുന്നു. ഒരു വശത്ത് സ്വന്തം വീട്ടിലെ ആളെപോലെയും മറുവശത്ത് ആരാധനയോടെയും ജനങ്ങൾ നമ്മളെ കാണുന്നെന്നും അഭിരാമി ചൂണ്ടിക്കാട്ടി.