ചിരഞ്ജീവി സര്‍ജയെക്കുറിച്ച് ദീപ്തി സതി, ആ സമയത്ത് അദ്ദേഹം പൂര്‍ണ്ണ ആരോഗ്യവാനായിരുന്നു

ചിരുവിനെക്കുറിച്ച്

ആരാധകപിന്തുണയുടെ കാര്യത്തില്‍ ഏറെ മുന്നിലായിരുന്നു ചിരഞ്ജീവി സര്‍ജ. മേഘ്‌നയ്ക്കും ധ്രുവയ്ക്കുമെല്ലാം മികച്ച പിന്തുണയായിരുന്നു ആരാധകര്‍ നല്‍കിയിരുന്നത്. ചിരുവിന്റെ വിയോഗ ശേഷവും കുടുംബത്തിലെ കാര്യങ്ങളെക്കുറിച്ച് ആരാധകര്‍ ചോദിക്കുന്നുണ്ടായിരുന്നു. രാജമാര്‍ത്താണ്ഡയുള്‍പ്പടെയുള്ള സിനിമകള്‍ ബാക്കി വെച്ചായിരുന്നു ചിരു പോയത്. ഫെബ്രുവരി വരെ ചിരുവിനൊപ്പം പ്രവര്‍ത്തിച്ചിരുന്നു ദീപ്തി സതി. ആ സമയം വരെ അദ്ദേഹം പൂര്‍ണ്ണ ആരോഗ്യവാനായിരുന്നുവെന്ന് താരം പറയുന്നു.

ഞെട്ടലായിരുന്നു

ചിരുവിന്റെ വിയോഗത്തെക്കുറിച്ച് അറിഞ്ഞപ്പോള്‍ ഞെട്ടിപ്പോയിരുന്നു. കേട്ട വാര്‍ത്ത വിശ്വസിക്കാന്‍ കഴിഞ്ഞിരുന്നില്ല. ഇല്ല, അദ്ദേഹത്തിന് ഒന്നും സംഭവിച്ചിട്ടില്ലെന്നായിരുന്നു പലപ്പോഴും വിശ്വസിച്ചിരുന്നത്. സ്‌ക്രീനിലും സെറ്റിലുമൊക്കെയായി ഒരുപാട് സമയം ഞങ്ങള്‍ ഒരുമിച്ച് ചെലവഴിച്ചിരുന്നു. ഈ വാര്‍ത്ത കേട്ടപ്പോള്‍ അമ്മയും സങ്കടത്തിലായിരുന്നു. ഈ വേദന അത്ര പെട്ടെന്നൊന്നും പോവില്ല, സമയമെടുക്കുമെന്നും ദീപ്തി സതി പറയുന്നു.

രാജമാര്‍ത്താണ്ഡ

ചിരു നായകനായെത്തുന്ന രാജമാര്‍ത്താണ്ഡയില്‍ ദീപ്തി സതിയും അഭിനയിച്ചിരുന്നു. ചിരുവിന്റെ പിറന്നാള്‍ ദിനത്തിലായിരുന്നു ചിത്രത്തിന്റെ ഫസ്റ്റ് ലുക്ക് പോസ്റ്റര്‍ പുറത്തുവിട്ടത്. അടുത്ത വര്‍ഷം സിനിമ റിലീസ് ചെയ്യുമെന്നുള്ള വിവരങ്ങളാണ് പുറത്തുവന്നിട്ടുള്ളത്. ചിരുവിന്റേതായുള്ള സീനുകളുടെ ഡബ്ബിംഗ് ഇതുവരെ കഴിഞ്ഞിട്ടില്ലെന്നും ദീപ്തി സതി പറയുന്നു.

ധ്രുവയുടെ ശബ്ദം

സഹോദരന്റെ സിനിമയ്ക്കായി ധ്രുവ സര്‍ജ ശബ്്ദം നല്‍കിയേക്കുമെന്നുള്ള വിവരങ്ങളും പുറത്തുവന്നിരുന്നു. ഡബ്ബിംഗിനായി എത്തിയിരുന്നുവെങ്കിലും ചിരുവിനെ കണ്ടതോടെ ശബ്ദമിടറി ധ്രുവ പിന്‍വാങ്ങുകയായിരുന്നു. സഹോദരന്‍മാര്‍ എന്നതിനും അപ്പുറത്ത് അടുത്ത സുഹൃത്തുക്കളായിരുന്നു ചിരുവും ധ്രുവയും. ചിരു പോയെന്ന് വിശ്വസിക്കാനാവുന്നില്ലെന്നും, തിരിച്ച് വന്നേ തീരൂയെന്നും പറഞ്ഞും ധ്രുവ എത്തിയിരുന്നു. തനിക്ക് ജനിക്കുന്നത് ആണ്‍കുഞ്ഞായിരിക്കുമെന്ന് ചിരു പറഞ്ഞതിനെക്കുറിച്ചും ധ്രുവ പറഞ്ഞിരുന്നു.